އެޗްޑީސީ މުއައްޒަފުންނަށް އަހަރީ ބޯނަހުގެ ގޮތުގައި 18،600 ރުފިޔާ ދީފި

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މުވައްޒަފުންނަށް މިދިޔަ އަހަރުގެ އަހަރީ ބޯނަހަށްވާ ފައިސާ ދީފިއެވެ.

ވޮއިސްއަށް މައުލޫމާތު ހިއްސާކުރި އެޗްޑީސީގެ ބައެއް މުއައްޒަފުން ވަނީ ބޯނަސް ފައިސާ އެ މުއައްޒަފުންގެ އެކައުންޓަށް ޖަމާވިކަން ޔަގީންކޮށްދީފައެވެ. އަހަރީ ބޯނަހުގެ ގޮތުގައި އެޗްޑީސީން މިފަހަރު ދީފައިވަނީ 18،600 ރުފިޔާއެވެ. މިދިޔަ އަހަރު ޖަމާކޮށްފައިވަނީ 10،000 ރުފިޔާއެވެ.

އެޗްޑީސީއަކީ ސަރުކާރުގެ ކުންފުނިތަކުގެ ތެރެއިން އެންމެ ގިނަ އަދަދެއްގެ މުއައްޒަފުން ގެންގުޅެމުން އަންނަ ކުންފުނިތަކުގެ ތެރޭގައި ހިމެނޭ ކުންފުންޏެކެވެ. އެޗްޑީސީގެ ބެލުމުގެ ދަށުގައިވާ އެންމެ މުހިއްމު އެއް ސެޓަކީ ހުޅުމާލެއެވެ. ހުޅުމާލޭގެ އިތުރުންވެސް އެކުންފުނިން އަންނަނީ އެކިއެކި އިންވެސްޓްމަންޓްތައް ކުރަމުންނެވެ. މީގެ އިތުރުން ސަރުކާރުގެ މުހިއްމު މަޝްރޫޢުތައްވެސް އެކުންފުނިން އަންނަނީ މެނޭޖްކުރަމުންނެވެ. މީގެ ތެރޭގައި މި ސަރުކާރުގެ އެންމެ އުއްމީދީ މަޝްރޫޢު "ރަސްމާލެ" ފާހަގަކޮށްލެވެއެވެ.

އެޗްޑީސީއަކީ ސަރުކާރަށް ނިސްބަތްވާ ކުންފުނިތަކުގެ ތެރެއިން މިވަގުތު މާލީހާލަތު އެންމެ ރަނަގޅު ފައްތަރެއްގައި އޮތް ކުންފުންޏެވެ.

ޕީސީބީން އާއްމުކުރި ތަފާސްހިސާބަށް ބަލާއިރު، މިއަހަރުގެ ފުރަތަމަ ކުއާޓަރުގައި އެޗްޑީސީއަށް ވަނީ އާމްދަނީގެ ގޮތުގައި 432.4 މިލިއަން ރުފިޔާ ލިބުނުއިރު ފައިދާގެ ގޮތުގައި 268.5 މިލިއަން ރުފިޔާ ވަނީ ލިބިފައެވެ. މި މުއްދަތުގެ ތެރޭގައި ޕްރޮޕަޓީ ވިއްކައިގެން 268.6 މިލިއަން ރުފިޔާ ވަނީ ލިބިފައެވެ.

މި ކުއާޓަރުގެ ތެރޭގައި އެޗްޑީސީ ހިންގުމުގެ ހަރަދުތައް 208 މިލިއަން ރުފިޔާއަށް ދަށްކޮށްފައިވާއިރު، މިދިޔަ އަހަރުގެ ފުރަތަަމަ ކުއާޓަރުގައި ހިންގުމުގެ ހަރަދުތައް ހުރީ 238 މިލިއަން ރުފިޔާގައެވެ.