ލަންކާގައި އަޝްމަލީ ގެ މައްޗަށް ކުރި ދައުވާ ސާބިތެއް ނުވި!

އަވައްޓެރި ސްރީލަންކާގައި އެގައުމުގެ އުމުރުން 15 އަހަރުގެ އަންހެންކުއްޖަކު ލައްވައި ގަދަކަމުން ހަށިވިއްކުވި މައްސަލައިގެ ތުހުމަތުގައި ގާތްގަނޑަކަށް މީގެ ތިން އަހަރުކުރިން ހައްޔަރުކުރި، ފިނޭންސް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު އަޝްމަލީ ދޫކޮށްލައިފިއެވެ.

އަޝްމަލީގެ މައްޗަށް ކުރީ ކުޑަކުއްޖެއްގެ ބޭނުން ޖިންސީ ގޮތުން ނަހަމަ ގޮތުގައި ހިފުމުގެ ދައުވާ އެވެ.

ކޮލަމްބޯ ކޯޓުން ކުރި ދައުވާގައި އަޝްމަލީ ދޫކޮށްލީ އެކަށިގެންވާ ހެކި ނެތުމުން ގާނޫނީ ފިޔަވަޅު އެޅެން ނެތް ކަމަށް ބުނެއެވެ. އަޝްމަލީ ހިމެނޭހެން މި މައްސަލައިގައި ހައްޔަރު ކުރި 32 މީހުންގެ ތެރެއިން 17 މީހަކު ވަނީ ދޫކޮށްލާފައެވެ.

ސްރީލަންކާގެ ފުލުހުންގެ ތަރުޖަމާނު ސީނިއަރ ޑެޕިއުޓީ އިންސްޕެކްޓަރ ޖެނެރަލް އަޖިތު ރޯހާނާ އޭރު ވިދާޅުވީ ފައިސާދީގެން އަޝްމަލީ އެ ކުއްޖާއާއި އެކު ބަދުއަޚުލާގީ އަމަލު ހިންގާފައިކަމަށް ތުހުމަތުކުރެވޭކަމަށެވެ.

އަޝްމަލީ ދޫކޮށްލާފައިވާއިރު، މި މައްސަލައިގައި އޮތް މި އައިިޑެންޓިފިކޭޝަން ޕެރޭޑްގައި، އެ އަންހެންކުއްޖާ ވަނީ އަޝްމަލީ އޭނާއާއި އެކު ޖިންސީ ގުޅުން ހިންގިކަމަށް ބުނެފައެވެ. އައިޑެންޓިފިކޭޝަން ޕެރޭޑަކީ ހައްޔަރުކުރެވުނު ފަރާތަކީ ކުށުގެ ވެށީގައި ހުރި ފަރާތެއްކަން ކަށަވަރުކުރުމަށް ކޯޓުން ކުރާ ކަމެކެވެ.

މި މައްސަލައިގައި ކޯޓުގައި އަޝްމަލީ ގެ ވަކީލު ބުނެފައިވަނީ ކޮލަމްބޯގެ މަޝްހޫރު މެރީނޯ ބީޗް ހޮޓެލުން ކޮޓަރިއެއް ހިފައިގެން އަޝްމަލީ ދިޔައީ އޮންލައިންކޮށް މަސާޖަކަށް ބުކިންގ ހައްދައިގެން ކަމަށެވެ. އަދި އެ އަންހެންކުއްޖާއާއި އެކުގައި ޖިންސީ ގުޅުން ހިންގި ކަމުގެ ތުހުމަތުތައް އަޝްމަލީ ގެ ފަރާތުން ވަނީ ދޮގު ކޮށްފައެވެ.

2021 ވަނަ އަހަރު މި މައްސަލައިގައި ކޯޓަށް އަޝްމަލީ ހާޒިރު ކުރުމުން  އޭނާ 25،000 ރުޕީސްގެ ކަފާލާތެއްގެ ދަށުން ދޫކޮށްލީ  އޭނާގެ ސަބަބުން ހެއްކަށް ނުފޫޒު ފޯރުމުގެ ފުރުސަތު ކުޑަކަމަށް ބުނެއެވެ. އަޝްމަލީ ދޫކޮށްލީ، ޕާސްޕޯޓް ހިފެހެއްޓުމުގެ އިތުރުން، ފަސް މިލިއަން ޑޮލަރުގެ ދެ ގެރެންޓީއެއް ބެހެއްޓުމަށް އަންގާފައެވެ.

މި މައްސަލައިގައި ހައްޔަރު ކުރި މީހުންގެ ތެރޭގައި މި ކުޑަ އަންހެންކުއްޖާ ލައްވައި ގަދަކަމުން ހަށިވިއްކުވުމަށްޓަކައި ވެބްސައިޓެއްގައި އިސްތިހާރު ޑިޒައިންކުރި މީހާގެ އިތުރުން ކުއްޖާގެ އަމިއްލަ މަންމަވެސް ހިމެނެއެވެ.

މައްސަލަ ހިގާފައިވާ ގޮތަށް ބަލާއިރު، މި ކުޑަ އަންހެންކުއްޖާ ލައްވައި ގަދަކަމުން ހަށިވިއްކުވުމަށްޓަކައި ވަނީ ވެބްސައިޓެއްގައި ވަކި އިސްތިހާރެއް ޖަހާފައެވެ. އަދި ތިން މަސް ވަންދެން އެ ކުއްޖާ ލައްވައި ވަނީ އެތައް ބަޔަކަށް ގަދަކަމުން ހަށިވިއްކުވާފައެވެ.

މި އަންހެންކުއްޖާ ލައްވައި ގަދަކަމުން ހަށިވިއްކުމުގެ ކަންތައްތައް ހިންގާފައިވަނީ މައުންޓް ލެވީނިޔާ ސަރަހައްދުގައި ހުރި ފްލެޓެއްގައެވެ. މިއީ ގިނަ އަދަދަކަށް ދިވެހިން އުޅޭ ސަރަހައްދެއްކަންވެސް ފާހަގަކޮށްލެވެއެވެ.