ފުލެޓްތަކާއި ގޯތިތައް ނުދީ ހިފަހައްޓާ ހިފެހެއްޓުމަކީ ގާނޫނީ ކުށެއް، އެކަން ހަމަމަގަށް އަޅުވަންޖެހޭ: ރައީސް ޞާލިހް

ކުރީ ސަރުކާރުން، ގެދޮރުވެރިޔާ އަދި ބިންވެރިޔާ ސްކީމްގެ ދަށުން ކުރިއަށް ގެންދިޔަ ބޯހިޔާވަހިކަމުގެ މަޝްރޫއުގެ ތެރެއިން ގޯއްޗާއި ފުލެޓް ލިބުނު މީހުންނަށް އެ ނުދީ ހިފަހަށްޓާފައިވާ ހިފެހެއްޓުމަކީ ގާނޫނީ ކުށެއް ކަމަށް ކުރީގެ ރައީސް އަދި އެމްޑީޕީގެ އެޑްވައިޒަރ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި މާފަންނު އުތުރު ދާއިރާއަށް އެމްޑީޕީގެ ޓިކެޓްގައި ވާދަކުރައްވާ ކެނޑިޑޭޓްގެ ކެންޕެއިން ޖަލްސާގައި ވާހަކަ ދައްކަވަމުން، ޞާލިހު ވިދާޅުވީ ބޯހިޔާވަހިކަމުގެ މައްސަލައަކީ މާލެއަށް ދިމާވެފައިވާ އެންމެ ބޮޑު މައްސަލަ ކަމަށެވެ.

އަޅުގަނޑުމެންގެ ވެރިކަމުގައި މިކަމަށް (ބޯހިޔާވަހިކަމުގެ މައްސަލައަށް) ހައްލެއް ހޯދުމަށްޓަކައި ވަރަށްގިނަ މަސައްކަތްތަކެއް ފެށި. ކޮވިޑްގެ ދަތިކަމާއިހުރެ ދެ އަހަރު ދުވަސް އަޅުގަނޑުމެންނަށް އަމަލީމަސައްކަތް ނުފެށި، އެކަމަށްބޭނުންވާ ފައިސާ ނުހޯދި ލަސްވެގެން ދިޔައީ

ކުރީގެ ރައީސް އިބްރާހީމް މުހައްމަދު ޞާލިހު

ކަންމިހެން ހުރި ނަމަވެސް، އެ ސަރުކާރުން ކުރި މަސައްކަތްތަކުން، އެ ސަރުކާރުގެ ޕްލޭނާއި އެއްގޮތަށް ގުޅީފަޅު، ގިރާވަރުފަޅު، އަދި ހުޅުމާލޭ ފޭސް 3 ހިއްކުމުގެ ޢަމަލީ މަސައްކަތް ފެށިގެން ދިޔަ ކަމަށް އެމަނިކުފާނު ވިދާލުވިއެވެ.

އަޅުގަނޑުމެންވާނީ ވެރިކަމުގެ ފަހުކޮޅުގައި، ވަރަށް ހާމަކަންބޮޑުކޮށް، އިންސާފުވެރިކަމާއި އެކީގައި، މާލެއިން ގޯތި ލިބޭނެ ފަރާތްތަކާއި، ފުލެޓް ލިބޭނެ ފަރާތްތައް ކަނޑައަޅައި ނިންމައިދީފައި.

ކުރީގެ ރައީސް އިބްރާހީމް މުހައްމަދު ޞާލިހު

ޞާލިހު ވިދާޅުވިގޮތުގައި، ގޯތި ދޫކުރުމުގެ މަސައްކަތަކީ ވަރަށް ގިނަ ގޮންޖެހުންތަކާއި ކުރިމަތިލާންޖެހުނު ކަމެއް ކަމަށެވެ. އަދި، އެންމެ ފުރަތަމަ މާލޭގެ ރަށްވެހިންނަށް ގޯތިދޭން ނިންމީ، އެފަރާތްތަކީ އެތައް އަހަރެއް ވަންދެން އެ ހައްގުން މަހްރޫމްވެފައި ތިބި މީހުން ކަމަށް ވުމުން ކަމަށް އެމަނިކުފާނު ވިދާޅުވިއެވެ.

މިއަދު އެހެން ނަމަވެސް އެހުރިހާ ކަމެއް އެހުރީ ގާތްގަޑަކަށް ހުއްޓާލާފައި. އެގޯތިތައް، އެ ފުލެޓްތައް ހަވާލުނުކުރެވެންވީ ހަމަ އެއްވެސް ސަބަބެއް އޮވެގެނެއް ނުވާނެ. ގާނޫނީ ގޮތުން. އެ ހިފަހައްޓާ ހިފެހެއްޓުމަކީ ގާނޫނީގޮތުން ކުރާ ކުށެއް. އެކަން ހަމަ މަގަށް އަޅުވަން އެބަޖެހޭ. އެކަން ހައްލު ކުރަން އަޅުގަނޑުމެން މިއުޅެނީ.

ކުރީގެ ރައީސް އިބްރާހީމް މުހައްމަދު ޞާލިހު

ޞާލިހު ވިދާޅުވީ މަޖިލިސް ތެރެއިން، މާލޭގެ ރައްޔިތުންނަށް ދިން ގޯއްޗާއި ފުލެޓް ހަވާލުކުރުމުގެ މަސައްކަތް އެމްޑީޕީން ކުރާނެ ކަމަށާ، އެކަން ހުއްޓުވައިގެން ސަރުކާރަށް ނުހުރެވޭނެ ކަމަށެވެ. އަދި ސަރުކާރުން ބޭނުން ގޮތަކަށް ލިސްޓުތައް ބަދަލުވެސް ނުކުރެވޭނެ ކަމަށް އެމަނިކުފާނު ވިދާޅުވިއެވެ.

ރައީސް ޞާލިހު މިހެންވިދާޅުވެފައިވާއިރު، އެމަނިކުފާނުގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދާއިމީ ލިސްޓާ މެދު ގިނަ ބަޔަކު ހިތްހަމަނުޖެހުން ފާޅުކޮށް އޭސީސީ އަށް ހުށައެޅި ޝަކުވާތަކާ ގުޅިގެން ފްލެޓު ދިނުމުގެ ހުރިހާ ކަމެއް ހުއްޓާލަން މީގެ ކުރިން މިނިސްޓްރީ އަށް އެންގިއެވެ. އަދި އެފަހުން އެ މައްސަލާގައި ކުރެވުނު ތަހުގީގުން އެނގުނު ގޮތުން ގެދޮރުވެރިޔާ ސްކީމްގެ ދަށުން ދޫކޮށްފައިވާ 4000 ފުލެޓްގެ ތެރެއިން، ފްލެޓް ލިބޭ މީހުންގެ 59.6 އިންސައްތަ މީހުންގެ ޝަރުޠު ހަމަނުވެއެވެ.