ރާއްޖެ ބޮއިކޮޓް ކުރި އިންޑިއާގެ އީޒްމައިޓްރިޕްއަށް 15 ކްރޯޑް ގެއްލުންވުމުން ސަސްޕެންޝަން އުވާލައިފި

ދިވެހިރާއްޖޭގެ ޓޫރިޒަމް ބޮއިކޮޓް ކުރުމަށް އިންޑިއާގެ ހުރިހައި މީޑިއާއެއް އެއްގަލަކަށްއަރައި ހިންގި ވަރުގަދަ ކެމްޕޭންތެރޭގައި އެންމެ ވަތަނީގޮތަކަށް ރާއްޖެ ބޮއިކޮޓްކުރި  ޓްރެވަލް އެޖެންސީއެއްކަމަށްވާ "އީޒްމައިޓްރިޕް" އިން އަޑެއްބަޑެއް ނީއްވައި ހަމަހިމެނޭނުން ތިބެ އަނެއްކާވެސް ރާއްޖެއަށް ބުކިން ހަދައިދޭން ފަށައިފިކަމަށް އިންޑިއާގެ މީޑިއާތަކުން ބުނެފިއެވެ.

ހިންދުސްތާން ޓައިމްސްއިން ރިޕޯޓްކޮށްފައިވާ ގޮތުގައި މިދިޔަ ހަފްތާގައި އީޒްމައިޓްރިޕް އިން ރާއްޖެއަށް ދަތުރުކުރަން ފްލައިޓާއި ހޮޓެލްސް ބުކް ކުރަން ހުޅުވާލާފައިވާ ކަމަށެވެ.

ރައީސް ޑޮކްޓަރ މުޙައްމަދު މުއިއްޒު އިންތިޚާބުވެވަޑައިގެން ރާއްޖޭގައި އެމްޑީޕީ ސަރުކާރުން ހުއްދަދީގެން އައިސް ތިބި އިންޑިއާ ސިފައިން ރާއްޖެއިން ފޮނުވާލުމަށް މަސައްކަތް ފެއްޓެވުމާއި އަދި އެމަނިކުފާނުގެ ފުރަތަމަ ރަސްމީ ދަތުރުފުޅު އިންޑިއާގެ ބަދަލުގައި ތުރުކީއަށް ވަޑައިގެން އަދި ދެވަނަ ދަތުރުފުޅު ޗައިނާއަށް ޝެޑިއުލް ކުރެއްވުމާއެކު އިންޑިއާގެ ސޯޝަލް މީޑިއާގައި ދިވެހި ރާއްޖެ ބޮއިކޮޓް ކުރުމުގެ ވަރުގަދަ ކެމްޕެއިނެއް ފެށުނެވެ.

މިކެމްޕެއިން ފެށުނީ ރައީސް މުއިއްޒު ޗައިނާއަށް ފުރާވަޑައިގަތުމުގެ ދެތިން ދުވަސް ކުރިން ކުއްލިގޮތަކަށް އިންޑިއާގެ ބޮޑުވަޒީރު އެގައުމުގެ ލަކްޝައްދީބުގެ ޖަޒީރާ ރަށްތަކަކަށް ޒިޔާރަތް ކުރައްވައި މޫނުމަތި އަޅުއްވައިގެން މޫދަށް އެރިވަޑައިގެންނާއި ގޮނޑުދޮށުގައި ހިންގަވައި އެރަށްތައް ޕްރޮމޯޓްކުރެއްވުމުގެ ވީޑިއޯއަކާއި ފޯޓޯތަކެއް ސޯޝަލް މީޑިއާއަށް ދޫކޮށްލެއްވުމާއެކުއެވެ. މިއާއެކު އިންޑިއާގެ ސޯޝަލް މީޑިއާ އެކްޓިވިސްޓުން ދިވެހި ރާއްޖެ ބޮއިކޮޓް ކުރުމަށް ކެމްޕެއިން ފެށިއެވެ.

މިކެމްޕެއިން އިތުރަށް ހޫނުވީ ސަރުކާރަށް ނިސްބަތްވާ ރާއްޖޭގެ ސޯޝަލް މީޑިއާ އެކްޓިވިސްޓުން ތަކެއް ބޮޑުވަޒީރު މޯދީއަށް ނިސްބަތްކުރައްވައި ޕޯސްޓްތަކެއް ކުރެއްވުމުންނެވެ. އިންޑިއާގެ މީޑިއާއިން މިކަން ސިފަކުރީ މުޅިއިންޑިއާއަށް ދިން ހަމަލާއެއްގެ ގޮތުގައެވެ.

އެންމެ ވަރުގަދައަށް އަޑުއަރައިގެން ދިޔައީ ބޮޑުވަޒީރުގެ އިއްޒަތާއި ޝަރަފާއި ގައުމަށްޓަކައި އީޒްމައިޓްރިޕުން ރާއްޖެ ސަސްޕެންޓް ކުރުމުގެ ގޮތުން އެޓްރެވަލް އެޖެންސީގެ އެކްސެސް ކަނޑާލުމުންނެވެ.

އެއީ ނަމޫނާ ހިތްވަރުގަދަ އަދި ރާއްޖެއަށް ރަނގަޅު ފިލާވަޅެއް ދެވުނު ކަމެއްކަމަށް އިންޑިއާގެ މީޑިއާތަކުން ސިފަކޮށްހެދިއެވެ.

އެޓްރެވަލް އެޖެންސީން ރާއްޖެ ސަސްޕެންޑް ކުރިކަމަށް އިއުލާންކުރީ  ޖެނުއަރީ އަށްވަނަ ދުވަހުއެވެ. އެއަށްފަހު މިދިޔަ މުއްދަތުގެތެރޭގައި މިކުންފުންޏަށް 15 ކްރޯޑް ރުޕީސްގެ ބޮޑުގެއްލުމެއް ލިބިފައިވާ ކަމަށް އިންޑިއާގެ މީޑިއާތަކުން ރިޕޯޓްކޮށްފައިވެއެވެ.

އީޒްމައިޓްރިޕުން ސަސްޕަންޝަން އުވާލިވާހަކަ ސޯޝަލް މީޑިއާގައި ދައްކަން ފެށުމުން އެކުންފުނިން ބުނެފައިވަނީ އަދި އުވާނުލާކަމަށެވެ.

ކުރިންވެސް މިކުންފުނިން އުޅުނީ ރާއްޖޭގެ ނަން ބޭނުންކޮށްގެން އަމިއްލައަށް މަޝްހޫރުވާން ކަމަށް ބައެއް ފަރާތްތަކުން އެދުވަސްވަރު ކިޔައި އުޅުނެވެ. އެކަމަކު މިކުންފުންޏާއިމެދު ހަމްދަރުދީވާ މީހުން މިހާރުބުނަނީ ތާއަބަދު ބޮއިކޮޓް އަޅުވައިގެން ތިބޭކަށްވެސް ނުޖެހޭ ކަމަށެވެ.

ކޮންމެއަކަސް އިންޑިއާގެ މީޑިއާތަކުން ދިވެހިރާއްޖޭގެ ޓޫރިޒަމް ބޮއިކޮޓް ކުރުމަށް ހިންގި ވަރުގަދަ ކެމްޕެއިނަށްފަހު ކުރިން އެއްވަނާގައި އޮތުމަށްފަހު އިންޑިއާއިން ރާއްޖެ އަންނަ ފަތުރުވެރިން ދަށްވަމުންގޮސް އަށްވަނަ އަށް ވެއްޓިފައި ވެއެވެ.

އެކަމަކު އިންޑިއާގެ ބައެއް ފަރާތްތަކުން ހީކުރިގޮތަށް ރާއްޖޭގެ ފަތުރުވެރިކަން ކުޑަކަކޫމައްޗަށް ތިރިކޮށެއް ނުލެވުނެވެ. ސަބަބަކީ ފެށުނީއްސުރެވެސް ރާއްޖޭގެ ޓޫރިޒަމް ޑިޒައިންކުރެވި ޕްރޮމޯޓްކުރެވިފައި އޮތީ ޔޫރަޕްގެ މުއްސަނދި ފަތުރުވެރިންނަށްކަމަށްވުމާއެކު އެފަތުރުވެރިން އަންނަ އައުމަކަށް ބަދަލެއް ނާންނަ ކަމެވެ. ޗައިނާއާއި އިންޑިއާ މާކެޓަކީ މާފަހުން ޕްރޮމޯޓްވަމުން އަންނަ ދެމާކެޓެވެ.

ދިވެހިރާއްޖޭގެ ޓޫރިޒަމް ބޮއިކޮޓް ކުރުމަށް އިންޑިއާގައި ހިންގި ކެމްޕެއިން މިހާރުވަނީ ހިނދިފައެވެ. އެމްޑީޕީގެ ވެރިކަން ނިމި އެރި ލޮޅުންގަނޑަށްފަހު ދެގައުމުގެ ގުޅުން އަލުން ރަނގަޅުވާންވެސް ވަނީ ފަށާފައެވެ.