ނޮވެމްބަރު 3 ގެ ޝަހީދުވި އާއިލާތަކަށް އެލަވަންސެއްދީ، ބޯހިޔާވަހިކަންދެނީ

ނޮވެމްބަރު 3 ގެ ޝަހީދުވި އާއިލާތަކަށް އެލަވަންސެއްދީ، ބޯހިޔާވަހިކަންދޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ނަސްރުގެ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، 1988 ވަނަ އަހަރުގެ ނޮވެމްބަރުމަހުގެ 3 ވަނަ ދުވަހު ރާއްޖެއަށް ކުރިމަތިވި އުދުވާނުގައި ޝަހީދުވި އާއިލާތަކަށާއި، ހާއްސަ މެޑަލް ލިބިލެއްވި ފަރާތްތައް ހިމެނޭހެން ދެމެހެއްޓެނިވި ގޮތެއްގައި އެލަވަންސެއް ދޭނޭކަމަށެވެ. އަދި ޝަހީދުވި އާއިލާތަކަށް ހާއްސަކޮށް ބޯހިޔާވަހިކަން ފޯރުކޮށްދިނުމަށް 50 ހައުސިން ޔުނިޓްގެ، ހައުސިން އިމާރާތެއް އެޅުމުގެ މަސައްކަތް ކުރިއަށްގެންދާނޭ ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ 1979 ވަނަ އަހަރުން ފެށިގެން މިހާތަނަށް އެކިފަހަރުމަތިން ވޭތުވެދިޔަ 40 އަހަރުދުވަހުގެ ތެރޭގައި 29 ސިފައިންނާއި ދެ ފުލުހުން ޝަހީދުވެފައިވާކަމަށެވެ.

މީގެކުރިން ސަރުކާރުިތަކުން އެފަރާތްތަކުގެ އަގުވަޒަންކުރެވިފައި ނުވާކަން ފާހަގަކުރައްވަމުން ރައީސް ވިދާޅުވީ، އަންނަ އަހަރުން ފެށިގެން ޝަހީދުވި ފަރާތްތަކުގެ އާއިލާތަކަށް ކަނޑއެޅޭ އުސޫލެއްގެ މަތިން ދެމެހެއްޓެނިވި ގޮތެއްގައި އެލަވަންސް ދެމުންގެންދާނޭ ކަމަށެވެ.

ކުރީގައި ޝަހީދުވި އާއިލާތަކަށް ކޮންމެވެސް ވަރެއްގެ ފައިސާގެ އެހީތަރިކަމެއް ދިން. އެހެންނަމަވެސް ފަހަކަށް އައިސް އެކަންވެސް ވަނީ ނުވެފައި. އަޅުގަނޑު ގަބޫލްކުރާ ގޮތުގައި އެއީ ވަރަށްބޮޑު ބޭއިންސާފެއް.

ރައީސް ވިދާޅުވިއެވެ.

އަންނަ އަހަރުން ފެށިގެން ޝަހީދުވި އާއިލާތަކަށް އެލަވަންސެއް ދިނުމަށް ނިންމަވާފައިވާކަން ރައީސް އިއުލާން ކުރެއްވިއިރު، މި އެލަވަންސް ނޮވެމްބަރު ތިނެއްގައި މެޑަލް ފޯ އެކްސެޕްޝަނަލް ބްރޭވަރީ ލިބުނު ފަސް ފަރާތަކާއި، މެޑަލް ފޯ ބްރޭވަރީ ލިބިފައިވާ 10 ފަރާތަށް، ދިނުމަށް ވަނީ އިއުލާނުކޮށްފައެވެ.

އެ ފަރާތްތަކަށް އެލަވަންސް ދޭނީ ގެޒެޓް ކުރާ އުސޫލެއްގެ ދަށުންކަމަށްވެސް ރައީސް ޑރ.މުއިއްޒު ވަނީ ވިދާޅުވެފައެވެ. މީގެ އިތުރުން ޝަހީދުންގެ އާއިލާތަކަށް ހާއްސަކޮށްގެން ކުރިއަށްގެންދާ 50 ޔުނިޓްގެ ހައުސިން އިމާރާތް މިހިނގާ ދައުރު ނިމުމުގެ ކުރިން ނިންމާލެވޭނޭކަމަށްވެސް ރައީސް ވަނީ ވިދާޅުވެފައެވެ.