ކައުންސިލް އިންތިޚާބު: 28 ގޮނޑި ޕީއެންސީއަށް ލިބިއްޖެ؛ އެމްޑީޕީއަށް 1 ގޮނޑި

އިންތިހާބަކާއި ނުލައި ލޯކަލް ކައުންސިލުގެ 28 ގޮނޑިއެއް ސަރުކާރު ހިންގައި ޕާޓީ ޕީއެންސީއަށް ކަށަވަރުވެފައިވާ ކަަމަށް އިލެކްޝަންސް ކޮމިޝަން (އީސީ)ން ހާމަކޮށްފިއެވެ.

އީސީން މިއަދު ވަނީ ލޯކަލް ކައުންސިލްތަކުގެ އިންތިޚާބަށް ކުރިމަތިލުމަށް މުއްދަތު ހަމަވިއިރު، އިންތިޚާބު ކުރަންޖެހޭ ޢަދަދަށް ކުރިމަތިލާފައިވާ ދާއިރާތަކާއި، ޝަރުޠު ހަމަވާ ކެންޑިޑޭޓުންގެ ނަންތައް ތަރުތީބުކޮށް، ގުރުއަތުލުން އޮންނަ ތަނުގައި ނަންތައް އިޢުލާނުކުރުމުގެ ކުރިން ނަން އަނބުރާ ގެންދިޔުމާ ގުޅިގެން، އިންތިޚާބު ވި ފަރާތްތަކުގެ މަޢުލޫމާތު އާއްމުކޮށްފައެވެ.

އެގޮތުން އާއްމު ކުރި ލިސްޓުގައިވާގޮތުން 28 ގޮނޑިއެއް ވަނީ ވެރިކަން ކުރާ ޕީއެންސީއަށް ލިބިފައެވެ. އަދި އިދިކޮޅު އެމްޑީޕީއަށް ލިބުނީ އެއްމެ ގޮނޑިއެކެވެ.

މީގެ އިތުރުން، އަދާލަތު ޕާޓީއަށް އެއް ގޮނޑި ލިބިފައިވާއިރު، އަމިއްލަ ގޮތުން ވާދަކުރާ ތިން މީހަކަށް ވަނީ ގޮނޑި ކަށަވަރުވެފައެވެ.

ގޮނޑި ކަށަވަރުވެފައިވާ ފަރާތްތައް އަންނަނިވި ލިންކުން ބަލައިލެވޭނެއެވެ.

https://gazette.gov.mv/iulaan/381304

މީގެ އިތުރުން، އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ، 42 ގޮނޑިއެއް ޕީއެންސީއަށް ކަށަވަރުވެފައިވާއިރު، އެމްޑީޕީއަށް ކަށަވަރުވީ ފަސް ގޮނޑިއެވެ.

އަދި، އަދާލަތު ޕާޓީއަށް އެއް ގޮނޑި ކަށަވަރުވީއިރު އަމިއްލަ ގޮތުން ވާދަކުރަން ފޯމް ހުށަހެޅި ދެ ކެންޑިޑޭޓަކު ވަނީ ގޮނޑި ކަށަވަރު ކޮށްފައެވެ.

ކައުންސިލް އިންތިހާބު އޮތީ އަންނަ އޭޕްރީލް މަހުގެ ހަތަރު ވަނަ ދުވަހެވެ.