ޞިއްޙަތަށް އިހުމާލުވެ ބޭނުންވާ ޒަރޫރީ ފަރުވާ ދޫކޮށްލުމަކީ އިސްލާމްދީން ހުއްދަކުރާ ކަމެއް ނޫން: ޚުތުބާ

ގަސްދުގައި ހަށިގަނޑަށް ގެއްލުންދިނުމާއި، ނުރައްކާތަކަށް ނަފުސު ހުށަހެޅުމާއި، ޞިއްޙަތަށް އިހުމާލުވެ ބޭނުންވާ ޒަރޫރީ ފަރުވާ ދޫކޮށްލުމަކީ އިސްލާމްދީން ހުއްދަކުރާ ކަމެއް ނޫން ކަމަށް މިއަދުގެ ހުކުރު ޚުތުބާގައި ބުނެފިއެވެ.

ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާ ޚާއްޞަކޮށްފައިވަނީ "ޞިއްޙަތަށް ފަރުވާތެރިވުން" މި މައުޟޫޢަށެވެ.

ޚުތުބާގައި ބުނީ، ދުޅަހެޔޮ ޞިއްޙަތަކީ މާތް الله ދެއްވާފައިވާ މަތިވެރި ނިޢުމަތެއް ކަމަށާއި، އިންސާނާގެ ނަފުސަކީ އެކަލާނގެ ޙަވާލުކުރައްވާފައިވާ މަތިވެރި އަމާނާތެއް ކަމަށެވެ. އެހެންކަމުން ހިތް އެދޭހައި ގޮތަކަށް އެ އަމާނާތް ނަގައިލުމުގެ ޙައްޤު އެއްވެސް މީހަކަށް ލިބިގެން ނުވާކަން ފާހަގަކުރިއެވެ.

މާތް ﷲ ވަޙީކުރައްވައިފައި ވެއެވެ. "އަދި، ތިޔަބައިމީހުންގެ އަމިއްލަ نفسތައް ތިޔަބައިމީހުން قتلނުކުރާށެވެ! ހަމަކަށަވަރުން، ތިޔަބައިމީހުންގެ މައްޗަށް ނުހަނު އޯގާވަންތަ ކަލަކުކަމުގައި الله ވޮޑިގެންވެއެވެ."

ޚުތުބާގައި ބުނީ މާތް الله ދުޅަހެޔޮކަމުގެ ނިޢުމަތް ދެއްވުމަށް ފަހު، އެ ނިޢުމަތާ މެދު ރައްކާތެރިވުމުގެ ޒިންމާ ޙަވާލުކުރައްވާފައިވާކަމަށެވެ.

"ގަސްދުގައި ހަށިގަނޑަށް ގެއްލުންދިނުމާއި، ނުރައްކާތަކަށް ނަފުސު ހުށަހެޅުމާއި، ޞިއްޙަތަށް އިހުމާލުވެ ބޭނުންވާ ޒަރޫރީ ފަރުވާ ދޫކޮށްލުމަކީ އިސްލާމްދީން ހުއްދަކުރާ ކަމެއް ނޫނެވެ."

މީގެ އިތުރުން، މިއަދު ލިބިފައިވާ ބާރާއި ޒުވާންކަމަކީ އަބަދު ދެމިއޮންނާނެ ކަމެއް ނޫން ކަމަށާއި، ހަށިގަނޑުގެ ބާރުދެރަވެ އެހެން މީހުންގެ އެހީއަށް ބޭނުންވާނެ ދުވަހެއް އަންނާނެ ކަމަށް ޚުތުބާގައި ބުންޏެވެ. އަދި ޞިއްޙަތު ރައްކާތެރިކުރުމަކީ އިންސާނާގެ ޒިންމާއެއް ނަމަވެސް، މުސްކުޅިވުމާއި ބަލިމަޑުކަން ހުއްޓުވުމުގެ ބާރެއް އިންސާނާއަށް ލިބިގެން ނުވާކަން ވެސް ހަނދާންކޮށްދިނެވެ.

ކީރިތި ރަސޫލާގެ ޙަދީޘްފުޅެއްގެ މާނަ ބަޔާންކުރަމުން ޚުތުބާގައި ބުނީ، ގިނަ ބަޔަކު ޣާފިލުވެފައިވާ ދެ ނިޢުމަތެއް ވާ ކަމަށާއި އެއީ ޞިއްޙަތާއި ހުސްވަގުތު ކަމަށެވެ.

މިއަދު ފުރިހަމަ ސިއްޙަތެއްގައި ހުރެ، ހެޔޮ ޢަމަލުކުރުމަށް ލިބިފައިވާ ކުޑަ ވަގުތުކޮޅުގެ ބޭނުން ނުހިފައި، ފަރުވާކުޑަކޮށްލެވެނީ ކިތައްކިތައް މީހުންނަށްހެއްޔެވެ؟ މާދަމާ މާތް اللهގެ ޙަޟްރަތުގައި ހުއްޓި ހުންނަ އިރު، އެކަލާނގެ އަމާނާތެއްގެ ގޮތުގައި ދެއްވި ޞިއްޙަތާއި، ދެއްވި ވަގުތާއި، ހަށިގަނޑުގައި ލެއްވި ބާރުގެ ބޭނުންކުރި ގޮތާ މެދު ދޭނީ ކޮންޖަވާބެއްހެއްޔެވެ؟

ޚުތުބާ ނިންމާލަމުން ބުނީ، ދުޅަހެޔޮ ޞިއްޙަތެއްގައި ހުރުމުގެ ހަމައެކަނި ބޭނުމަކީ ބަލިތަކުން ދުރުވެހުރުން ނޫން ކަމަށާއި، އެއީ ޙަލާލު ރަނގަޅު ތަކެތި ކައިބޮއެ، ލިބޭ ބާރާއި ކުޅަދާނަކަމުގެ ބޭނުން ހިފައިގެން މާތް الله އަށް އަޅުކަންކޮށް، ހެޔޮ ޢަމަލުތައް ކުރުމަށް ދެއްވާފައިވާ އަގުހުރި ފުރުޞަތެއް ކަމަށެވެ.