ބޮޑުތަކުރުފާނުމަގުގައި ނުރައްކާތެރިކޮށް ސައިކަލް ދުއްވި މީހާ ދެނެގަނެވިއްޖެ، ހޯދުމުގެ މަސައްކަތް ދަނީ ކުރިއަށް: ފުލުހުން
ލިޔުންތެރިޔާ
އަބްދުﷲ ހުސައިން
ބޮޑުތަކުރުފާނުމަގުގައި ނުރައްކާތެރިކޮށް ސައިކަލް ދުއްވަނިކޮށް ވީޑިއޯއިން ފެންނަ މީހާ ދެނެގަނެވިފައިވާކަމަށް ފުލުހުން ބުނެފިއެވެ.
ސޯޝަލް މީޑިއާގައި ދައުރުވަމުންދާ ވީޑިއޯއެއްގައި ބޮޑުތަކުރުފާނުމަގުގައި މީހަކު ވަރަށް ނުރައްކާތެރިކޮށް ޒިގްޒިގްކޮށް ސައިކަލް ދުއްވާ މަންޒަރު ފެންނައިރު، ރަނގަޅަށް ސިގްނަލްވެސް ނުދީ ކުއްލިއަކަށް އަޅަނީ މަޖީދީމަގަށެވެ. މި ވީޑިއޯއާ ގުޅޭގޮތުން ވޮއިސަްއާ މައުލޫމާތު ހިއްސާކުރަމުން ފުލުހުން ބުނީ، އެ ސައިކަލް ދުއްވި މީހާ ދެނެގަނެވި އެމީހާ ހޯދުމުގެ މަސައްކަތް ފުލުހުން ކުރަމުންދާކަމަށެވެ.
މި މައްސަލަ އެއްވެސް ފަރާތަކުން ރިޕޯޓް ކޮށްފައި ނުވިނަމަވެސް، އެ މައްސަލަ ބަލަމުންދާކަމަށް ފުލުހުން ބުންޏެވެ.
ބާރު ސްޕީޑްގައި ސައިކަލް ދުއްވުމަކީ މާލެ ސަރަަހައްދުގައި މިހާރު ވަރަށް ބޮޑުވެފައިވާ މައްސަލައެކެވެ. އެގޮތުން މިދިޔަ އާދިއްތަ ދުވަހުގެ ރޭ ސޯސަންމަގުގައި ބާރު ސްޕީޑްގައި ދުއްވި ސައިކަލަކުން ޖެހި ހިނގި އެކްސިޑެންޓެއްގައި ޒުވާން އަންހެނަކު ވަނީ ނިޔާވެފައެވެ. ބާރު ސްޕީޑްގައި އެ ސައިކަލް ދުއްވި މީހާ އަތުގައި ލައިސަންސް ނެތްއިރު، އޭނާ ވަނީ މީގެ ކުރިން އެތައް ފަހަރަކު ފުލުހުން ހިފަހައްޓައި ޖޫރިމަނާވެސް ކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
