ދިވެހިރާއްޖޭގެ އިން، ބެލެހެއްޓުމަށް ގެނައި ޑްރޯންގެ އޮޕަރޭޝަން މިރޭ ފަށަނީ

ދިވެހިރާއްޖޭގެ އިގުތިސާދީ ސަރަހައްދު ބެލެހެއްޓުމުގެ މަސައްކަތް ދިވެހިން ކުރުމަށްޓަކައި، ގެނެސްފައިވާ އަސްކަރީ ޑްރޯންގެ އޮޕަރޭޝަން މިރޭ ފަށަން ސަރުކާރުން ތައްޔާރުވެއްޖެއެވެ.

ދިވެހިރާއްޖޭގެ ކަނޑުގެ ސަރަހައްދު ބެލެހެއްޓުމުގެ ގާބިލްކަން ދިވެހިންގެ ކިބާގައި އުފައްދައި، އެ މަސައްކަތް ކުރާނީ ދިވެހިން ކަމުގައި ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވަނީ މީގެ ކުރިން ވިދާޅުވެފައެވެ.

“ކަނޑުގެ އަޑިޔާއި، ވަޔާއި، ކަނޑާއި، އެއްގަމާ، ހުރިހާ ތަނެއްވެސް، އަމިއްލަ ފައިމައްޗަށް ތެދުވެ، އަމިއްލައަށް އަޅުގަނޑުމެން ބަލަހައްޓާނީ. އަމިއްލައަށް އެކަން ކުރާނީ. އިރާދަކުރެއްވިއްޔާ އަމިއްލަވަންތަ، މިނިވަން ޤައުމެއްގެ ގޮތުގައި މި ޤައުމު ދަމަހައްޓާނީ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚތާބުގައި ވިދާޅުވިއެވެ.

އެފަހުން ރ މީދޫގައި ބޭއްވުނު ޖަލްސާގައިވެސް އެމަނިކުފާނު ވަނީ ރާއްޖޭ ކަނޑުގެ ސަރަހައްދު 24 ގަޑިއިރު ބެލެހެއްޓުމުގެ މަސައްކަތް މި މާޗު މަހު ފަށްޓަވާނެ ކަމަށް ވިދާލުވެފައެވެ.

ރައީސް މުޢިއްޒު ވިދާލުވިފަދައިން އެކަމަށްޓަކައި ދާދިފަހުން ވަނީ ތުރުކީވިލާތުން އަސްކަރީ ޑްރޯން ގެނެސް ނ. މާފަރު އެއާޕޯޓްގައި ޑްރޯން ދުއްވުމުގެ ޓެސްޓް ބުރުތަކެއް ވެސް ކުރިއަށް ގެންގޮސްފައެވެ.

އަދި ޑްރޯން އޮޕަރޭޝަން އިފްތިތާހުކުރުން ކުރިއަށްގެންދިއުމަށް ހަމަޖެހިފައިވަނީވެސް މާފަރު އިންޓަރނޭޝަނަލް އެއާޕޯޓްގައެވެ. މައުލޫމާތު ލިބުފައިވާ ގޮތުގައި ރާއްޖޭގައި ޑްރޯން މަރުކަޒު ގާއިމްކޮށްފައިވަނީވެސް ނ. މާފަރު އެއަރޕޯޓުގައެވެ.

ރާއްޖޭގެ އިން ބެލެހެއްޓުމަށް ފަށާ މި އޮޕަރޭޝަނުގައި ދިވެހި ސިފައިންނާއެކު ތުރުކީގެ އޮފިޝަލުން ބައިވެރިވާއިރު، ޑްރޯނަށް ދިވެހި ސިފައިން އަހުލުވެރި ކުރުވުމާއި، ތަމްރީންތައް ފޯރުކޮށްދެނީ ތުރުކީގެ އޮފިޝަލުންނެވެ. އެކަމަށްޓަކައ ދިވެހި ސިފައިންގެ ބައެއް އޮފިސަރުން ވަނީ ތުރުކީއަށްގޮސް ޑްރޯން ބޭނުންކުރާނެ ގޮތުުގެ ތަމްރީނުގައިވެސް ބައިވެރިވެފައެވެ.

ދިވެހިރާއްޖޭ އިން 974000 އަކަ ކިލޯމީޓަރަށް ދެމިގެންދާއިރު އެ ސަރަހައްދު ބެލެހެއްޓުމަށް ރާއްޖެއަށް ގެނެސްފައިވަނީ "ބައިރަކްތާރު ޓީބީ2″ ގެ ޑްރޯންކަމަށް މައުލޫމާތު ލިބެއެވެ. ބައިރަކްތާރު ޓީބީ2" ޑްރޯނަކީ 18،000 އަދި 25،000 ފޫޓު މަތިން އުދުއްސޭނެ އުޅަނދުތަކެކެވެ. 70 އާއި 120 ކިލޯމީޓަރާ ދެމެދުގެ ބާރުމިނުގައި އުދުހެވޭ މި އުޅަނދުތަކަކީ ނައިޓް ވިޝަން ކޭޕަބިލިޓީ އާއެކު ރޭގަނޑުވެސް ވަގުތުން ފޮޓޯއާއި ވީޑިއޯ ފޮނުވޭނެ އުޅަނދެކެވެ. ހަމައެއާއެކު 300 ކިލޯމީޓަރު ދުރުން މައިމަރުކަޒަށް މައުލޫމާތު ފޯރުކޮށްދިނުމުގެ ގާބިލްކަން ލިބިފައިވާ މި ޑްރޯންތަކަށް ހުއްޓުމެއް ނެތި 27-50 ގަޑިއިރު އުދުހުމުގެ ގާބިލްކަން ވެސް ލިބިފައިވެއެވެ. އަދި ބޭނުންނަމަ ހަތިޔާރު ހަރުކުރެވޭ މި ޑްރޯންގެ ބޮޑުމިނަކީ 21 ފޫޓެވެ.