މިއައީ ހަމައެކަނި ކުޑަ ޓާމިނަލަކާއި ރިސޯޓެއް އަޅާފައި ނިންމާލާކަށް ނޫން؛ އެކުގައި ކުރިއަރައިދާން: ސާހް ގްރޫޕް
ޔުނައިޓެޑް އަރަބް އެމިރޭޓްސް (ޔޫއޭއީ) ގެ ސާހް ގްރޫޕުން ރާއްޖޭގައި ކުރިއަށްގެންދާ މަޝްރޫޢުތަކަކީ ހަމައެކަނި ކުޑަ ޓާމިނަލަކާއި ރިސޯޓެއް އެޅުމަށްވުރެ މާ ފުޅާ، ދިގުމުއްދަތުގެ އިޤްތިޞާދީ ކުރިއެރުމަށް އަމާޒުކޮށްގެން ހިންގާ މަޝްރޫޢުތަކެއް ކަމަށް އެ ކުންފުނިން ބުނެފިއެވެ.
ރާއްޖޭގެ އެންމެ އުތުރުން އިހަވަންދިއްޕޮޅުގައި ހިންގާ "މޯލްޑިވްސް އިކޮނޮމިކް ގޭޓްވޭ އެންޑް އިންޓެގްރޭޓެޑް ޑިވެލޮޕްމަންޓް" ގެ ބިޔަ މަޝްރޫއުގެ މައި އެއްބަސްވުމުގައި ސޮއިިކުރަން ރޭ ބޭއްވި ރަސްމިއްޔާތުގައި ސާހް ގްރޫޕްގެ ޗީފް އެގްޒެކެޓިވް އޮފިސަރު އަހުމަދު އިބްރާހިމް އަލީ މުހައްމަދު އަލްމުތާވާ ވިދާޅުވީ، އެ ކުންފުނީގެ އަމާޒަކީ ދިވެހިރާއްޖެއާއެކު ދިގުމުއްދަތަކަށް ދެމިގެންދާނެ އަދި ދެމެހެއްޓެނިވި އިޤްތިޞާދީ މަސައްކަތްތަކެއް ކުރިއަށް ގެންދިޔުން ކަމަށެވެ.
"އަޅުގަނޑުމެން އަބޫދާބީންނާއި، ސާހް އިން މިތަނަށް މިއައީ ހަމައެކަނި ކުޑަ ޓާމިނަލަކާއި ކުޑަ ރިސޯޓެއް އަޅައި، ފައިސާ ހޯދައިގެން 'އޯކޭ، މިއޮތީ ނިމިފައޭ' ބުނެފައި ނިންމާލާކަށް ނޫން. އެހެންނެއް ނޫން ވާނީކީ. އަޅުގަނޑުމެން މި ބަލަނީ އެކުގައި ކުރިއަރައި، ވެލިއުއެޑް ކުރަން. އަދި އެކަމުގެ ފުރުޞަތު އެބައޮތް ކަމަށް އަޅުގަނޑު ދެކެން."
އަޙްމަދު އިބްރާހީމް ވިދާޅުވި ގޮތުގައި މި މަޝްރޫޢަކީ ކުރިއަށް އޮތް 10 އަހަރާއި 20 އަހަރު، އަދި އެއަށްވުރެ ދުރަށް ބަލައި، ރާއްޖެއަށް ފައިދާކުރާނެ ގޮތްތަކަށް ވިސްނައިގެން އެކުލަވާލާފައިވާ ދުރު ރާސްތާގެ ވިސްނުމެކެވެ. މި މަޝްރޫޢުގެ ދަށުން ބަނދަރަކާއި، ތެޔޮ ރައްކާކުރާ ނިޒާމުތަކާއި، އިންޑަސްޓްރިއަލް ސަރަޙައްދަކާއި، ލޮޖިސްޓިކްސް ޚިދުމަތްތައް އަދި އިޤްތިޞާދީ ޒޯނެއް ހިމެނޭހެން ދެމެހެއްޓެނިވި އުމްރާނީ ތަރައްޤީ ޤާއިމުކުރެވިގެންދާނެ ކަމަށް އޭނާ ވިދާޅުވިއެވެ.
ބައިނަލްއަޤްވާމީ މުހިންމު ކަނޑުދަތުރުފަތުރުގެ މަގުތަކުގައި ރާއްޖެ އޮތް ސްޓްރެޓީޖިކް ލޮކޭޝަން ފާހަގަކުރައްވަމުން އަޙްމަދު އިބްރާހީމް ވިދާޅުވީ، މި މަޝްރޫޢުގެ ސަބަބުން ދުނިޔޭގެ ޝިޕިންގ ވިއުގަތަކާ ރާއްޖެއާ ދެމެދު އޮތް ގުޅުން އިތުރަށް ބަދަހިވެގެންދާނެ ކަމަށެވެ. މީގެއިތުރުން، މި ތަރައްޤީގެ ސަބަބުން ވަޒީފާގެ ފުރުޞަތުތައް ފަހިވެގެން ދިއުމުގެ އިތުރުން މުޅި ސަރަޙައްދަށްވެސް ދެމެހެއްޓެނިވި އިޤްތިޞާދީ މުސްތަޤްބަލެއް ކަށަވަރުވެގެންދާނެ ކަމަށް ވިދާޅުވިއެވެ.
އޭނާ ވިދާޅުވީ ސާހް ގްރޫޕުގެ ބޮޑު އަމާޒަކީ އަންނަން އޮތް ޖީލުތަކަށްވެސް ފައިދާކުރާނެ ފަދަ އުމްރާނީ ވަސީލަތްތަކާއި ފުރުޞަތުތައް ބިނާކުރުން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް