އިލެކްޓްރިކް އުޅަނދުތައް މަރާމާތުކުރުމުގެ ޤާބިލުކަން އިތުރުކުރުމަށް އެއްބަސްވުމެއްގައި ސޮއިކޮށްފި
ރާއްޖޭގައި އިލެކްޓްރިކް އުޅަނދުތަކާއި ޗާޖިންގ ސްޓޭޝަންތައް ބެލެހެއްޓުމާއި މަރާމާތުކުރުމުގެ ފަންނީ ޤާބިލުކަން އިތުރުކުރުމުގެ ގޮތުން، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ އާއި މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑާ ދެމެދު އިއްޔެ ފަހުމުނާމާއެއްގައި ސޮއިކޮށްފިއެވެ.
މޫސުމާ ބެހޭ ވުޒާރާއިން އެކްސްގައި ކުރި ޕޯސްޓެއްގައިވާގޮތުން، މި އެއްބަސްވުމަކީ ރާއްޖޭގެ ދަތުރުފަތުރުގެ ނިޒާމު ތިމާވެއްޓާ ރައްޓެހި އަދި ދެމެހެއްޓެނިވި ނިޒާމަކަށް ބަދަލުކުރުމަށް ސަރުކާރުން ކުރަމުންދާ މަސައްކަތްތަކަށް އެޅުނު މުހިންމު ފިޔަވަޅެކެވެ.
މި އެއްބަސްވުމުގެ ދަށުން، ކަމާގުޅުންހުރި އެކި ދާއިރާތަކުގެ ފަންނީ މުވައްޒަފުންނަށް އިލެކްޓްރިކް އުޅަނދުތަކާއި ޗާޖިންގ ސްޓޭޝަންތައް މަރާމާތުކޮށް ބެލެހެއްޓުމާ ގުޅޭ ޚާއްޞަ ތަމްރީނުތައް ފޯރުކޮށްދިނުމަށް ވަނީ ހަމަޖެހިފައެވެ.
މި އިސްނެގުމުގެ މައިގަނޑު މަޤްޞަދަކީ ޖީ.އީ.އެފް (ގްލޯބަލް އެންވަޔަރަންމަންޓް ފެސިލިޓީ) ގެ މާލީ އެހީތެރިކަމާއެކު ކުރިއަށްގެންދާ "އިންޓަގްރޭޓެޑް، ސަސްޓެއިނަބަލް އެންޑް ލޯ އެމިޝަންސް ޓްރާންސްޕޯޓް އިން ދަ މޯލްޑިވްސް" (އައިލެޓް) މަޝްރޫޢުގެ ދަށުން ރާއްޖެއަށް ފޯރުކޮށްދޭ އިލެކްޓްރިކް ބަސްތަކާއި އެހެނިހެން އިލެކްޓްރިކް އުޅަނދުތައް ދިގު މުއްދަތަށް ބޭނުންކުރެވޭނެ ގޮތަށް ދެމެހެއްޓުމަށް ބޭނުންވާ ފަންނީ ޤާބިލުކަން އިތުރުކުރުމެވެ.
މީގެ އިތުރުން، މުސްތަޤްބަލުގައި ރާއްޖޭގައި ކުރިއަށްގެންދާ މިފަދަ އިލެކްޓްރިކް މޯބިލިޓީ އަދި ދެމެހެއްޓެނިވި ދަތުރުފަތުރުގެ މަޝްރޫޢުތަކަށްވެސް މި ފަހުމުނާމާގެ ސަބަބުން ޤައުމީ ފެންވަރުގައި ފަންނީ ޤާބިލުކަން އިތުރުވެގެންދާނެ ކަމަށް މޫސުމާ ބެހޭ ވުޒާރާއިން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
