އަންނަ މަހުން ފެށިގެން މިސްކިތްތަކުގެ ކަރަންޓްބިލު ޑޮމެސްޓިކް ރޭޓުގައި ދައްކާގޮތަށް ލުއިދެއްވައިފި

އަންނަ މަހުން ފެށިގެން މިސްކިތްތަކުގެ ކަރަންޓްބިލު ޑޮމެސްޓިކް ރޭޓުގައި ދައްކާގޮތަށް ލުއިދެއްވާފައިވާކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިޢުލާނު ކުރައްވައިފިއެވެ.

ރައީސުލްޖުމްހޫރިއްޔާ މިކަން އިޢުލާނު ކުރައްވާފައިވަނީ ރޭ ކުޅުދުއްފުށި ސިޓީގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، މިސްކިތް ތަކަާއި، އެނޫންވެސް ރަށު ކައުންސިލް ތަކުން ކަރަންޓް ބިލް ދައްކަންޖެހޭ ތަންތަނުގައި، ޑޮމެސްޓިކް ރޭޓްގެ ބަދަލުގައި، އަގުބޮޑުކޮށް، ގަވަމެންޓް ރޭޓްގައި ކަރަންޓް ބިލް ދައްކަންޖެހޭ މައްސަލައިގައި ވަރަށް ގިނަ ކައުންސިލް ތަކުން ކަންބޮޑުވުން ފާޅުކުރައްވާފައިވާ ކަމަށެވެ.

އެހެން ކަމުން މާލެސިޓީއާއި އެހެން ހުރިހާ ސިޓީތަކާއި ރަށްތައް ހިމެނޭހެން، ހުރިހާ ރަށެއްގައި ހުރި މިސްކިތް ތަކުގެ ކަރަންޓް ބިލް، ޑޮމެސްޓިކް ރޭޓަށް ބަދަލު ކުރަން ނިންމަވާފައިވާ ކަމަށާ، އެ ނިންމުން ނިންމެވީ، ކައުންސިލުތަކަށް މިހާރު ބްލޮކް ގްރާންޓުގެ ގޮތުގައި ލިބޭ މަދު ފައިސާކޮޅުން ކަރަންޓު ބިލަށް ކުރަންޖެހޭ ބޮޑު ޚަރަދަށް ލުޔެއް ހޯދައިދެއްވުމުގެ ގޮތުންނާއި އަދި ކައުންސިލުތަކަށް ކަންކަން ފަހިކޮށްދީގެން ރައްޔިތުންނަށް ހިތްހަމަޖެހުން ގެނެސްދިނުމަށް ކަމަށް ކަމަށް އެމަނިކުފާނު ވިދާޅުވި އެވެ.

އަޅުގަނޑު ސްޓެލްކޯ އާއި ފެނަކައާ ވާހަކަ ދައްކައިފިން. އެހެންވީމާ ފުރަތަމަ މަރުހަލާއެއްގެ ގޮތުގައި މިއަންނަ މަހުން ފެށިގެން ކައުންސިލް ތަކުން ކަރަންޓަށް ކުރަންޖެހޭ ޚަރަދުގެ ތެރެއިން، ހުރިހާ ރަށެއްގައި، އެއީ މާލެ ސިޓީއާއި، ކުޅުދުއްފުށީ ސިޓީވެސް، ހުރިހާ ރަށެއް ހިމެނޭހެން، ހުރިހާ ރަށެއްގެ މިސްކިތް ތަކުގެ ކަރަންޓަށް ދައްކަންޖެހޭ ބިލު، މިހާރު ދައްކަން ޖެހެނީ ގަވަމެންޓް ރޭޓް ކިޔާ ރޭޓެއްގައި. އެ ރޭޓްގެ ބަދަލުގައި ޑޮމެސްޓިކް ރޭޓަށް ތިރިކޮށްދޭނަން. ތިރިވެގެން ދިޔައީމާ، ކައުންސިލް ތަކުން، ކޮންމެ މަހަކު ކަރަންޓަށް ކުރާ ޚަރަދު ވަރަށް ބޮޑު ތަނުން ކުޑަވެގެން ދާނެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އަދި ބަދަލާއެކު ފެނަކަ އާއި ސްޓެލްކޯއަށް، ޚާއްސަކޮށް ފެނަކައަށް އެތައް މިލިއަނަކުން ފައިސާ ގެއްލޭނެ ކަމަށާ، އެހެން ކަމުން އެ މަދުވާ އާމްދަނީ އެހެން އުސޫލަކުން ހޯދޭނެ ގޮތެއް ފަހި ކޮށްދެއްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.

ކުރިއަށްއޮތް އަހަރުތަކުގައި އިޤުތިޞާދު ވަރުދަގަވަމުންދާ ވަރަކުން މަގުބައްތިތައް ދިއްލުން، ޕާކްތައް އަދި އާންމު މައިދާންތަކުގެ ކަރަންޓަށް ނަގާ ރޭޓުވެސް "ގަވަރމަންޓު ރޭޓް"ގެ ބަދަލުގައި ޑޮމެސްޓިކް ރޭޓަށް ބަދަލުކޮށްދެއްވާނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.