އިންޑިއާގެ ކޮއިމްބަތޫރުގެ ޝަބާނާ ހުޅުވައިދިނީ އަބާޔާލައި، ނިވާވެ ތިބެގެން ކަސްރަތު ކުރެވޭނެ ޖިމެއް
ދެކުނު އިންޑިއާގެ ޝަހަރެއް ކަމަށްވާ ކޮއިމްބަތޫރުގައި، މުސްލިމް އަންހެނުންނަށް ހިޖާބާއި އަބާޔާ ފަދަ ނިވާކަން ބޮޑު ހެދުމުގައި ތިބެ ފަސޭހަކަމާއެކު ކަސްރަތު ކުރެވޭނެ ހާއްސަ ޖިމެއް ހުޅުވައިފިއެވެ. މިއީ އެ ސަރަހައްދުގައި ހަމައެކަނި އަންހެނުންނަށް ހާއްސަކޮށްގެން ހިންގާ ޖިމެކެވެ.
މި ޖިމް އުފެއްދި ޝަބާނާ، އޭނާގެ މި ދަތުރުގެ ވާހަކަ ބީބީސީ ވޯލްޑް ސާވިސްއަށް ދިން އިންޓަވިއުއެއްގައި ވަނީ ހިއްސާކޮށްފައެވެ. ޝަބާނާ ކިޔައިދިން ގޮތުގައި، މިފަދަ ޖިމެއް ހުޅުވަން އޭނާ ނިންމީ އަމިއްލައަށް ކަސްރަތު ކުރާނެ އެކަށީގެންވާ މާހައުލެއް ނުލިބުމުގެ ސަބަބުންނެވެ.
ކުރިން 140 ކިލޯއަށް ވުރެ ބަރުދަން އިތުރުވެ، ސިއްހީ ގޮތުން އެތައް ގޮންޖެހުންތަކަކާ ކުރިމަތިލާން ޖެހުނު ކަމަށް ޝަބާނާ ބުންޏެވެ. އަދި ސިއްހަތު ރަނގަޅު ކުރުމަށްޓަކައި ބަރުދަން ލުއިކުރުމުގެ މުހިންމުކަމާ މެދު ފިރިމީހާއާ މަޝްވަރާ ކުރުމަށްފަހު، އަމިއްލަ ޖިމެއް ހުޅުވަން ނިންމީއެވެ.
"އަހަންނަށް ކަސްރަތު ކުރާނެ ތަނެއް ނެތުމުން، އަމިއްލަ ޖިމެއް ފެށީ،" ޝަބާނާ ބުންޏެވެ.
އަމިއްލަ ސިއްހަތު ރަނގަޅު ކުރުމުގެ މަގުސަދުގައި ފެށި މި މަސައްކަތް ފަހުން ވެގެންދިޔައީ އެ ސަރަހައްދުގެ އެހެން އަންހެނުންނަށް ވެސް ހުޅުވާލެވުނު ފިޓްނަސް ސެންޓަރަކަށެވެ. އަދި ފަހުން ޝަބާނާ ވަނީ ފިޓްނަސް ޓްރެއިނަރެއްގެ ސަނަދުވެސް ހާސިލުކޮށްފައެވެ.
އާންމު ޖިމްތަކާ ހިލާފަށް، ކަސްރަތު ކުރުމަށް ވަކި ހާއްސަ ހެދުމެއް އެޅުމުގެ ބަދަލުގައި، އާންމުކޮށް ގޭގައި އަޅާ ނިވާކަން ބޮޑު ހެދުމުގައި މި ޖިމްގައި ކަސްރަތު ކުރެވެއެވެ. މިއީ އެތަނަށް ދާ އަންހެނުންނަށް ލިބޭ ވަރަށް ބޮޑު ހިތްހަމަޖެހުމެކެވެ.
ޖިމަށްދާ އަންހެނަކު ބީބީސީއަށް މައުލޫމާތު ދެމުން ބުނީ، މި ޖިމްގައި ހެދުން އެޅުމަކީ އެއްވެސް މައްސަލައެއް ނޫން ކަމަށާއި، ހެދުމުގެ ސަބަބުން އެއްވެސް އުނދަގުލެއް ނުވާ ކަމަށާ، ފަސޭހަ ކަމާއެކު ކަސްރަތު ކުރެވޭ ކަމަށެވެ.
އެހެން އަންހެނަކު ފާހަގަކުރި ގޮތުގައި، ކަސްރަތު ކުރުމުގައި މުޖުތަމައުން އަންހެނުންނާއި ފިރިހެނުންނާ މެދު ދެކޭ ގޮތް ތަފާތެވެ.
"ފިރިހެން ކުއްޖަކު ޖިމަށް ދިއުމުން މީހުން ވަގުތުން އެކަން ބަލައިގަނޭ. އެކަމަކު އަންހެން ކުއްޖަކު ޖިމަށް ދިއުމުން މީހުން އެގޮތަކަށް ނުދެކޭ،" އޭނާ ބުންޏެވެ.
އަދި އަންހެނުން އެމީހުންގެ ޖިސްމާނީ ސިއްހަތަށް ރައްކާތެރިވުމަކީ އިސްލާމްދީން މަނާކުރާ ކަމެއް ނޫން ކަމަށާއި، މިކަމުގައި ދީނީ ގޮތުން އެއްވެސް ހުރަހެއް ނެތް ކަމަށްވެސް އޭނާ ބުންޏެވެ.
ޖިމްގެ ބައިވެރިން ބުނި ގޮތުގައި، ކުރިން އެމީހުންގެ މުޅި ވަގުތު ހޭދަކުރީ ފިރިންނާއި އާއިލާގެ ކަންކަން ބެލެހެއްޓުމުގައެވެ. އޭގެ ސަބަބުން އަމިއްލަ ނަފްސާއި ސިއްހަތާމެދު ވިސްނާނެ ވަގުތެއް ނުލިބެއެވެ. ނަމަވެސް، މި ޖިމްގެ ސަބަބުން ކާނާއާއި ސިއްހަތާ ގުޅޭގޮތުން ކުރިން ނޭނގޭ އެތައް މައުލޫމާތެއް ލިބިގެން ގޮސްފައިވާ ކަމަށް އެމީހުން ބުންޏެވެ.
މި ޖިމް ފެށުމުގައި ޝަބާނާއަށް ބޮޑެތި ގޮންޖެހުންތަކަކާ ކުރިމަތިލާން ޖެހުނެވެ. އެގޮތުން، އަންހެނަކު ހިންގާ ޖިމަކަށް އެއްވެސް މީހަކު ނުދާނެ ކަމަށް ބުނެ ގިނަ ބައެއްގެ ފާޑުކިޔުންތައް އަމާޒުވިއެވެ.
"މީހުން ބުނި އަންހެނަކު ހިންގާ ޖިމަކަށް އެކަކުވެސް ނާންނާނޭ،" ކުރީގެ ހަނދާންތައް އާކުރަމުން ޝަބާނާ ބުންޏެވެ.
އެހެންނަމަވެސް، ޝަބާނާ ދިޔައީ އޭނާގެ އަޒުމުގައި ކުރިއަށެވެ. "އަހަރެން ވިސްނީ ނޭދެވޭ ވާހަކަތަކަށް ބެލުމެއް ނެތި ކުރިއަށްދާން. އެމީހުންނަކީ އަހަންނަށް ކާންދޭ ބައެއް ނޫން. އަހަރެމެން ބޭނުންވީ އެމީހުން ދެއްކީ ދޮގު ވާހަކަތަކެއްކަން ސާބިތުކޮށްދީ ކާމިޔާބު ހޯދަން. މި ސަރަހައްދުގައި ޖިމެއް ހުޅުވީ އެހެންވެ،" ޝަބާނާ ބުންޏެވެ.
ޝަބާނާގެ މި އިސްނެގުމަކީ، އަންހެނުން އެމީހުން ބޭނުންވާ އިސްލާމީ ރިވެތި ހެދުމުގައި ތިބެ، ޖެހިލުންވުމެއް ނެތި ދުޅަހެޔޮ ސިއްހަތެއްގައި ދެމިތިބުމަށް މަގުފަހިކޮށްދީ، މުޖުތަމައުގައި ހުރި ގަބޫލުކުރުންތައް ބަދަލުކޮށްލި ނަމޫނާ މަސައްކަތެއް ކަމަށް މިހާރު އެ ސަރަހައްދުގެ ގިނަ ބަޔަކު ދެކެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
