ތިން އަހަރު ތެރޭ ވީއައިއޭގެ ތަރައްޤީއާއެކު އިޤްތިޞާދީ ފުރުޞަތުތައް ފުޅާވެއްޖެ: އެމްއޭސީއެލް
ވެލާނާ އިންޓަނޭޝަނަލް އެއަރޕޯޓް (ވީއައިއޭ) ތަރައްޤީކުރުމުގެ ބޮޑު މަޝްރޫޢުގެ ދަށުން، ފާއިތުވި ތިން އަހަރު ދުވަހުގެ ތެރޭގައި މުހިންމު ލަނޑުދަނޑިތަކެއް ޙާޞިލްކުރެވި، ރާއްޖޭގެ ވައިގެ ދަތުރުފަތުރުގެ ނިޒާމު ހަރުދަނާވެ އިޤްތިޞާދީ އައު ފުރުޞަތުތަކެއް ފަހިވެފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
އެމްއޭސީއެލް އިން ބުނީ، އެއަރޕޯޓުގެ ވަސީލަތްތަކާއި އޮޕަރޭޝަންތަކަށް ގެނެވުނު ޒަމާނީ ބަދަލުތަކުގެ ސަބަބުން ދެވޭ ޚިދުމަތްތަކުގެ ފެންވަރު ވަނީ ވަރަށް ބޮޑަށް މަތިވެފައެވެ. އަދި ރާއްޖޭގެ މައި ދޮރާށީގެ ގޮތުގައި އެއަރޕޯޓުގެ ދައުރު ފުޅާވެ، ފަތުރުވެރިކަމަށާއި ވިޔަފާރިތަކަށް ބޮޑެތި ކުރިއެރުންތަކެއް އަންނަނީ ލިބެމުންނެވެ.
މި ތަރައްޤީގެ އެންމެ ބޮޑު ކާމިޔާބީއަކީ 26 ޖުލައި 2025 ގައި ހުޅުވުނު އައު ބައިނަލްއަޤްވާމީ ޕެސެންޖަރ ޓަރމިނަލް (ޓަރމިނަލް1) އެވެ. މި ޒަމާނީ ވަސީލަތުގެ ސަބަބުން ދަތުރުވެރިންގެ ތަޖުރިބާ ރަނގަޅުވެ، ބައިނަލްއަޤްވާމީ ވައިގެ ދަތުރުފަތުރުގެ ޑިމާންޑާ އެއްވަރަށް ޚިދުމަތް ދިނުމުގެ ޤާބިލުކަން އިތުރުވެފައިވާކަން އެމްއޭސީއެލްއިން ފާހަގަކުރެއެވެ. މީގެ އިތުރުން، 17 ފެބުރުވަރީ 2026 ގައި ޓަރމިނަލް 2 ހުޅުވުމާއެކު، އެތެރޭގެ އުދުހުންތަކަށް ބޮޑެތި ފަސޭހަތަކެއް ލިބި، ރާއްޖޭގެ އެކި ސަރަޙައްދުތަކަށް ކުރާ ދަތުރުތައް އިތުރަށް ހަރުދަނާވެފައިވާ ކަމަށްވެސް ބުންޏެވެ.
އެއަރޕޯޓުގެ ކާގޯ ދާއިރާއިން ވެސް ވަނީ ފާހަގަކޮށްލެވޭ ބޮޑެތި ކުރިއެރުންތަކެއް ހޯދާފައެވެ. އެގޮތުން، "ސީ-ޓު-އެއަރ ކާގޯ" އިނީޝިއޭޓިވްގެ ދަށުން 15 ޖެނުއަރީ 2024 ގައި އިމްޕޯޓް ކާގޯގެ ޚިދުމަތް އަދި 11 އޮގަސްޓު 2024 ގައި އެކްސްޕޯޓް ކާގޯގެ އޮޕަރޭޝަންތައް ފެށުމާއެކު، ސަރަޙައްދީ އަދި ބައިނަލްއަޤްވާމީ ފެންވަރުގައި ވައިގެ މަގުން މުދާ އުފުލުމުގެ ދޮރުތައް ވަނީ ހުޅުވިފައެވެ.
މީގެ އިތުރުން، އެއަރޕޯޓުގެ އޮޕަރޭޝަނަލް ސަލާމަތާއި ޚިދުމަތް އަވަސްކުރުމަށްޓަކައި 27 ޖޫން 2024 ގައި އައު ފަޔަރ ސްޓޭޝަނެއް ހުޅުވައި، ކުއްލި ޙާލަތްތަކަށް އިޖާބަދިނުމުގެ ޤާބިލުކަން ވަނީ އިތުރުކޮށްފައެވެ. އަދި 7 ނޮވެމްބަރު 2024 ގައި ޚިދުމަތް ދޭން ފެށި އައު ފިއުލް ފާމާއި ފިއުލް ހައިޑްރަންޓް ސިސްޓަމާއެކު، ބޯޓުފަހަރަށް ތެޔޮ އެޅުމާއި ތެޔޮ ރައްކާކުރުމުގެ ޤާބިލުކަން އެތައް ގުނައަކަށް އިތުރުވެގެން ގޮސްފައިވާ ކަމަށް އެމްއޭސީއެލް އިން މަޢުލޫމާތު ދެއެވެ.
ފާއިތުވި ތިން އަހަރު ދުވަހުގެ ތެރޭގައި ސަރުކާރުގެ އިރުޝާދުގެ ދަށުން އެމްއޭސީއެލް އިން ގެނެސްދިން މި އިންގިލާބީ ބަދަލުތަކަކީ ރާއްޖޭގެ އޭވިއޭޝަން ދާއިރާ ޒަމާނީ ކުރުމަށާއި، ބައިނަލްއަޤްވާމީ ވާދަވެރިކަން އިތުރުކުރުމަށް އެޅުނު ވަރަށް މުހިންމު ފިޔަވަޅެކެވެ. އެމްއޭސީއެލްގެ މައިގަނޑު އަމާޒަކީ މި ވަސީލަތްތަކުގެ އެންމެ ފުރިހަމަ ބޭނުން ހިފައި، ދުނިޔޭގެ ފެންވަރުގައި ވީއައިއޭގެ ޚިދުމަތްތައް ފުޅާކޮށް ދެމެހެއްޓުމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް