ބޮޑު ޚިޔާނާތް ފުޅާވެފައިވަނީ ހާދަ ބޮޑަކަށެވެ!

އެމްއެމްޕީއާރްސީގައި ހިނގާދިޔަ ޚިޔާނަތުގެ ކަންކަން ނިއުޅެމުން އެގެމުންމިދަނީ ކުރިން މީހުން އުއްމީދުކުރި ކަހަލަގޮތަކަށް ނޫނެވެ. އެމްއެމްޕީއާރްސީގެ ޚިޔާނާތުގެ ފައިސާ އަބްދުﷲ ޔާމީންގެ ސަރުކާރުގައި އުޅުނު ބައެއް މީހުންނާއި ރައްޔިތުންގެ މަޖިލީހުގެ ބައެއް މެމްބަރުންނާއި އެމްޑީޕީގެ ވަރަށް އިސް ސަފުގައި ހަރަކާތްތެރިވެފައިވާ ފަރާތްތަކާއި އަދި ޖުމްހޫރީ ޕާޓީއާއި އަދި މަޝްހޫރު ވިޔަފާރިވެރިންނާ ހަމައަށް ގޮސްފައިވާކަން އޭސީސީގެ ރިޕޯޓުން އެގުމުން މިހާރު އެންމެ ބޮޑު ބަހުސަކަށްވެފައިވަނީ އޭސީސީގެ ރިޕޯޓް ތިން އަހަރުވަދެން ބާއްވަންވީ ކީއްވެގެންހެއްޔެވެ. ކޮންމެހެން މިހާރު ނެރެންވީ ކީއްވެގެންހެއްޔެވެ. މިސުވާލު އުފައްދަނީ ރިޕޯޓު ނެރުމުން އޭގައި ހުރި ކަންކަން ފެނި ހިތްހަމަނުޖެހުނު ބައެއް ފަރާތްތަކުންނެވެ.

ދައުލަތަސް ފައިސާގެ ދަތިކަން ދިމާވުމުން އަބަދުވެސް ޗަންޕާ މުހައްމަދު މޫސާގެ ފައިސާފޮށިން ބޮޑު އިންޓަރެސްޓަކާއެކު ސަރުކާރުން ފަހުންދޭގޮތަށް ލާރިނަގާކަން އެއީ އެންމެންނަށްވެސް އެގޭކަމެކެވެ. އެއީ އިއްޔެއަކު މިއަދަކު ހިގާކަމެއް ނޫނެވެ. ބައެއް ވަގުތުވަގުތުގައި ސަރުކާރަށްވުރެ ޗަންޕާ އާއިލާގެ ތަނަވަސްކަން ބޮޑެވެ. އެފައިސާއިން މިހާރު އެހެރީ ބޭންކެއް ހަދާފައެވެ. އެމްއެމްޕީއާރްސީން ޚިޔާނާތްތެރިވި ފައިސާ ގެންގުޅުނު އެސްއޯއެފުން ޗަންޕާ އާއިލާގެ ބައެއް ބޭފުޅުންގެ މަސްލަހަތު ހިމެނޭ ކުންފުނިތަކާއި މުއާމަލާތްކޮށްފައިވާކަމަށް އޭސީސީގެ ރިޕޯޓުން އެގެއެވެ. އޭސީސީގެ ރިޕޯޓްގައި ޗަންޕާ ގްރޫޕަށް ނުގަވާއިދުން ރިސޯޓްހެދުމަށް ރައްތައް ކުއްޔަށްދޫކޮށްފައިވާކަން އެގެއެވެ. އެއްރަށަކީ ޅ މާބިން ހުރާއެވެ. އެރަށް ކުއްޔަށްދިނުމަށް ވަގުލިއުންތަކެއްގައި ކުރީގެ ޓޫރިޒަމް މިނިސްޓަރ އަހުމަދު އަދީބާއި އެމްއެމްޕީއާރްސީގެ މެނޭޖިންޑިރެކްޓަރ އަބްދުﷲ ޒިޔާތު ސޮއިކޮށް ރަށް ކުއްޔަށްދިނުމަށްފަހު ލިބިފައިވާ 5 މިލިޔަންޑޮލަރަށް ޚިޔާނާތްތެރިވެފައިވާކަން އެގެއެވެ.

ދެން އޮތީ ރައީސް އަބްދުﷲ ޔާމީންގެ ސަރުކާރުގެ ޕާޓްނަރެއްގެގޮތުގައި ދުވަސްކޮޅަކު އޮތުމަށްފަހު ވަކިވެގެންދިޔަ ޖުމްހޫރީ ޕާޓީގެ ލީޑަރ ގާސިމް އިބްރާހިމްގެ މަސްލަހަތު ހިމެނޭ ވިލާޓްރެވަލްސްގެ އެކައުންޓަށް އެސްއޯއެފުން ޑޮލަރު ޖަމާކޮށްފައިވެއެވެ. އެކަންހިގާފައިވާގޮތް ގާސިމް އިބްރާހިމް ސާފުކޮށްދެއްވިއެވެ. އެސްއޯއެފްގެ މުއްސަނދިކަން އޮތީ ޚިޔާނަތުގެ ހަރާމް ފައިސާގެ މައްޗަށްކަމުގައިވީނަމަވެސް ވިލާގެ މުއާމަލާތަކީ ސައްހަ ގޮތުގައި އެފްއޯއެސްއިން ޑޮލަރުގަތުމަށް ހިންގާފައިވާ މުއާމަލާތެއްކަމަށް ގާސިމް ވަނީ ވިދާޅުވެފައެވެ.

ޗައންޕާއާއި ގާސިމް އިބްރާހިމްގެ ވާހަކަ މިގެނައީކީ ކޮންމެހެން ނުގަވާއިދުން ކަންކޮށް އެމްއެމްޕީއާރްސީގެ ޚިޔާނާތުގައި ބައިވެރިވާކަން ދެއްކުމުގެ ގޮތަކުންނޫނެވެ. އެދެކުންފުނި ނޫނަސް ރާއްޖޭގައި ނަންމަޝްހޫރު ވަރަށް ގިނަ ވިޔަފާރި ކުންފުނިތަކާއި އަމިއްލަ މީސްމީހުންނާއި ރިސޯޓް ވަޔަފާރިތަކުން އެސްއޯއެފްއިން މުއާމަލާތް ކޮށްފައި އެބަހުއްޓެވެ. ރަށްތައް ދޫކުރުމަށް ސަރުކާރުން އޭރު އިއުލާންކޮށްފައި އޮންނަ ސިޔާސަތުގެ ތެރެއިން މިކުންފުނިތަކުން އެމްއެމްޕީއާރްސީއާއި މުއާމަލާތު ކުރުމާއި ޑޮލަރު ގަތުމުގެ ލައިސަންސް އޮންނަ ކުންފުންޏަކުން ޑޮލަރުގަންނަން އުޅުމަކީ ވަގަށް ގޮވަންޖެހޭ ސަބަބެއްނޫނެވެ. ކުންފުނިތަކުން ރަށްތައްކުށްޔަށް ހިފާފައި ފައިސާދީފައިވަނީ އެސްއޯއެފަކަށްނޫނެވެ. އެމްއެމްޕީއާރްސީއަށެވެ. އެކުންފުނިން ފައިސާއާއި ހަވާލުވާ ފަރާތްތަކުން ޚިޔާނާތްތެރިވުމަކީ ވިޔަފާރީގައި ބައިވެރިވި އަނެއް މީހާ ކުށްވެރިވާންޖެހޭ ސަބަބެއްވެސް ނޫނެވެ.

ޚިޔާނާތުގެ މޫތައް އަހުމަދު އަދީބު ފުޅާކޮށްފައިވާ މިންވަރު ހިތަށްގެންނަން ދެން ފާހަގަކޮށްލަންބޭނުންވަނީ ރައީސް އަބްދުﷲ ޔާމީންގެ ވެރިކަމުގައި އިދިކޮޅު ޕާޓީގެ ގޮތުގައި އޮތް އެމްޑީޕީގެ އިސްސަފުގެ ބައެއް ބޭފުޅުންނަށް ޚިޔާނާތުގެ ފައިސާ ދީފައި ވުމެވެ. މިއީ ކުރިން އެއްގޮތަކަށްވެސް ޚިޔާލަށް އައި ކަމެއްނޫނެވެ. މިއީ އެމްޑީޕީގެ އާއްމު މެމްބަރެއްގެ ވިސްނުމުގައި އޮތްކަމަކަށް ނުވެދާނެއެވެ. އެއަށްވުރެ އެޕާޓީގެ ވެރިން ތާހިރުވާނެކަމަށް އެމީހުންނަށް ޔަގީންކުރެވެއެވެ. އެހެންނަމަވެސް ކުރިން އެމްޑީޕީގެ ޗެއަރޕާސަން ގެ ނާއިބް އަދި ޕާޓީގެ މާލީ ކަންކަން ބެލެހެއްޓެވި އަދި 2013 ވަނަ އަހަރު ރައީސް މުހައްމަދު ނަޝީދުގެ ރިޔާސީ ކެމްޕެއިންގެ ފައިސާތައް މެނޭޖްކުރެއްވި އަހުމަދު މައުސޫމް ހިއްސާވާ ސީޖީޓީ ޕްރައިވެޓް ލިމިޓެޑް އެސްއޯއެފާއި މުއާމަލާތްކޮށް އެކުންފުނީގެ އެކައުންޓަށް އެސްއޯއެފުން 6 މިލިޔަން ޑޮލަރު ( 93 މިލިޔަން ރުފިޔާ ) ޖަމާކޮށްފައިވާކަމަށް އޭސީސީގެ ރިޕޯޓުން ދެއްކުމުން އެމްއެމްޕީއާރްސީގެ ޚިޔާނަތުގެ މައްސަލަ ފުޅާވެ ފެތުރިފައިވާ މިންވަރު އަންދާޒާކޮށްލެވެއެވެ. މައުސޫމްގެ ހިއްސާއޮންނަ ކުންފުންޏަށް ޚިޔާނާތުގެ ފައިސާ ވަދެފައިވާކަން އެގުމާއެކު ރައީސް މުހައްމަދު ނަޝީދުވަނީ އަވަސްއަވަހަށް މައުސޫމްގެ ދިފާއުގައި ވާހަކަފުޅު ދައްކަވާފައެވެ. މައުސޫމްއަކީ މައުސޫމް ބޭފުޅެއްކަމާމެދު ޝައްކުނުކުރައްވާކަމަށް ނަޝީދު ވިދާޅުވެފައިވެއެވެ. އެކަމަކު ސީޖީޓީއަކުން އެފައިސާއަކީ ހަރާންފައިސާތޯ ނުވަތަ ހަލާލްފައިސާތޯ ސާބިތުކޮށްދޭން ގާސިމް އިބްރާހިމް ފަދައިން އަދި އެއްޗެކޭ ނުބުނެއެވެ. ނަޝީދުގެ ވާހަކައިގެ ދެދުވަހެއްފަހުން ކުށެއްކުރައްވާފައިނުވާނެކަމަށް ވިދާޅުވެ މައުސޫމް ބަޔާނެއް ނެރުއްވާފައިވެއެވެ. އެހެންވިޔަސް އެހާއަވަހަށް ރައީސް މުހައްމަދު ނަޝީދު މައުސޫމް ދިފާއުގައި ނުކުންނަންވީ ކީއްވެގެންތޯއެވެ. އަދި ވަރަށް ބޮޑަށް ވާހަކަފުޅު ޓްވިސްޓްވެސްކުރައްވާފައިވެއެވެ. އެއީ އޭސީސީގެ ރިޕޯޓްގައި މައުސޫމް ބައިވެރިވާ ދެކުންފުންޏަކަށް އެސްއޯއެފްގެ ފައިސާ ޖަމާވެފައިވާކަމަށް ބުނެފައިވަނިކޮށް މައުސޫމްގެ ނަޒާހަތްތެރިކަން ސާބިތުކޮށްދެއްވުމަށް އެތަނުން އެއްކުންފުނީގައި މައުސޫމްގެ ހިއްސާ މިހާރު ނޯންނަކަމަށް ވިދާޅުވުމެވެ. އެކަމަކު މައުސޫމް އިއްޔެ ނެރުއްވި ބަޔާނުގައި ދެން އޮތް ކުންފުނީގައި ޝެއަރއޮންނަކަމަށް އަމިއްލަފުޅަށް ވިދާޅުވެފައިވެއެވެ. ތަހްޒީބު މުޖްތަމައެއްގައިނަމަ މިއީ ވަރަށް ބޮޑު މައްސަލައަކަށް ވީހެވެ. ތިމާގެ ރަހްމަތްތެރިއެއްވީމާ ކުށްވެރި ނުވެފައި ސިޔާސީ ވާދަވެރިއެއްވީމާ ކުށްވެރިވާންޖެހޭ އުސޫލެއް އޮވެގެންނުވާނެ ނޫންތޯއެވެ. މިއީ އަޅުގަނޑުމެން ހީކުރާވަރަށްވުރެ ސިޔާސީ މީހުންގެ ފަތިފުށްތާހިރު ނޫންކަން ފެންނަ މިސާލެކެވެ. އިންސާފު އެއީ ދުލުކުރިން ބުނެލާ ބަހެކެވެ.

ރައްޔިތުންގެ މަޖިލިސްތެރޭގައި ނެގިވޯޓްގެ ފަހަތުގައިވާކަންކަން ހާމަކުރާނެނަމަ!

އަދީބުގެ ބާރުގަދަ ދުވަސްވަރު އަޑުއިވެމުންގޮސްފައިވާ ވާހަކަތަކަށް ބަލާއިރު، އޭނާ ނާއިބް ރައީސްކަމަށް އަންނަން ރައްޔިތުން އިންތިޚާބުކުރި ނާއިބްރައީސް މުހައްމަދު ޖަމީލު އަހުމަދު ވަކިކޮށް، ގާނޫން އަސާސީއަށް ބަދަލުގެނައުމަށާއި އަދި ރާއްޖެއިން ބޭރު މީހުންނަށް ބިންވިއްކޭގޮތަށް ގާނޫނަށް ގެނައި އިސްލާހް ރައްޔިތުންގެ މަޖިލީހުގެތެރެއިން ފާސްކުރުމަށް އެކިއެކި ޑީލްތައް އަދީބު ހަދާފައިވާކަމަށް އެދުވަސްވަރު އަޑު އަރާފައި އޮވެއެވެ. އެހެންވިޔަސް އޭނާ ހަދާފައިވާ އެފަދަ ޑީލްތަކެއް އެހާ ސާފުކޮށް އަދި ހާމައެއް ނުވެއެވެ. ހަދާފައިވާ ކަމެއްވެސް ނޭގެއެވެ. އެހެންނަމަވެސް ގާނޫން އަސާސީ އިސްލާހް ކުރުމަށް ނެގި ވޯޓްގައި މަޖިލީހުގެ ދެތިން މެމްބަރަކު ފިޔަވައި އެހެން ހުރިހައި މެމްބަރުން ވޯޓްދީފައިވެއެވެ. ވޯޓް ނުދޭ މެމްބަރުންނަށް ތިބީ ޕީޕީއެމްގެ އަހުމަދު މަހްލޫފާއި ޖޭޕީގެ އަލީ ހުސައިން އެވެ. ވޯޓް ދެއްވި ބޭފުޅުންގެތެރޭގައި މިހާރުގެ ރައީސް އިބްރާހިމް މުހައްމަދު ސާލިހާއި ޖުމްހޫރީ ޕާޓީގެ ލީޑަރ ގާސިމް އިބްރާހިމް ހިމެނިވަޑައިގަންނަވައެވެ. އީވާއާއި މާރިޔާއާއި އިމްތިޔާޒު ފަހުމީއާއި އަބްދުﷲ ރިޔާޒުފަދަ ބޭފުޅުންވެސް މެއެވެ. މިބަދަލު ސާލިހް ވެރިކަމަށް ވަޑައިގަތުމާއެކު އަލުންއަނެއްކާ ކުރިން އޮތްގޮތަށް ހެދީއެވެ. ސުވާލަކީ އެދުވަހު ގާނޫން އަސާސީއަށް އެއިސްލާހް ގެންނަން އެއްބަސްވެވަޑައިގަތީ ކީއްވެގެންތޯއެވެ. އަދި ބާރު ލިބިވަޑައިގަތީމާއި ތި އުވާލެއްވީ ކީއްވެގެންތޯއެވެ. ކޮން މަޖްބޫރުކަމެއް އެވެގެންތޯއެވެ. އެވޯޓްތަކުގެ ފަހަތުގައިވާ ކަންކަން ހާމަކުރުން އެއީ ވަރަށް ޝައުގުވެރިކުރުވަނިވި ވާހަކަތަކަކަށްވާނެކަމާމެދު ޝައްކެއްނެތެވެ. އަދި ހާމަނުކުރިޔަސް އެވަނީ ތާރީޚްގެތެރެއަށް ވަދެގެން ގޮސްފައެވެ.

އޭސީސީގެ ރިޕޯޓް ނެރުމުން އެރިޕޯޓް ނެރުން ލަސްވެ، އަދި ކަމުނުގޮސްގެން ވާހަކަ ދައްކައިއުޅުމުގެ ފަހަތުގައި ކިތަންމެ ކަމެއް ހުރެދާނެއެވެ. ސިޔާސީ ކަންކަމަކީ އަރަތެއްފަދަ ކަމެކެވެ. ޖުވާ އަށްވުރެވެސް މުޑުދާރު ގޭމްކުޅެންޖެހޭ ކަމެކޭ ބުނެ އުޅެއެވެ. އަޅުގަނޑުމެންގެ ރާއްޖެ ކީއްކުރަންތޯއެވެ. އަވަށްޓެރިންނާއި ދުރުން އދގެތެރެއިންނާއި އިންޓަރނޭޝަނަލް މަނިޓަރީ ފަންޑް އަދި އެންމެ އަބުރުވެރިކުޅިވަރުކަމުގައި ހީކުރާ ކުޅިވަރު، ފުޓްބޯޅައިގެ މައިޖަމްއިއްޔާ ފީފާގެތެރެއިންވެސް ފެންނަނީ ވައްކަމާއި ޚިޔާނާތެވެ.