”އިސްލާމް ދީން ޤަބޫލުކުރެއްވުމުން އަލިފާންގަނޑެއްގެ މަތީގައި ހަށިކޮޅު ދެމުމުންވެސް ސާބިތުވެ ހުންނެވި“

އިސްލާމްދީން ޤަބޫލުކުރެއްވުމުން މައްކާގެ މުޝްރިކުން އަލިފާންގަނޑެއް ރޯކޮށް، އޭގެ މަތީގައި ހަށިކޮޅު ދެމުމުން ވެސް ޞަޙާބީ ޚައްބާބު ބިން އަލްއަރައްތު ރަޟިޔަالله ޢަންހު ދީނުގެ މަތީގައި ސާބިތުވެ ހުންނެވި ޢިބުރަތްތެރި ޙާދިސާ މިއަދުގެ ހުކުރު ޚުތުބާގައި ހަނދާންކޮށްދީފިއެވެ.

"އިސްލާމް ދީނުގެ މަތިވެރި ނިޢުމަތް" މި މައުޟޫޢަށް މިއަދު ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ބުނި ގޮތުގައި، އިސްލާމްދީނަކީ މާތް الله އިންސާނިއްޔަތަށް ޓަކައި އިޚުތިޔާރުކުރައްވައި ފުރިހަމަކޮށްދެއްވި އެންމެ މަތިވެރި ނިޢުމަތެވެ. އަދި ދެ ދުނިޔޭގެ ބާއްޖަވެރިކަން ލިބެން އޮތީ މި ދީނުގެ މަތިވެރި އުޞޫލުތަކުގައި ހިފަހައްޓައިގެންނެވެ.

ޚުތުބާގައި ބުނީ، ޙަޤީޤީ މުސްލިމަކީ ކޮންމެފަދަ ބޮޑު ޤުރުބާނީއެއް ވާންޖެހުނަސް ނުވަތަ ކިތަންމެ ބޮޑު އަނިޔާއެއް ލިބުނަސް ޢަޤީދާގައި ސާބިތުވާ މީހެއް ކަމަށެވެ. މިގޮތުން، އިސްލާމީ ތާރީޚުން ވަނީ މިސާލު ދައްކާފައެވެ.

”ކީރިތި ރަސޫލާ ﷺ މުއައްޛިނެއްކަމުގައިވާ بِلَال رَضِيَ الله عَنْهއަށް ކާފިރުން ދެމުންދިޔަ އަނިޔާ އޭގެ އިންތިހާއަށް ދިޔައެވެ. އެކަލޭގެފާނުގެ މޭފުޅު މައްޗަށް ބޮޑެތި ހިލަތައް އަރުވައި މައްކާގެ ހޫނު ހިލަބިމުގައި އެކަލޭގެފާނު ދަމަމުން، އިސްލާމްދީން ދޫކޮށްލުމަށް މަޖުބޫރުކުރިއެވެ. ނަމަވެސް އެކަލޭގެފާނު ސާބިތުކަމާ އެކު ވިދާޅުވަމުން ގެންދެވީ: "أَحَدٌ أَحَدٌ" މިފަދައިންނެވެ. މާނައީ: "މާތް الله އެއްކައުވަންތައެވެ. މާތް الله އެއްކައުވަންތައެވެ."

ހަމަ އެފަދައިން މާތް ޞަޙާބީއެއްކަމުގައިވާ اَلْـخَبَّابُ بْنُ الْاَرَتِّ އިސްލާމްދީން ޤަބޫލުކުރެއްވުމުން އެކަލޭގެފާނަށް ނުހަނު ބޮޑަށް އަނިޔާކުރެވުނެވެ. ނަމަވެސް އެކަލޭގެފާނު އިސްލާމްދީނުގައި ސާބިތުވެ ހުންނެވިއެވެ. މުޝްރިކުން އެކަލޭގެފާނަށް ދިން އަނިޔާތަކުގެ ތެރޭގައި، އަލިފާންގަނޑެއް ރޯކޮށް، އެ އަލިފާންގަނޑުގެ މަތީގައި އެކަލޭގެފާނު ދެމުން ހިމެނެއެވެ. އެ އަލިފާންގަނޑު ނިވުނީ އެކަލޭގެފާނުގެ ބުރަކަށިފުޅުގެ މަސްތައް ފިހިގެން ފޭބި ދިޔައިންނެވެ. މި ހުރިހައިކަމެއް ހިނގައިދިޔަ އިރު ވެސް، އެކަލޭގެފާނު ހުންނެވީ ސާބިތުކަމާ އެކުގައެވެ.

މިއީ އިންތިހާ ދަރަޖައިގެ އަނިޔާއާއި އުނދަގޫތަކާ އެކުގައި ވެސް، ފުރަތަމަ ޖީލުގެ މުސްލިމުން ދީނުގައި ސާބިތުވެ ތިއްބެވި ގޮތުގެ ބައެއް މިސާލުތަކެވެ.

މީގެ އިތުރަށް، މި ދީން ހިމާޔަތްކޮށް ދީނީ ދަޢުވަތު ފެތުރުމަށް މުދަލާއި ފުރާނައިން ސަޙާބީ ބޭކަލުން ޖިހާދުތައް ކުރެއްވި ކަމަށާ، އެ ބޭކަލުންގެ ތެރެއިން އެތައް ސަތޭކަ ބޭކަލުންނެއް ހަނގުރާމައިގެ މައިދާންތަކުގައި ޝަހީދުވެވަޑައިގަތީ، އެ ކަމާ އުފާކުރާ ޙާލުގައިކަން ޚުތުބާގައި ފާހަގަކުރިއެވެ.

އެ ބޭކަލުންގެ ގެދޮރާއި މުދާ ދޫކުރައްވައި، ދީނަށް ނަޞްރުދެއްވުމަށް ޓަކައި ހިޖުރަކުރެއްވިއެވެ. އެއީ اللهގެ ފަޟުލުވަންތަކަމާއި ރުއްސެވުން އެދިވަޑައިގެންނެވެ. އަދި اللهއާއި އެކަލާނގެ ރަސޫލާއަށް ނަޞްރުދެއްވުމުގެ ގޮތުންނެވެ.

ޚުތުބާގައި އިތުރަށް ބުނިގޮތިގައި، މުސްލިމުންނަށް ޢިއްޒަތާއި ޝަރަފު ލިބިފައިވަނީ ހަމައެކަނި އިސްލާމްދީނުގެ ސަބަބުންނެވެ. ޢުމަރުގެފާނު ވިދާޅުވެފައިވާ ފަދައިން، އިސްލާމްދީން ނޫން އެހެން ކަމަކުން ޢިއްޒަތް ހޯދަން މަސައްކަތްކޮށްފި ނަމަ މާތް الله އެބަޔަކު ނިކަމެތިކުރައްވާނެއެވެ.

މިއަދުގެ ހާލަތަށް އަލިއަޅުއްވާލައްވަމުން ޚުތުބާގައި ވަނީ، ދީނީ ކަންކަމަށް ފަރުވާކުޑަކޮށް، ބޭރުގެ ނޭދެވޭ ސަގާފަތްތަކަށް ތަބާވަމުންދާ ދިއުމާމެދު ކަންބޮޑުވުން ފާޅުކޮށްފައެވެ. އަދި ޝިރުކާއި ބިދުޢަތަކުން ދުރުހެލިވެ، ގޭތެރޭގައްޔާއި ބާޒާރުތަކުގައްޔާއި އެންމެހައި މަޖިލިސްތަކުގައި އިސްލާމީ ރިވެތި އުޞޫލުތަކާއި އަޚުލާޤު ދައްކުވައިދިނުމަށް ހުރިހާ މުސްލިމުންނަށް ޚުތުބާގައި ވަނީ ނަޞޭޙަތްތެރިވެފައެވެ.