މޫސުން ރަނގަޅެއް ނުވޭ؛ ހުދު ސަމާލު ދަންމާލައިފި

ރާއްޖެއަށް މިހާރު ކުރަމުންދާ ވިއްސާރައާ ގުޅިގެން ރާއްޖޭގެ ބޮޑު ސަރަހައްދަކަށް މޫސުން ގޯސްވާނެ ކަމަށް ލަފާކޮށް ނެރުނު ހުދު ސަމާލު ދަންމާލައިފިއެވެ.

މޫސުން ގޯސްވާނެ ކަމަށް ލަފާކޮށް މެޓް އޮފީހުން މިއަދު 11:00 އާ ހަމައަށް، ބ. އަތޮޅުން ފެށިގެން ވ. އަތޮޅާ ދެމެދުގެ ސަރަޙައްދުތަކަށް ރީނދޫ ސަމާލުނެރެފައިވާއިރު، މިއަދު މެންދުރު 12 އާ ހަމައަށް މުޅި ރާއްޖޭގެވެސް މޫސުން ގޯސްވާނެ ކަމަށް ލަފާކޮށް ހުދު ސަމާލު ނެރެފައިވެއެވެ.

ހުދު ސަމާލުގެ ވަގުތު ހަވީރު 5:00 އާ ހަމައަށް ދަންމާލާފައިވާއިރު، މެޓް އޮފީހުން މި ސަމާލު ނެރުނީ ހއ އިން ގދ އަތޮޅުގެ ސަރަހައްދުތަކަށެވެ.

އެ އޮފީހުން ލަފާކޮށްފައިވާ ގޮތުގައި އެ ވަގުތުގައި އެ ސަރަހައްދަށް ގުގުރުމާއެކު ބޯކޮށްވާރޭވެހޭނެއެވެ. އަދި ވިލާގަނޑުގައި ގަޑިއަކު 35 މޭލަށް ވައިގަދަވާނެއެވެ.

މާދަމާއިން ފެށިގެން ބަންދު ހަތަރު ދުވަސް ލިބޭއިރު މެޓް އޮފީހުން ބުނެފައިވާގޮތުން މާދަމާ މޫސުން އަލިވާން ފަށާނެއެވެ.