ސާކް ސައިކިއޭޓްރިކް ފެޑެރޭޝަންގެ 16 ވަނަ ބައިނަލްއަޤްވާމީ ކޮންފަރެންސް ފަށައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިންތިޒާމުކޮށްގެން ބާއްވާ ސާކް ސައިކިއޭޓްރިކް ފެޑެރޭޝަންގެ 16 ވަނަ ބައިނަލްއަޤްވާމީ ކޮންފަރެންސް މާލޭގައި ރަސްމީކޮށް ފަށައިފިއެވެ.

މި ނޮވެމްބަރު މަހުގެ 1 އިން 2 އަށް ކުރިއަށްދާ މި ކޮންފަރެންސް އިފްތިތާޙު ކުރުމުގެ ގޮތުން ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން، ފަސްޓް ލޭޑީ މެޑަމް ސާޖިދާ މުޙައްމަދެވެ.

މި ކޮންފަރެންސަކީ ދެކުނު އޭޝިއާގެ ސަރަޙައްދުގެ ނަފްސާނީ ބަލިތަކާބެހޭ ޑޮކްޓަރުންނާއި، ނަފްސާނީ ދުޅަހެޔޮކަމުގެ ދާއިރާގައި މަސައްކަތްކުރާ ފަރާތްތަކާއި، ދިރާސާވެރިން އަދި އެކަޑަމިކް މާހިރުން އެއްތަނަކަށް ޖަމާވެ، ތަޖުރިބާ ޙިއްޞާކުރުމަށާއި މި ދާއިރާއަށް އަންނަމުންދާ އައު ކުރިއެރުންތަކާ ގުޅޭގޮތުން މަޝްވަރާކޮށް، ނަފްސާނީ ޞިއްޙަތުގެ ޚިދުމަތްތައް ހަރުދަނާކުރުމަށް ބާއްވާ މުހިންމު ބައްދަލުވުމެކެވެ.

އެމްއެންޔޫގެ ނޫސް ބަޔާނުގައި ވާގޮތުން، މި ކޮންފަރެންސްގެ ތެރޭގައި މުހިންމު ކީނޯޓް ދަރުސްތަކާއި، ސިމްޕޯޒިއަމްތަކާއި، ވޯކްޝޮޕްތަކުގެ އިތުރުން ދިރާސީ ކަރުދާސްތައް ހުށަހެޅުން ކުރިއަށްދާނެއެވެ. އެގޮތުން މޫސުމަށް އަންނަ ބަދަލުތަކާއި ނަފްސާނީ ދުޅަހެޔޮކަމާ ހުރި ގުޅުމާއި، އިންސާނިއްޔަތުކަމަށް އިސްކަންދޭ ހަމަހަމަ ނަފްސާނީ ފަރުވާ، ސްކޫލް މާޙައުލުގައި ދެވޭ ޞިއްޙީ އަދި ދުޅަހެޔޮކަމުގެ ޚިދުމަތްތައް، ނިއުރޯސައިކިއޭޓްރީ، އަދި "ޖެނެރޭޝަން ޒެޑް" އަށް ކުރިމަތިވާ ނަފްސާނީ ގޮންޖެހުންތަކާއި ސޯޝަލް މީޑިއާގެ ސަބަބުން ކުރާ އަސަރުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށް ވަނީ ހަމަޖެހިފައެވެ.

ކޮންފަރެންސްގެ ފުރަތަމަ ދުވަހު ބޭއްވި "އެވިޑެންސް، އެމްޕަތީ އެންޑް އިކުއިޓީ އިން މެންޓަލް ހެލްތު ކެއާ އިން ދަ ސާކް ރީޖަން" މި ސިމްޕޯޒިއަމްގައި ދިވެހިރާއްޖެ، ބަންގްލަދޭޝް، އިންޑިއާ، ނޭޕާލް، ޕާކިސްތާން އަދި ސްރީލަންކާއިން ބައިވެރިވިއެވެ. މި ސިމްޕޯޒިއަމްގައި ރާއްޖޭގެ ފަރާތުން ކަރުދާސް ހުށަހަޅުއްވައިދެއްވާނީ ޑރ. ޢާރިފް މުޙައްމަދު އަދި ޑރ. ޢަބްދުﷲ ނާޡިމެވެ. މީގެއިތުރުން، ނަފްސާނީ ބަލިތަކާމެދު މުޖުތަމަޢުގައި ދެކޭ ނުރަނގަޅު ވިސްނުންތަކާއި، އެކަމާ ގުޅޭ ޘަޤާފީ ކަންކަމާ ބެހޭގޮތުންވެސް ސެޝަންތައް ކުރިއަށްދާނެއެވެ.

ދެވަނަ ދުވަހުގެ ސެޝަންތަކުގައި، ޒަމާނީ ފަރުވާގެ ގޮތްތަކާއި، ރިޕެޓިޓިވް ޓްރާންސްކްރޭނިއަލް މެގްނެޓިކް ސްޓިމިއުލޭޝަން (r-TMS)، މަސްތުވާތަކެތި ބޭނުންކުރުމުގެ މައްސަލަތައް، މާބަނޑު ދުވަސްވަރު ދެވޭ ނަފްސާނީ ބޭސްތައް، ދޮށީ ޢުމުރުގެ މީހުންގެ ޑިޕްރެޝަން، އަދި ސިޔާސީ ހަމަނުޖެހުންތަކާއި ކާރިސާތަކުގެ ސަބަބުން ނަފްސާނީ ގޮތުން ކުރާ އަސަރުތަކަށް އަލިއަޅުވާލާނެއެވެ. މީގެ އިތުރުން ޖިންސީ ދުޅަހެޔޮކަމާއި ކައިވެނީގެ ގުޅުންތަކާ ގުޅޭ ޚާއްޞަ ވޯކްޝޮޕްތަކާއި ސިމްޕޯޒިއަމްތައްވެސް ކުރިއަށްދާނެއެވެ.

މި ބައިނަލްއަޤްވާމީ ކޮންފަރެންސް ބޭއްވުމުގެ މައިގަނޑު މަޤްޞަދަކީ ދެކުނު އޭޝިއާގެ ސަރަޙައްދުގައި އެކަޑަމިކް ގުޅުންތައް ބަދަހިކޮށް، ސިއްޙީ ދާއިރާގެ މަޢުލޫމާތާއި ތަޖުރިބާ ޙިއްޞާކުރުމުގެ ފުރުޞަތު ފަހިކޮށްދިނުމެވެ. އަދި ނަފްސާނީ ޞިއްޙަތާމެދު ހޭލުންތެރިކަން އިތުރުކޮށް، ހެކީގެ މައްޗަށް ބިނާވެފައިވާ ފަރުވާގެ ނިޒާމުތައް ކުރިއެރުވުމާއި، އެންމެންނަށް ފަސޭހައިން ލިބޭނެ އޯގާތެރި ނަފްސާނީ ފަރުވާއެއް ކަށަވަރުކުރުމެވެ. މި ކޮންފަރެންސް ނިމޭނީ ނޮވެމްބަރު މަހުގެ 2 ވަނަ ދުވަހު ބާއްވާ ޚާއްޞަ ރަސްމިއްޔާތަކުންނެވެ.