އެސްއެމްއީ ބޭންކާއި އެކު އިގްތިސާދަށް އިންގިލާބީ ބަދަލުތަކެއް އަންނާނެ: ރައީސް ސޯލިހު

މިއަދު އިފްތިތާހުކުރެވިގެންދިޔަ އެސްއެމްއީ ބޭންކާއި އެކު ރާއްޖޭގެ އިގްތިސާދަށް އިންގިލާބީ ބަދަލުތަކެއް އަންނާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އެސްއެމްއީ ބޭންކްގެ ހިދުމަތް ފެށުމަށް މިއަދު ކުރިއަށް ދިޔަ ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ ރައްޔިތުންނަށްޓަކައި ޚިދުމަތް ކުރަން ނުކުންނަ ކޮންމެ ދުވަހަކީ، އެ ރައްޔިތުންނަށް ވެފައިވާ ވަޢުދުތައް، ކުރިމަތިން ތަމްސީލުވަމުންދާ ދުވަހެއްކަމަށާއި އެގޮތުން ކުދި އަދި މެދު ފަންތީގެ ވިޔަފާރިތަކަށް ޚާއްޞަކޮށްގެން އެސް.އެމް.އީ ބޭންކެއްގެ ޚިދުމަތް ފެށުމަކީ، މި ސަރުކާރުގެ ފުރަތަމަ މަސައްކަތު 100 ދުވަހުގެ ތެރޭގައި ކުރުމަށް އަޅުގަނޑުމެން ކަނޑައެޅި އެއް ކަންތައްކަމަށެވެ.

ރައީސް ސޯލިހު ވިދާޅުވީ މިއަދު މި ފެށިގެންދާ އެސް.އެމް.އީ ބޭންކުގެ ޚިދުމަތާއެކު، ޒުވާން އެތައް ވިޔަފާރިވެރިންނެއް އުފެދިގެންދާނެކަމަށެވެ. އަދި ދިވެހި އަންހެނުންގެ ހުނަރުވެރި އުފެއްދުންތަކުން، ޤައުމީ އިޤްތިޞާދަށް އިންޤިލާބީ ބަދަލުތަކެއް ގެނުވާނެކަމަށް އެމަނިކުފާނު ފާހަގަކުރެއްވިއެވެ.

މިއަދުގެ ވާހަކަފުޅުގައި ރައީސް ވަނީ ރާއްޖޭގެ ވިޔަފާރީގެ %93 އަކީ ކުދި އަދި މެދުފަންތީގެ ވިޔަފާރިއަށް ވާއިރު، އެއީ އިގްތިސާދުގެ މައިބަދަކަމަށް ސިފަކުރައްވާފައެވެ.

"އެސްއެމްއީ ލޯންގެ ވަކި ބައެއް އަޅުގަނޑުމެން ޚާއްޞަކޮށްފައިވާނީ، އަންހެނުންނަށާއި ޒުވާނުންނަށް އަދި ނުކުޅެދުންތެރިކަން ހުންނަ މީހުންނަށް. އެހެންކަމުން، އެސް.އެމް.އީ ލޯނަކީ، މުޅި ޤައުމުގެ ތިން ބައިކުޅަ ދެބަޔަށް ވުރެ ވެސް ގިނަ މީހުންނަށް އެހީތެރިވެދޭނެ ލޯން ސްކީމެއް"، ރައީސް ވިދާޅުވިއެވެ.