އެމްއޭސީއެލްއިން މުވައްޒަފުން ތަމްރީނުކޮށް ވީއައިއޭގެ ހިދުމަތްތައް ފުޅާކޮށްފި

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި އިންސާނީ ވަސީލަތްތައް ބިނާކޮށް، ދަތުރުވެރިންނަށް ދޭ ހިދުމަތުގެ ފެންވަރު ރަނގަޅުކުރުމަށް ފުޅާ މަސައްކަތްތަކެއް ދަނީ ކުރަމުންނެވެ.

އެ ކުންފުނިން ދާދި ފަހުން މީސް މީޑިއާގައި އާންމުކުރި ފޮޓޯތަކާއި މެސެޖުތަކުން ފެންނަ ގޮތުގައި، ވީއައިއޭގެ ސްޕެޝަލް އެސިސްޓެންސް ޓީމުން ބަލިމީހުންނާއި ކުޑަކުދިންނާއި އުމުރުން ދުވަސްވީ ފަރާތްތަކަށް ހާއްސަ އެހީތެރިކަން ފޯރުކޮށްދެއެވެ. ސިއްހީ ކުއްލި ހާލަތްތަކުގައި ނުވަތަ އިތުރު ފަރުވާއަށް ރާއްޖެ އިން ބޭރަށް ފުރާ ބަލިމީހުންނާއި އެ މީހުންގެ އާއިލާތައް ތިބެނީ ޖިސްމާނީ އަދި ނަފްސާނީ ގޮތުން ބޮޑު ބުރައެއްގައި ކަމަށް ވާއިރު، އެފަދަ ވަގުތުތަކުގައި އެއާޕޯޓުގެ މުވައްޒަފުންގެ ފަރާތުން ލިބޭ ޕްރޮފެޝަނަލް އަދި އޯގާތެރި އެހީތެރިކަމަކީ އާއިލާތަކަށް ލިބޭ ބޮޑު ހިތްހަމަޖެހުމެއް ކަމަށް އެ ކުންފުނިން ފާހަގަކޮށްފައިވެއެވެ.

މި ފެންވަރުގައި ހިދުމަތް ދެމެހެއްޓުމަށްޓަކައި އެމްއޭސީއެލްއިން ވަނީ މުވައްޒަފުން ތަމްރީނުކުރުމުގެ ނިޒާމު ހަރުދަނާކޮށްފައެވެ. އެ ގޮތުން އޭވިއޭޝަން އިންސްޓިޓިއުޓް އޮފް މޯލްޑިވްސް މެދުވެރިކޮށް، ގްރައުންޑް ހޭންޑްލިން އާއި އެއާޕޯޓް ސެކިއުރިޓީ އާއި ކަސްޓަމާ ސާވިސް ފަދަ ދާއިރާތަކުން ބައިނަލްއަގުވާމީ މިންގަނޑުތަކަށް ފެތޭ ތަމްރީނު ޕްރޮގްރާމްތައް ހިންގަމުންދެއެވެ.

މުވައްޒަފުންގެ ގާބިލުކަން އިތުރުކުރުމާ އެކު، ވީއައިއޭގެ އުމްރާނީ ވަސީލަތްތައް ތަރައްގީކުރުމުގެ މަސައްކަތް ވެސް ކުރިއަށް ގެންގޮސްފައިވެއެވެ. ޓާމިނަލް 1 ގައި 750 އަކަމީޓަރުގެ ޒަމާނީ ޕެސެންޖާ ރެސްޓް އެންޑް ސާވިސް އޭރިއާއެއް ޖުލައި މަހު ހުޅުވާފައިވާ އިރު، އެ ތަނުގައި ތަފާތު ވައްތަރުގެ އަރާމު ގޮނޑިތަކާއި ކުޑަކުދިންނަށް ހާއްސަ 136 އަކަމީޓަރުގެ ޕްލޭ އޭރިއާއެއް ވެސް ހިމެނެއެވެ.

އެމްއޭސީއެލްގެ އަމާޒަކީ މުވައްޒަފުންގެ ހުނަރާއި ވަސީލަތްތައް ގުޅުވައިލައިގެން، ހާއްސަ އެހީ ބޭނުންވާ ފަރާތްތައް ހިމެނޭ ގޮތަށް ކޮންމެ ދަތުރުވެރިއަކަށް ވެސް ފެންވަރު ރަނގަޅު، އަމާން ތަޖުރިބާއެއް ފޯރުކޮށްދިނުމެވެ.