ޤަވާއިދާ ޚިލާފަށް ދުއްވި ސައިކަލު ޖެހި ސީރިއަސް އަނިޔާވީ އެއް އާއިލާއެއްގެ ދެ މީހުންނަށް

ހުޅުމާލެ ފޭސް 2 ގައި ރޭ ދަންވަރު ނުރައްކާތެރި އެކްސިޑެންޓެއް ހިނގައި، ސީރިއަސް އަނިޔާތަކެއް ލިބުނު މީހުންގެ ތެރޭގައި އެއް އާއިލާއަކަށް ނިސްބަތްވާ ދެބެންގެދެދަރި ދެ ޒުވާނުން ހިމެނޭކަން ހާމަވެއްޖެއެވެ.

މި އެކްސިޑެންޓް ހިނގާފައިވަނީ ރޭ ދަންވަރު 02:55 އެހައިކަންހާއިރު، ހުޅުމާލެ ފޭސް 2 ގެ ނިރޮޅުމަގުގައި ދެ ސައިކަލު ޖެހިގެންނެވެ.

ފުލުހުން ވިދާޅުވި ގޮތުގައި، މި އެކްސިޑެންޓުގައި ޖުމްލަ ފަސް މީހަކަށް އަނިޔާވެފައިވެއެވެ. އަދި އޭގެ ތެރެއިން ހަތަރު މީހެއްގެ ހާލު ސީރިއަސްވެ، ހުޅުމާލެ ހޮސްޕިޓަލުގައި ފުރަތަމަ ފަރުވާ ދިނުމަށްފަހު އިތުރު ފަރުވާއަށް މިހާރު ވަނީ އައިޖީއެމްއެޗަށް ބަދަލުކޮށްފައެވެ.

ފުލުހުންގެ ތަޙުޤީޤަށް މިހާތަނަށް އެނގިފައިވާ ގޮތުގައި، މި އެކްސިޑެންޓް ހިނގަން މެދުވެރިވީ އެއް ސައިކަލުގައި ތިން މީހުން އަރައިގެން، މަގުގެ ޓްރެފިކް ޤަވާޢިދާ ޚިލާފަށް ވަންވޭއާ އިދިކޮޅަށް ދުއްވުމުންނެވެ. މީގެއިތުރުން، އެ ސައިކަލަކީ ވަގަށް ނަގާފައިވާ ސައިކަލެއް ކަމަށް ބެލެވޭއިރު، ސައިކަލު ދުއްވަން އިނީ އެ ކެޓަގަރީގެ އެއްގަމު އުޅަނދު ދުއްވުމުގެ ލައިސަންސް އޮތް ފަރާތެއް ނޫން ކަމަށްވެސް ފުލުހުން މަޢުލޫމާތު ދެއެވެ.

މި ހާދިސާއާ ގުޅިގެން އަނިޔާވި ދެބެންގެދެދަރި ދެ ޒުވާނުންގެ އާއިލާއިން ސޯޝަލް މީޑިއާގައި ހިއްސާކޮށްފައިވާ ގޮތުގައި، އެ ދެ މީހުންނަކީ   ސައިކަލު ދުއްވީ ޤަވާއިދާ އެއްގޮތަށެވެ. ނަމަވެސް، އަނެއް ސައިކަލުގައި ތިބި ތިން މީހުންގެ ޒިންމާދާރުކަން ކުޑަ ޢަމަލުގެ ސަބަބުން މި ދެބެންނަށް ވަނީ ފުރާނައަށް ނުރައްކާވާ ފަދަ ބޮޑެތި އަނިޔާތަކެއް ލިބިފައެވެ.

އާއިލާއިން ބުނި ގޮތުގައި، އެކެއްގެ ސިކުނޑިއަށް ލޭ އެޅިފައިވާތީ (އިންޓަރނަލް ބްލީޑިންގ) ވަގުތުން ވަނީ އިމަޖެންސީ އޮޕަރޭޝަނެއް ކޮށްފައެވެ. އަދި އޭނާގެ ހާލަތު ވަރަށް ނާޒުކު ކަމަށާއި އާއިލާ އޮތީ ބޮޑު ހާސްކަމެއްގެ ތެރޭގައި ކަމަށް ބުނެ ހެޔޮދުޢާ ކޮށްދިނުމަށް ވަނީ އެދިފައެވެ.

ދެވަނަ ޒުވާނާއަށް ލިބުނު އަނިޔާތަކުގެ ތަފްސީލު ހާމަކުރަމުން އާއިލާއިން ބުނީ، އޭނާގެ މޫނަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށެވެ. އަދި މޫނު މާބޮޑަށް ދުޅަވެފައި ހުރުމުގެ ސަބަބުން މިވަގުތު އޮޕަރޭޝަން ނުކުރެވޭ ކަމަށާއި، ދުޅަ ތިރިވިހާ އަވަހަކަށް ސާޖަރީ ހަދަން ޖެހޭނެ ކަމަށް ޑޮކްޓަރުން ބުނެފައިވާ ކަމަށެވެ. އޭނާއަށް މިހާރު ފަރުވާ ދެމުން ދަނީ އައިޖީއެމްއެޗުގެ އައިސީޔޫގައެވެ.

މި ނުރައްކާތެރި އެކްސިޑެންޓުގެ މައްސަލަ ދިވެހި ފުލުހުންގެ ޚިދުމަތުން ދަނީ ތަޙުޤީޤު ކުރަމުންނެވެ.