ބަންގްލަދޭޝްގެ އާ ސަރުކާރު ހުވާކުރުމުގެ ރަސްމިއްޔާތަށް ރައީސް މުޢިއްޒަށް ދަޢުވަތު އަރުވައިފި
ލިޔުންތެރިޔާ
ޚަދީޖާ އަރުފާ
ބަންގްލަދޭޝްގައި އަލަށް އުފެދޭ ބަންގްލަދޭޝް ނޭޝަނަލިސްޓް ޕާޓީ (ބީ.އެން.ޕީ) ގެ ސަރުކާރު ހުވާކުރުމުގެ ރަސްމިއްޔާތަށް، ދިވެހިރާއްޖެ ހިމެނޭހެން ދުނިޔޭގެ 13 ޤައުމެއްގެ ވެރިންނަށް އެ ޤައުމުން ދަޢުވަތު އަރުވައިފިއެވެ.
މި ދަޢުވަތު އަރުވާފައިވަނީ ބަންގްލަދޭޝްގެ ވަގުތީ ސަރުކާރުގެ ޗީފް އެޑްވައިޒަރު މުޙައްމަދު ޔޫނުސްއެވެ.
އަންނަ އަންގާރަ ދުވަހު ބޭއްވުމަށް ހަމަޖެހިފައިވާ މި ރަސްމިއްޔާތުގައި، ބީ.އެން.ޕީގެ ޗެއަރޕަރސަން ތާރިޤް ރަޙްމާން ބޮޑުވަޒީރުކަމުގެ ހުވާ ކުރައްވާނެއެވެ.
މި ރަސްމިއްޔާތަށް ދަޢުވަތު ދީފައިވާ ޤައުމުތަކުގެ ތެރޭގައި ރާއްޖޭގެ އިތުރުން ދެން ހިމެނެނީ؛
އިންޑިއާ
ޗައިނާ
ސައުދީ އަރަބިއްޔާ
ތުރުކީ
ޕާކިސްތާން
ޔޫނައިޓެޑް އެރަބް އެމިރޭޓްސް
ޤަޠަރު
މެލޭޝިއާ
ބުރުނާއީ
ސްްރީލަންކާ
ނޭޕާލް
ބޫޓާން
މި ރަސްމިއްޔާތު ބޭއްވުމަށް ހަމަޖެހިފައިވަނީ އެ ޤައުމުގެ ޤައުމީ މަޖިލީހުގެ ދެކުނު ޕްލާޒާގައެވެ.
ބީ.އެން.ޕީގެ އިސް ލީޑަރެއް ކަމަށްވާ އޭ.އެން.އެމް އިޙްސާނުލް ޙައްޤު މިލާން ހޮނިހިރު ދުވަހު ވިދާޅުވީ، އެ ޕާޓީގެ ޚާރިޖީ ސިޔާސަތަކީ "އެންމެންނާ އެކުވެރިކަން ބޭއްވުން، އަދި އެއްވެސް ބަޔަކަށް ރުޅިވެރިކަމެއް ނުބޭއްވުން" ކަމަށެވެ.
2024 ވަނަ އަހަރުގެ ބޮޑު އިޙްތިޖާޖުތަކަށްފަހު ކުރީގެ ބޮޑުވަޒީރު ޝެއިޚް ޙަސީނާގެ ވެރިކަން ވެއްޓުނު ފަހުން ބޭއްވި ފުރަތަމަ އިންތިޚާބު ކަމަށްވާ 2026 ވަނަ އަހަރުގެ ޢާންމު އިންތިޚާބުގައި ބީ.އެން.ޕީން ވަނީ ބޮޑު ކާމިޔާބީއެއް ހޯދާފައެވެ.
300 ގޮނޑީގެ މައްޗަށް އެކުލެވޭ މަޖިލީހުން ސަރުކާރު އުފެއްދުމަށް ބޭނުންވާ 151 ގޮނޑިއަށްވުރެ ގިނަ ގޮނޑި އެ ޕާޓީން ވަނީ ކާމިޔާބުކޮށްފައެވެ. މި އިންތިޚާބުގައި އެންމެ ބޮޑު އިދިކޮޅު ޕާޓީއަކަށް ވެފައިވަނީ ޖަމާޢަތު އިސްލާމީ އެލަޔަންސްއެވެ.
ފެބްރުއަރީ 12 ގައި ބޭއްވި މި އިންތިޚާބުގައި ވޯޓުލީ މީހުންގެ ނިސްބަތަކީ 59 އިންސައްތައެވެ. އިންތިޚާބުގެ އިތުރުން، ވެރިކަން ހިންގުމުގެ ނިޒާމަށް ގެންނަ އިޞްލާޙުތަކާ ގުޅޭ ދުސްތޫރީ ފެންނަ ނުފެންނަ ވޯޓެއްވެސް މި އިންތިޚާބާ އެކު ވަނީ ކުރިއަށް ގެންގޮސް ކާމިޔާބުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
