ދިވެހިރާއްޖެއަށް ދީފައިވާ 30 ބިލިއަން ރުޕީސްގެ ކަރަންސީ ސްވަޕް ފެސިލިޓީ އިންޑިއާއިން ރޯލްއޯވަރ ކޮށްދީފި

ދިވެހިރާއްޖެއަށް ދީފައިވާ 30 ބިލިއަން އިންޑިއަން ރުޕީސްގެ ކަރަންސީ ސްވަޕް ފެސިލިޓީ ރޯލްއޯވަރ (މުއްދަތު އިތުރު) ކޮށްދީފިއެވެ. މިކަން ހާމަކޮށްފައިވަނީ ދިވެހިރާއްޖޭގައި ހުންނަ އިންޑިއާގެ ހައިކޮމިޝަނުން ނެރުނު ނޫސްބަޔާނެއްގައެވެ.

މި ފެސިލިޓީއަކީ ސާކް ޤައުމުތަކަށް ޚާއްޞަކޮށްފައިވާ 'ފްރޭމްވޯކް އޮން ކަރަންސީ ސްވަޕް އެރޭންޖްމަންޓް' ގެ ދަށުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2024 ވަނަ އަހަރުގެ އޮކްޓޫބަރު މަހު އިންޑިއާއަށް ކުރެއްވި ފުރަމާނަ ދަތުރުފުޅުގައި ރިޒާވް ބޭންކް އޮފް އިންޑިއާ (އާރްބީއައި) އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާ ދެމެދު ސޮއިކުރެވުނު އެއްބަސްވުމެކެވެ. އަދި މި އެއްބަސްވުމުގެ ދަށުން 30 ބިލިއަން ރުޕީސްގެ ފުރަތަމަ ބައި ރާއްޖެއަށް ދޫކޮށްފައިވަނީ 23 އެޕްރީލް 2026 ގައެވެ.

އިންޑިއާ ހައިކޮމިޝަނުން ހާމަކޮށްފައިވާ ގޮތުގައި، 2024-2027 ގެ ފްރޭމްވޯކް އެރޭންޖްމަންޓްގެ ދަށުން މި ފެސިލިޓީ ފޯރުކޮށްދީފައިވަނީ އިންޓްރެސްޓް ރޭޓާއި އެހެނިހެން ޝަރުޠުތަކުގައި ވެސް ގިނަ ލުއިތަކަކާ އެކުގައެވެ. މި ފްރޭމްވޯކް 2012 ގައި ތަޢާރަފުކުރި ފަހުން، އިންޑިއާގެ އާރްބީއައި މެދުވެރިކޮށް ރާއްޖެއަށް ޖުމްލަ 1.1 ބިލިއަން ޔޫއެސް ޑޮލަރަށްވުރެ ގިނަ ޢަދަދެއްގެ ސްވަޕް އެހީ ވަނީ ފޯރުކޮށްދީފައެވެ.

މީގެއިތުރުން، މާލީ އެހީތެރިކަމުގެ ތެރެއިން އިންޑިއާއިން ވަނީ 250 މިލިއަން ޑޮލަރާއި 100 މިލިއަން ޑޮލަރުގެ ދެ ލޯންގް-ޓާމް ޓްރެޜަރީ ބޮންޑަކަށް ވެސް ސަބްސްކްރައިބް ކޮށްފައެވެ. އަދި އިންޑިއާއިން ސަބްސްކްރައިބް ކުރި 150 މިލިއަން ޑޮލަރުގެ ތިން ޓީ-ބިލެއް ރާއްޖެއިން ދައްކައި ޚަލާޞްކޮށްފައިވާއިރު، އެ ބިލްތަކަށް އެރި އިންޓްރެސްޓްގެ ގޮތުގައިވާ 42.8 މިލިއަން ޑޮލަރު ދައްކައިދީފައިވަނީ އިންޑިއާ ސަރުކާރުންނެވެ. މި ފެސިލިޓީތަކާއި ބޮންޑު އަދި ޓީ-ބިލްތަކަކީ ރާއްޖޭގެ މާލީ ހަމަޖެހުން ދެމެހެއްޓުމުގައި ވަރަށް މުހިންމު ދައުރެއް އަދާކުރި ވަސީލަތްތަކެކެވެ.

އިންޑިއާގެ "ނެއިބަރހުޑް ފަސްޓް" ސިޔާސަތާއި، ސަރަޙައްދީ ސަލާމަތާއި ހުރިހާ ދާއިރާއަކުން ކުރިއެރުން ހޯދުމަށް އެކަށައަޅާފައިވާ "ވިޜަން މަހާސާގަރު" ގެ ދަށުން ރާއްޖެއަށް ޚާއްޞަ އިސްކަމެއް ދީފައިވާ ކަމަށް އެ ގައުމުން ބުނެއެވެ.

ރާއްޖޭގެ ގާތް، އިތުބާރު ހިފޭ ބައިވެރިއެއްގެ ގޮތުގައި ދެޤައުމުގެ ގުޅުން އިތުރަށް ބަދަހިކުރުމަށާއި، ރައީސް ޑރ. މުޙައްމަދު މުޢިއްޒު އިންޑިއާއަށް ކުރެއްވި ދަތުރުފުޅުގައި އެއްބަސްވެވުނު "ކޮމްޕްރިހެންސިވް އިކޮނޮމިކް އެންޑް މެރިޓައިމް ސެކިއުރިޓީ ޕާޓްނަރޝިޕް" ތަންފީޛުކުރުމުގައި އިންޑިއާއިން ދެމިއޮންނާނެ ކަމުގެ ޔަޤީންކަން ވެސް އެ ޤައުމުން ވަނީ އަލުން ދީފައެވެ.