"ސަލަފު ރޯދަ ހަދިޔާ" އިވެންޓަށް ބޮޑު ތަރުހީބެއް، ތިންލައްކައަށް ވުރެ ގިނަ ރުފިޔާގެ އަގުހުރި އިނާމް

ޖަމްޢިއްޔަތުއްސަލަފުގެ ފަރާތުން ކުރިއަށް ގެންދިޔަ "ސަލަފު ރޯދަ ހަދިޔާ" ހަރަކާތަށް އާންމުންގެ ބޮޑު ތަރުހީބެއް ލިބިއްޖެ އެވެ.

މި ޙަރަކާތް ކުރީން ބާއްވަން އޮތީ ރޯދަ މަހުގެ ކުރީންނެވެ. ނަމަވެސް އެ ހަރަކާތް ބާއްވަން އޮތް ރޭ މޫސުން ގޯސްވެ ކުރިއަށް ގެންދެވޭ ގޮތް ނުވީ އެވެ. އެ ހަރަކާތް ރޭ ވަނީ ބާއްވާފަ އެވެ.

ސެންޓްރަލް ޕާކުގައި އޮތް އެ ހަރަކާތުގައި އެތައް ސަތޭކަ ބަޔަކު ބައިވެރިވި އެވެ. އާންމުންގެ ވަރަށް ބޮޑު ޝައުގުވެރި ކަމެއް އެ ހަރަކާތަށް އޮތެވެ.

ރޭ އޮތް އިވެންޓް ގައި ގުރުއަތުން ހޮވުނު ފަރާތްތަކަށް 101 އިނާމު ދީފައިވެ އެވެ. އޮންލައިން ކޮށް ބައިވެރިވި މީހުންގެ ތެރެއިން 10 މީހަކަށް ވެސް ވަނީ ފައިސާގެ އިނާމު ދީފަ އެވެ.

ވަރަށް އަގުބޮޑެތި އިނާމުތައް ވަނީ ދީފަ އެވެ. އޭގެ ތެރޭގައި އެލިއާއިން ހަދިޔާކޮށްފައިވާ ސައިކަލަކާއި، ޖަމިއްޔަތުލްސަަލަފުން ހުށައަޅާ ޢުމުރާ ދަތުރަކާއި، އެސްޓީއޯ އިން ހަދިޔާކޮށްފައިވާ ފުރިޖަކާއި އަވަނަކާއި ބްލެންޑަރއަކާއި، އެލްވަން ހާޑްވެއާ އިން ހަދިޔާކޮށްފައިވާ ދޮންނަ މެޝިނަކަށާއި، އިސާހުއަޙްމަދުޑޮޓްކޮމް އިން ހަދިޔާކޮށްފައިވާ ލެޕްޓޮޕަކާއި، މެރިން އިކުއިޕްމަންޓްސް އިންހަދިޔާކޮށްފައިވާ 12 ހާސް ބީޓީޔޫގެ އެއާކޯން އަކާއި، ރެޑްވޭވުން ހަދިޔާކޮށްފައިވާސޯފާއަކާއި، ފަރުމާ ފަރުނީޗަރސް އިން ހަދިޔާކޮށްފައިވާ އެނދެއް ހިމެނެ އެވެ.

ރޭ އޮތް އެ ހަރަކާތުގައި ބައިވެރިވި ކޮންމެ މީހަކަށް ކޫޕަނެއް ދިނެވެ. ތިންހާހެއްހާ ކޫޕަން ދޫކުރި އެވެ.

އެ ހުރިހާ ކޫޕަންތައް ހިމަނައިގެން ވަނީ ގުރުނަގާފަ އެވެ. ސަލަފުން ބުނި ގޮތުގައި ހުރިހާ އިނާމުތަކެއްގެ އަގު ތިން ލައްކައަށް ވުރެ އިތުރުވާނެ އެވެ.

ރޭގެ ފޯރަމްގައި އެންމެ ޚާއްސަ އިނާމެއްގެ ގޮތުގައި އޮތީ ރޯދައާ ގުޅޭ މުހިންމު މައުލޫމާތުތަކެއް ހިއްސާކުރުމަށް ފޯރަމެވެ.

މި ފޯރަމްގައި ޖަމިއްޔަތުއްސަލަފުގެ ނާއިބު ރައީސް އަދި ޢިލްމުވެރީންގެ މަޖިލީހުގެ ރައީސް އައްޝައިހް އަހްމަދު ސަމީރު އިބްރާހިމް އާއި ޖަމިއްޔަތުއްސަލަފުގެ ޢިލްމުވެރީންގެ މަޖިލީހުގެ ވަކީލް އައްޝައިހް އަބްދުއް ސަލާމް ދާޢޫދު ވަނީ މުހިންމު މައުލޫމާތުތަކެއް ހިއްސާ ކުރައްވާފަ އެވެ.

ޖަމިއްޔަތުއްސަލަފުން ވަނީ އެ ހަރަކާތް ކުރިއަށް ގެންދިއުމުގައި ސްޕޮންސަރުންނާއި ޕާޓްނަރުންގެ ފަރާތުން ލިބުނު އެހީތެރިކަން ފާހަގަ ކޮށްފަ އެވެ. އަދި އެ ހުރިހާ ފަރާތްތަކަށް ޝުކުރު އަދާކޮށްފައިވެ އެވެ.

އެގޮތުން އެލިއާ އިންވެސްޓްމަންޓާއި އެސްޓީއޯ އާއި ފަރުމާ ފަރުނީޗަރާއި މެރީން އިކުއިޕްމަންޓާއި އިޝްއަހްމަދުޑޮޓްކޮމް އާއި އެލްވަން ހާޑްވެއާ އާއި ރެޑްވޭވް އިން ދިން އެހީތެރިކަން ފާހަގަ ކޮށްފައިވެ އެވެ. އަދި ރޭގެ ހަރަކާތް ކުރިއަށް ގެންދިއުމުގައި އެޗްޑީސީއާ ޔޫން އަދި ހެޔޮބިންގާ އާއި ހިޖުރަގެ އިތުރުން ސަލަފު އެއިޑާއި ދިވެހި ޖީޕީޑީ އަދި ދާރިސް ޓީވީގެ ފަރާތުން ލިބުނު އެހީތެރިކަން ފާހަގަ ކޮށްފައިވެ އެވެ.

ސަލަފުގެ މިފަދަ ކޮންމެ ހަރަކާތަަށް އާންމުންގެ ފަރާތުން ލިބޭ އެހީތެރިކަމާއި ބަހައްޓާ ޝައުގުވެރިކަން ފާހަގަކޮށް ވެސް އެ ޖަމިއްޔާ އިން ވަނީ އެންމެހާ ފަރާތްތަކަށް ޝުކުރު އަދާކޮށްފަ އެވެ.

ރޭގެ އެ ހަރަކާތް ސަލަފުގެ ސޯޝަލް މީޑިއާ މެދުވެރިކޮށް 25 ހާހަށް ވުރެ ގިނަ މީހުން ބަލާފައިވެ އެވެ. އަދި އޮންލައިން ކޮށް ހުޅުވާލި ފުރުސަތުގައި އެތައް ސަތޭކަ ބަޔަކު އެޕްލިކޭޝަނަށް ފޮނުވާފައިވެ އެވެ.

ސަލަފަކީ ދިވެހީންގެ ދީނީ ހޭލުންތެރިކަމަށް އެެންމެ ފުޅާ ދާއިރާއެއްގައި މަަސައްކަތް ކުރާ ޖަމިއްޔާ އެވެ. ރާއްޖޭގެ އެންމެ ފާހަގަ ކޮށްލެވޭ ގިނަ އިލްމުވެރީން ނިސްބަތްވާ އެ ޖަމިއްޔާ އިން ކޮންމެ ރަމަޟާން މަހަކަށް ޚާއްސަކޮށް ގިނަ ޕްރަގްރާމްތަކެއް ހިންގަ އެވެ.

އެގޮތުން "ވާބިލް" ގެ ނަމުގައި ހިންގާ ޕްރަގްރާމާއި "ހަދާޔާ" ނަމުގައި ހިންގާ ޕްރަގްރާމް ފާާހަގަކޮށްލެވެ އެވެ. "ވާބިލް" އަކީ ދަތިހާލުގައި އުޅޭ 100 އާއިލާއަށް މުޅި ރޯދަ މަހު ކާބޯތަކެތީގެ އެހީތެރިވެދޭ ޕްރަގްރާމެކެވެ. "ވާބިލް" ޕްރަގްރާމަކީ އައިޖީއެމްއެޗާއި ހުޅުމާލެ ހޮސްޕިޓަލް އަދި ކުޅުދުއްފުށީ ހޮސްޕިޓަލްގައި އެޑްމިޓްކޮށްފައިވާ ބަލި މީހުންނާއި އެހީތެރިންނާއި ހޮސްޕިޓަލްތަކުގައި ޑިއުޓީ ކުރާ މުވައްޒިފުންނަށް ރޯދަ ވީއްލުން ދިނުމަށް ކޮންމެ ދުވަހަކު ހިންގާ ޕްރަގްރާމެކެވެ.

މީގެ އިތުރުން މާލެއާ ހުޅުމާލޭގައި އަދި އަތޮޅުތެރޭގައި ކޮންމެ ދުވަހަކު ދަރުސްތައް ބާއްވަ އެވެ.