ރާއްޖޭގެ ޑިމޮކްރަސީގެ އިރުވެސް އިއްޔެ އޮއްސިގެން އެދިޔައީ: ޝާހިދު

އިއްޔެ ގާނޫނު އަސާސީއަށް ގެނެވުނު އިސްލާހުތަކާއި އެކު ރާއްޖޭގެ ޑިމޮކްރަސީގެ އިރު އޮއްސިގެން ގޮސްފިކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޝާހިދު ވިދާޅުވީ، އިއްޔެ ރައްޔިތުންގެ މަޖިލީހުން ފާސްކުރި ގާނޫނު އަސާސީގެ އިސްލާހުތަކަކީ އެއްވެސް ޑިމޮކްރެޓިކް ހަމައަކުން ކަންކުރެވިގެންވާނެ ގޮތެއް ނޫންކަމަށެވެ.

"އިއްތިފާގެއް ކަންނޭގެ، އިއްޔެ ރައްޔިތުންގެ މަޖިލީހުން ގާނޫނު އަސާސީއަށް އެބަދަލު ގެންނެވިކަން، ވޯޓް ނަގާ އިއުލާނުކުރެއްވި ވަގުތު އިއްތިފާގު ވެގެން ދިޔައީ އިއްޔެގެ އިރުއޮއްސި މަޣްރިބް ނަމާދަށް ގޮވި ވަގުތަށް. އިރު އަޅުގަނޑަށް ސިފަކުރެވުނީ، ހަމައެކަނި އޮއްސިގެން އެދިޔައީ އިއްޔެގެ އިރެއް ނޫނޭ. ރާއްޖޭގެ ޑިމޮކްރަސީގެ އިރުވެސް އިއްޔެ އެ އޮއްސިގެން ދިޔައިއްޔޭ،"

ޝާހިދު ވިދާޅުވިއެވެ.

2008 ވަނަ އަހަރު ބަލައިގެން ގާނޫނު އަސާސީގެ މަފްހޫމަކީ ރައްޔިތުންނާއި މަޝްވަރާކޮށްގެން ކަންކަން ނިންމުންކަން ފާހަގަކުރައްވާ ޝާހިދު ވިދާޅުވީ، އެގޮތަށް ކަން ކުރުމުގެ ވައްޓަފާޅިިއެއް ހިންގަން ފެށީ 2009 ވަނަ އަހަރުން ފެށިގެން ނަމަވެސް މިހާރު ޤާނޫނުއަސާސީއަށް ގެނަައި ބަދަލުތަކަކީ އެ މަގުން ދިޔަ ކަންކަމެއް ނޫން ކަމަށެވެ.

ޝާހިދު ވިދާޅުވީ، މިހާރު މި ގެނެވުނު ބަދަލާއެކު ރައްޔިިތުންގެ މަޖިލިސް މެދުވެރިކޮށް ރައީސުލްޖުމްހޫރިއްޔާ ބޭނުންފުޅުވެއްޖެނަމަ ރާއްޖޭގެ އަނެއް ދެ ބާރުގެ ވެރިން ބަދަލުކުރެވޭނެކަމަށާއި، ފެނިގެން ދަނީ މަޖިލީހުގެ ރައީސް އަދި އުއްތަމަފަނޑިޔާރުވެސް ރައީސްގެ "މުށުތެރެއަށްލާ" ތަން ކަމަށެވެ.

"މިއަދު މަޖިލީހުގެ ރައީސް ކަންކުރައްވަމުން ގެންދަވަނީ ޕާޓީއަށް ޤަބޫލު ކުރެވޭގޮތަކަށް ނޫނޭ ވިދާޅުވެ ޕާޓީގެ ރައީސް ވަކިކުރައްވައިފި ޙާލަތުގައި ރައްޔިތުންގެ މަޖިލީހުގެ ރައީސްކަމުން އަދި މެމްބަރުކަމުން މަޖިލީހުގެ ރައީސް އޮނަރަބަލް އަބްދުލްރަޙީމް ވަކިވެގެންދާނެ، އިތުރަށް އެއްވެސް ސުވާލެއް މަޖިިލީހުގެ ރައީސް އަބްދުލްރަހީމަށް ކުރެއްވުމުގެ، މަސައްކަތެއް ކުރުމުގެ ފުރުސަތެއްވެސް މިއަދު ނޯންނާނެ، ފެނިގެން އެ ދަނީ މަޖިލީހުގެ ރައީސް ރައީސްގެ މުށުތެރެއަށްލައްވާ މުޅިން ކޮންޓްރޯލް ކުރެއްވިތަން، ހަމަ އެގޮތަށް އުއްތަމަފަނޑިޔާރުވެސް،"

ޝާހިދު ވިދާޅުވިއެވެ.

މިއާއިއެކު، ޝާހިދު ވިދާޅުވީ، މިއީ ޑިމޮކްރަސީ ނޫންކަމަށާއި، އެކަންކަން ދިވެހި ރައްޔިތުން ބަލައި ނުގަންނާނެކަމަށެވެ.