އިންފެކްޝަން ކޮންޓްރޯލް ކުރުމާ ގުޅޭ ބައިނަލްއަޤްވާމީ ތަމްރީނު ޕްރޮގްރާމެއް އެމްއެންޔޫއިން ކޮލަމްބޯގައި ބާއްވައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިސްނަގައިގެން ސިއްޙީ ދާއިރާގެ ޚިދުމަތްތެރިންނަށް ޚާއްޞަކޮށްގެން ކޮންޓިނިއުއިންގ ޕްރޮފެޝަނަލް ޑިވެލޮޕްމަންޓް (ސީޕީޑީ) ސެޝަނެއް ސްރީލަންކާގެ ކޮލަމްބޯގައި ކާމިޔާބުކަމާއެކު ކުރިއަށް ގެންގޮސްފިއެވެ.

"އެޑްވާންސިންގ އިންފެކްޝަން ޕްރިވެންޝަން އެންޑް ކޮންޓްރޯލް" ގެ ނަމުގައި މި ޕްރޮގްރާމް ކުރިއަށް ގެންގޮސްފައިވަނީ 29 އޯގަސްޓް 2026 ގައި، ސްރީލަންކާގެ ކޮލަމްބޯގައި ހުންނަ ލޭޑީ ރިޖްވޭ ހޮސްޕިޓަލް ފޯރ ޗިލްޑްރަން (އެލްއާރުއެޗް) ގައެވެ.

އެމްއެންޔޫއިން ބުނީ، މި ސެޝަނަކީ ސްރީލަންކާ އިންޓެންސިވް ކެއަރ ނަރސަސް އެސޯސިއޭޝަނާއި، ކްރިޓިކަލް ކެއަރ ނަރސިންގ އެސޯސިއޭޝަން އޮފް ނޭޕާލް އަދި އިންފެކްޝަން ކޮންޓްރޯލް ސޮސައިޓީ އޮފް ނޭޕާލް ގުޅިގެން ކުރިއަށް ގެންދިޔަ ސެޝަނެއް ކަމަށެވެ. މި ސެޝަންގެ މައިގަނޑު މަޤްޞަދަކީ ސަރަޙައްދީ ފެންވަރުގައި ސިއްޙީ ޚިދުމަތްތެރިން އެއްތަނަކަށް ޖަމާކޮށް، އިންފެކްޝަން ކޮންޓްރޯލް ކުރުމާއި ރައްކާތެރިވުމާ ގުޅޭ މަޢުލޫމާތާއި ޤާބިލުކަން އިތުރުކުރުމެވެ.

މި ޕްރޮގްރާމްގައި ސްރީލަންކާއިން 130 ބައިވެރިން ޙާޟިރުވެ ބައިވެރިވި އިރު، ނޭޕާލް، ފިލިޕީންސް، ބަންގްލަދޭޝް އަދި ޕާކިސްތާނުން 80 އަށް ވުރެ ގިނަ ސިއްޙީ ޚިދުމަތްތެރިން ވަނީ އޮންލައިންކޮށް ބައިވެރިވެފައެވެ. މި ސެޝަނަކީ ސިއްޙީ ދާއިރާގެ ތަޖުރިބާކާރުންގެ މެދުގައި މަޢުލޫމާތާއި ތަޖުރިބާ ބަދަލުކުރުމަށާއި، ޤައުމުތަކުގެ މެދުގައި ގުޅުން ބަދަހިކޮށް އިންފެކްޝަން ކޮންޓްރޯލް ކުރުމުގެ އެންމެ ރަނގަޅު އުޞޫލުތައް ދަސްކުރުމަށް ލިބުނު ވަރަށް އަގުހުރި ފުރުޞަތެކެވެ.

އެމްއެންޔޫއިން ފާހަގަކުރި ގޮތުގައި، މި އިސްނެގުމަކީ އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތަކުގެ ތެރެއިން ގިނަ ލަނޑުދަނޑިތަކަކަށް ވާސިލުވުމަށް އެޅުނު މުހިންމު ފިޔަވަޅެކެވެ. އެގޮތުން، ފެންވަރު ރަނގަޅު ތަޢުލީމު ފޯރުކޮށްދިނުމުގެ ލަނޑުދަނޑި (އެސްޑީޖީ 4) ޙާޞިލުކުރުމަށްޓަކައި، މެދުކެނޑުމެއްނެތި ސިއްޙީ ޚިދުމަތްތެރިންގެ ހުނަރާއި މަޢުލޫމާތު ތަރައްޤީކުރުމަށް މި ޕްރޮގްރާމުން އެހީތެރިވެދެއެވެ.

ހަމައެއާއެކު، ސިއްޙަތާއި ދުޅަހެޔޮކަން ކަށަވަރުކުރުމުގެ ލަނޑުދަނޑި (އެސްޑީޖީ 3) ޙާޞިލުކުރުމަށް ބާރުއަޅައި، ރައްކާތެރި އަދި ފެންވަރު ރަނގަޅު ސިއްޙީ ޚިދުމަތެއް ފޯރުކޮށްދިނުމުގެ ޤާބިލުކަން އިތުރުކުރެވުނެވެ. މީގެއިތުރުން، އެކި ޖަމްޢިއްޔާތަކާ ގުޅިގެން މަސައްކަތްކުރުމުގެ ލަނޑުދަނޑި (އެސްޑީޖީ 17) ގެ ދަށުން، ސަރަޙައްދީ ފެންވަރުގައި ގުޅުން ބަދަހިކޮށް، މުއައްސަސާތަކުގެ މެދުގައި އެއްބާރުލުން އިތުރުކުރުމަށް މި ޕްރޮގްރާމުގެ ސަބަބުން މަގުފަހިވެގެންދިޔައެވެ.

އެމްއެންޔޫއިން ބުނީ، މިފަދަ ބައިނަލްއަޤްވާމީ ޕްރޮފެޝަނަލް ޑިވެލޮޕްމަންޓް ޕްރޮގްރާމްތައް މެދުވެރިކޮށް، ސިއްޙީ ދާއިރާގެ ކުރިއެރުމަށާއި ސަރަޙައްދީ ގުޅުންތައް ވަރުގަދަކުރުމަށް އެ ޔުނިވަރސިޓީން އަބަދުވެސް މަސައްކަތްކުރަމުން ގެންދާނެ ކަމަށެވެ.