ވިލިމާލެ ހޮސްޕިޓަލް ވަގުތީ ގޮތުން އަމާން ހިޔާ އަށް ބަދަލުކުރަނީ
ވިލިމާލެ ހޮސްޕިޓަލް ހިންގަމުން އަންނަ އިމާރާތް ހުންނަ ސަރަހައްދުގައި އައު ހޮސްޕިޓަލެއް ތަރައްޤީކުރުމަށް ނިންމާފައިވާތީ އެ ހޮސްޕިޓަލްގެ ޚިދުމަތްތަށް ވިލިމާލޭގައި ހުރި އަމާން ހިޔާއަށް ބަދަލުކުރަން ނިންމައިފިއެވެ.
ވިލިމާލޭ ހޮސްޕިޓަލުގެ ޚިދުމަތްތަށް އަމާން ހިޔާއަށް ބަދަލުކުރަން ނިންމާފައިމިވަނީ ވިލިމާލެ ހޮސްޕިޓަލް ހިންގަމުން އަންނަ އިމާރާތް ހުންނަ ސަރަހައްދުގައި 112 އެނދުގެ އައު ހޮސްޕިޓަލެއް ތަރައްޤީކުރަން ނިންމުމާއި ގުޅިގެންނެވެ. މި ހޮސްޕިޓަލުގެ މަޝްރޫއު އަކީ ޗައިނާގެ އެހީގައި އެ ގައުމުގެ ކުންފުންޏަކާއި ހަވާލުކޮށްގެން ކުރިއަށް ގެންދާ މަޝްރޫއު އެކެވެ.
އެ ހޮސްޕިޓަލްގެ "ލެޓާ އޮފް އެކްސްޗޭންޖް" ގައި ސޮއިކުރެވިފައި ވަނީ މި މަހުގެ 4 ދުވަހުގަ އެެވެ. ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެ ރަސްމިއްޔާތުގައި ވިދާޅުވެފައި ވަނީ، މަޝްރޫއު އެޕްރޫވް ކުރުމަށް ފަހު، ދެން ހުރި މަސައްކަތްތައް ހަލުވި ދުވެއްޔެއްގައި މަސައްކަތް ކުރިއަށް ގެންގޮސް ނިންމާނެ ކަމަށެވެ. އެގޮތުން މި ހޮސްޕިޓަލުގެ ޑިޒައިންގެ މަސައްކަތް ނިންމައި، ކޮންޓްރެކްޓަރެއް ހޯދުމަށް ފަހު ފެށޭ 2026 ވަނަ އަހަރުގެ ކުރީކޮޅު ހޮސްޕިޓަލުގެ އަމަލީ މަސައްކަތް ފަށާނެ ކަމަށް ވެސް މިނިސްޓަރ ވަނީ އޭރު ވިދާޅުވެފައެވެ.
ވިލިމާލެ ހޮސްޕިޓަލް ވަގުތީގޮތުން އަމާން ހިޔާއަށް ބަދަލު ކުރުމާ ގުޅޭ އެއްބަސްވުމުގައި ހެލްތު މިނިސްޓްރީ އާއި މާލެ ސިޓީ ގްރޫޕް އޮފް ހޮސްޕިޓަލްއާ ދެމެދު އިއްޔެ ވަނީ ސޮއި ކޮށްފައެވެ.
ވިލިމާލޭގައި އަލަށް އިމާރާތްކުރާ ހޮސްޕިޓަލަށް ކިޔަން ހަމަޖެހިފައިވާ ނަމަކީ "ވިލިމާލެ-ޗައިނާ މޯލްޑިވްސް ފްރެންޑްޝިޕް ހޮސްޕިޓަލް" އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
