ޤައުމީ ތަރައްޤީގެ 20 އަހަރުގެ ޕްލޭން ޖެނުއަރީމަހު އިފްތިތާހްކުރަނީ

މިހާރު އެކުލަވާލުމުގެ މަސައްކަތް ފަށާފައިވާ ދިވެހިރާއްޖޭގެ ޤައުމީ ތަރައްޤީގެ 20 އަހަރުގެ ޕްލޭން އަންނަ ޖެނުއަރީމަހު އިފްތިތާހްކުރެވޭވަރު ވާނޭކަމަށް ސަރުކާރުން ހާމަކޮށްފިއެވެ.

މިނިސްޓްރީ އޮފް ފިނޭންސް އެންޑް ޕްލޭނިންގ އިން މިއަދު ވަނީ ދިވެހިރާއްޖޭގެ ކުރިއަށް އޮތް 20 އަހަރުގެ ޤައުމީ ތަރައްޤީގެ ޕްލޭން ތައްޔާރުކުރުމުގެ މަސައްކަތް ކުރިއަށްދާގޮތާ ބެހޭ މައުލޫމާތު ރާއްޖޭގެ މީޑިއާތަކާ ހިއްސާކޮށްފައެވެ. "ވިލުންތެރި ރާއްޖެ 2045" ގެ ނަމުގައި މިހާރު ފަށާފައިވާ ޤައުމީ ތަރައްޤީގެ ޑްރާފްޓިން މަސައްކަތް ފަށާފައިވާއިރު، މި މަސައްކަތުގެ ފުރަތަމަ ޕައިލެޓް ޕްރޮގްރާމް ފަށާފައިވަނީ އިއްޔެ ކ.ގުރައިދޫންނެވެ. އެއަށްފަހު ކުރިއަށްއޮތް ހަފްތާގެ ތެރޭގައި އަތޮޅުަކުގެ ރަށްތަކަށް ޓީމްތައް ޒިޔާރަތްކުރާނޭކަމަށް މާލީ ވުޒާރާގެ ޕްލޭނިން ޑިމާޓްމަންޓުން ވަނީ ބުނެފައެވެ.

މި މަސައްކަތް ސަރުކާރުން ހަވާލުކޮށްފައިވަނީ، ނެކްސިއާ މޯލްޑިވްސްއާ އެވެ. މަސައްކަތް ރާވާފައިވާގޮތަށް ކުރިއަށްދާނަމަ، އަންނަ ޖެނުއަރީމަހު ޤައުމީ ތަރައްޤީގެ 20 އަހަރުގެ ޕްލޭން އިފްތިތާހްކޮށް، މުޅި މަސައްކަތްތައް ޖޫންމަހުގެ ތެރޭގައި ނިންމާލެވޭނޭކަމަށް ސަރުކާރުން ބުނެއެވެ.

ތަރައްޤީގެ ޕްލޭން ތައްޔާރުކުރުމަށް 10 ޓީމަކުން އަތޮޅުތެރޭގައި ހަރަކާތްތެރިވުމަށް ނިންމާފައިވާއިރު، ތިން ހަފްތާތެރޭގައި މީހުން ދިރިއުޅޭ 180 ރަށުގެ މީހުންނާ ބައްދަލުކޮށް މައުލޫމާތު ނެގިގެންދާނޭކަމަށް މި މަސައްކަތް ކުރިއަށްގެންދާ ފަރާތުން ބުނެއެވެ. ރައްޔިތުންގެ ފަރާތުން ނެގޭ މައުލޫމާތުތަކުގެ ތެރޭގައި އުމްރާނީ އަދި އިގްތިސާދީގޮތުން އެމީހަކު ދިރިއުޅެމުން އަންނަ ރަށް އޮންނަން ބޭނުންވާ ގޮތާ ގުޅޭގޮތުން އެރަށެއްގައި ދިރިއުޅެމުންދާ މީހުންގެ ހިޔާލުހުރިގޮތް ނެގިގެންދާނެއެވެ.

"ވިލުންތެރި ރާއްޖެ 2045" ގެ ނަމުގައި 2025 އިން 2045 އަށް އަމަލު ކުރަން ރާވާ 20 އަހަރު ދުވަހުގެ ގައުމީ ތަރައްގީގެ މި ޕްލޭނަކީ އެކުލަވާލުމުގައި ރާއްޖޭގެ ވީހާ ގިނަ ފަރާތްތަކެއްގެ ޚިޔާލާއި ބައިވެރިވުން ހޯދުމަށް ކުރަމުންގެންދާ މަސައްކަތްތަކުގެ ތެރެއިން އެއް މަސައްކަތެއްކަމަށް ސަރުކާރުން ބުނެއެވެ. މި ޕްލޭނަކީ 2040 ވަނަ އަހަރު އަންނަ އިރު, ދިވެހިރާއްޖެއަކީ ތަރައްގީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކުރައްވަމުންގެންދަވާ މުހިންމު މަސައްކަތްޕުޅެކެވެ.

20 އަހަރު ދުވަހުގެ ޤައުމީ ތަރައްގީގެ ޕްލޭނެއް އެކުލަވާލުމުގެ ބޭނުމަކީ ޤައުމުގައި ކުރެވޭ އެންމެހައި ކަންކަމަކީ ދުރު ރާސްތާއަށް ވިސްނައިގެން، ލިބެންހުރި ވަސީލަތްތަކުގެ ބޭނުން, ދެމެހެއްޓެނިވި ގޮތެއްގައި ހިފައިގެން، ޤައުމަށާއި ރައްޔިތުންނަށް އެންމެ ފައިދާކުރަނިވި ގޮތެއްގައި ކަންކަން ކުރަން މަގުފަހިކުރުމެވެ. އަދި ދުނިޔޭގެ އިޤްތިޞާދަށާއި ޓެކްނޮލޮޖީއަށް އަންނަ ބަދަލުތަކާއި އަދި ވަކިން ޚާއްސަކޮށް މޫސުމަށް އަންނަ ބަދަލުތަކާ ކުރިމަތިލުމާއި އެކަންކަމުން އަރައިގަނެވޭނެ ޤާބިލުކަން ހުރި ވިލުންތެރި ރާއްޖެ އެއް ބިނާކުރުންކަމަށް ސަރުކާރުން ފާހަގަކުރެއެވެ.