ހެރިޓޭޖްގެ މުޝީރުންގެ ގޮތުގައި ހަތަރު ފަރާާތެއް އައްޔަންކުރައްވައިފި

ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ހެރިޓޭޖް މިނިސްޓްރީގެ މުޝީރުންގެ ގޮތުގައި ހަތަރު ބޭފުޅަކު އައްޔަންކުރައްވައިފިއެވެ.

މުޝީރުންގެ ގޮތުގައި އައްޔަންކުރައްވާފައިވަނީ، ނިޝާން އިއްޒުއްދީނުގެ އިއްޒަތުގެވެރިޔާ ނަސީމާ މުހައްމަދުކަލޭފާނު، ހ. މާގިރި، ނިޝާން އިއްޒުއްދީނުގެ އިއްޒަތުގެވެރިޔާ އަބްދުﷲ ސޯދިގު، ހ. އާމުލީގެ، ނިޝާން އިއްޒުއްދީނުގެ އިއްޒަތުގެވެރިޔާ އައްބާސް އިބްރާހީމް، މ. ސިލްވަރކްލައުޑް، އަދި މ. މަޑުލު މުހައްމަދު ވަހީދެވެ.

މި ހަތަރު ބޭފުޅުންގެ މަގާމު ހަވާލުކުރުމުގެ ގޮތުން ބޭއްވި ރަސްމިއްޔާތު އޮތީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ.

މި ރަސްމިއްޔާތުގައި ރައީސް ސޯލިހު ވަނީ، އެ ބޭފުޅުންނާއި ބައްދަލުކުރައްވައި ރާއްޖޭގެ ތާރީހާއި ސަގާފަތް ދިރުވާއާލާކުރުމުގެ މަސައްކަތުގައި، ހެރިޓޭޖަށް ބޭނުންވާ ފަންނީ ލަފަޔާއި އިރުޝާދުގެ އިތުރުން، މުޝީރުންނަށް ލިބިވަޑައިގެންފައިވާ ތަޖުރިބާގެ ބޭނުން ހިފައިގެން ދިވެހީންގެ ތަރިކަ އަންނަން އޮތްޖީލުތަކަށް ފެންނާނެ ފަދައިން ރައްކާތެރިކުރެއްވުމަށް މުހިއްމު މަސައްކަތްތަކެއް ކޮށްދެވާނެ ކަމަށް އުއްމީދު ކުރައްވާކަމުގައި ވިދާޅުވިއެވެ.

މިބައްދަލުކުރެއްވުމުގައި، މުޝީރުންގެ ގޮތުގައި އައްޔަންކުރައްވައި، ދެއްވި ފުރުސަތަށްޓަކައި ރައީސުލްޖުމްހޫރިއްޔާއަށް ޝުކުރު އަދާކުރައްވާފައެވެ. އެބޭފުޅުން ވަނީ މި މަސައްކަތް ކުރުމުގައި އެބޭފުޅުންގެ ލަޔާގަތާއި ގާބިލުކަންހުރި މިންވަރަކުން އެ މަސައްކަތް ކޮށްދެއްވާނެ ކަމުގައި ވިދާޅުވެފައެވެ.