އެމެރިކާގެ އިތުރު ހަމަލާއަކާ ގުޅިގެން ހަނގުރާމަ އިންޑިއާ ކަނޑަށް ފެތުރިދާނެ ކަމަށް އީރާނުން ބުނެފި
އެމެރިކާއިން އީރާނަށް އިތުރު ހަމަލާއެއް އަމާޒުކޮށްފިނަމަ މެދުއިރުމަތީގެ ހަމަނުޖެހުން އިންޑިއާ ކަނޑާ ހަމައަށް ފޯރައިފާނެ ކަމުގެ އިންޒާރު އީރާނުގެ ރޫހީ ވެރިޔާ ލީޑަރު މުޖްތަބާ ޚާމަނާޢީގެ މުޝީރެއް ކަމުގައިވާ ޔަޙްޔާ ރަޙީމް ސަފަވީ ދެއްވައިފިއެވެ.
ފާރސް ނޫހުގައި ޢާންމުކުރި ވީޑިއޯއެއްގައި ވާހަކަ ދައްކަވަމުން ސަފަވީ ވިދާޅުވީ ފާރިސީ ކަނޑުއޮޅިއާއި ހުރްމުޒް ކަނޑުއޮޅީން ފެށިގެން ރަތްކަނޑާ ހަމައަށް މިހާރުވެސް ހަނގުރާމައިގެ ހުޅުގަނޑު ފެތުރިފައިވާ ކަމަށެވެ. އެމެރިކާގެ ފަރާތުން އިތުރު ޢުދުވާނެއް އަތުވެއްޖެނަމަ އެކަމުގެ ރައްދުގައި ކުރިމަތިލުންތައް އިންޑިއާ ކަނޑާއި އެއަށްވުރެ ދުރަށްވެސް ފެތުރިގެން ހިނގައިދާނެ ކަމަށް އޭނާ ވިދާޅުވިއެވެ.
އީރާނުގެ ސަރުކާރުގެ މިފަދަ އިސް ބޭފުޅަކު އިންޑިއާ ކަނޑުގެ ނަން މިހާ ސާފުކޮށް ވިދާޅުވި މިއީ ފުރަތަމަ ފަހަރެވެ.
އީރާނާ ގާތްގަނޑަކަށް 4,000 ކިލޯމީޓަރު ދުރުގައި އޮންނަ އެ ކަނޑުގައި އެމެރިކާއާއި އިނގިރޭސިވިލާތުގެ އަސްކަރީ މަރުކަޒެއް ޤާއިމުކޮށްފައިވާ ފޯޅަވައްސެވެ ހިމެނެއެވެ.
ކުރިންވެސް އީރާނުގެ މަސްއޫލުވެރިން ވަނީ ހަމަލާތައް އާ ކޮށްފިނަމަ ހަނގުރާމައިގެ ދާއިރާ ފުޅާކުރާނެ ކަމުގެ އިންޒާރު ދެއްވައިފައެވެ.
މެދުއިރުމަތީގެ މަސްރަޙަށް ބަލާއިރު ޔަމަނުގެ ޙޫޘީން ވަނީ ރަތްކަނޑުގެ ސަރަޙައްދުތަކުގައި ބާރު ގަދަކޮށް އޭޝިއާއާއި ވިލާތުގެ ބައްރު ގުޅުވައިދޭ މުހިންމު ކަނޑުއޮޅިއެއް ކަމުގައިވާ ބާބުލް މަންދަބުގެ ކޮންޓްރޯލް ވަރުގަދަކޮށްފައެވެ.
ޙޫޘީންނަށް އީރާނުން ހަތިޔާރު ފޯރުކޮށްދޭ ކަމުގެ ތުހުމަތު އެކި ފަރާތްތަކުން ކުރި ނަމަވެސް ޔަމަނުގެ ދާޚިލީ ހަނގުރާމައިގައި އެއްވެސް ބައިވެރިވުމެއް ނެތް ކަމަށް އީރާނުން ތަކުރާރުކޮށް ބުނެފައިވެއެވެ.
މިދިޔަ ފެބްރުއަރީ މަހު އެމެރިކާއާއި އިސްތިއުމާރީ އިސްރާއީލު ގުޅިގެން އީރާނާ ދެކޮޅަށް ފެށި ހަނގުރާމައާ ގުޅިގެން ދުނިޔޭގެ ތެލާއި ގޭހުގެ ބޮޑު ބައެއް ދައުރުވާ ހުރްމުޒް ކަނޑުއޮޅި އީރާނުން ބަންދުކޮށްފައިވެއެވެ.
މިހާރުވެސް ދެ ޤައުމުން ދަނީ އެ ކަނޑުއޮޅީގެ ކޮންޓްރޯލް ހޯދުމަށް ވަރުގަދަ އަސްކަރީ ކުރިމަތިލުންތައް ބަދަލުކުރަމުންނެވެ.
މި ނުތަނަވަސްކަމުގެ ތެރޭގައި ހަނގުރާމަ ނިމުމަކަށް ގެނައުމަށް ބާރު އެޅުމުގެ ގޮތުން ނިއުޔޯކްގައި މި ހަފުތާގައި ކުރިއަށްދާ އދ. ގެ ޢާންމު މަޖިލީހުގެ ހަވާސާގައި ދެ ޤައުމުގެ އިސް މަންދޫބުން މަޝްވަރާ ބައްދަލުވުންތަކެއް ބާއްވައިފައިވެއެވެ.
އެ މަޝްވަރާތަކުގައި އީރާނުން ހުށަހެޅި ޝަރުތުތަކުގެ ތެރޭގައި އީރާނުގެ އިޤުތިޞާދާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލުމާއި ބޭރު ޤައުމުތަކުގައި ހިފަހައްޓާފައި ހުރި އީރާނުގެ ހަރުމުދަލާއި ފައިސާ އެއްވެސް ޝަރުތެއް ނެތި ދޫކޮށްލުން ހިމެނެއެވެ.
މި މަޝްވަރާތަކުން ނަތީޖާއެއް ނުކުންނާނެތޯ ބެލުމަށް ބައިނަލްއަޤުވާމީ މުޖުތަމަޢުން ދަނީ ގާތުން ބަލަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
