އާޒިމާގެ މައްޗަށް އިތުރު ދައުވާއެއް ހުށަހަޅާފައެއް ނުވޭ؛ ދައުރުވާ ލިޔުތައްވެސް ސައްހައެއް ނޫން: ސިވިލްކޯޓް

ޕީޕީއެމް ޕީއެންސީގެ ޓިކެޓްގައި މާލޭ މޭޔަރ ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރުގެ މައްޗަށް އިތުރު ދައުވާއެއް ކުރަން ދިވެހިރާއްޖޭގެ ސިވިލް ކޯޓަށް ހުށަހަޅާފައި ނުވާ ކަމަށް އެ ކޯޓުން ބުނެފިއެވެ.

ސިވިލް ކޯޓުން މިފަދައިން ބުނީ، އާޒިމާ ހުޅުމާލޭގެ ޕްލެޓިނަމް ރެސިޑެންސުން 2016 ވަނަ އަހަރުގެ ތެރޭގައި ބައްލަވައިގެންފައިވާ ފްލެޓް ގަތުމަށް އެތަން ހެދި ކުންފުނިން އޭނާއަށް ލޯނެއްގެ ގޮތުގައި ދީފައިވާ 1.96 މިލިއަން ރުފިޔާ ނުދައްކައިގެން ސިވިލް ކޯޓަށް ދައުވާ ކޮށްފައިވާ ކަމަށް ބުނެ 'ދައުރު' ނޫހުން ލިޔެފައިވާ ޚަބަރު ދޮގުކޮށް ނެރުނު ބަޔާނުގައެވެ.

އެގޮތުން އެ ބަޔާނުގައި ބުނީ، ދައުރު ނޫހުގައި "އާޒިމާ ފްލެޓް ގަންނަން ކުންފުންޏަކުން ދިން 1.9 މިލިއަން ރުފިޔާ ނުދައްކައިގެން އިތުރު ދައުވާއެއް" ނަމުގައި ޝާއިޢު ކޮށްފައިވާ ޚަބަރުގައި އެފަދަ މައްސަލައެއް ސިވިލް ކޯޓަށް ހުށަހެޅި މައްސަލައިގެ ހުކުމް މާދަމާ ކުރަން ހަމަޖެހިފައިވާ ކަމަށް ބުނެފައި ވީ ނަމަވެސް، އެފަދަ މައްސަލައެއް ސިވިލް ކޯޓުގައި ރެޖިސްޓާރ ކުރެވިފައިވެސް ނުވާ ކަމަށެވެ.

އަދި މި މައްސަލައިގެ ލިޔެކިޔުންތަކެއް ކަމަށްބުނެ ދައުރު ނޫހުގައި ބަޔާންކޮށްފައިވާ ލޔެކިއުންތަކަކީ ޞައްޙަ ލިޔެކިޔުންތަކެއް ނޫން ކަމަށް ސިވިލް ކޯޓުގެ ބަޔާނުގައި ވެއެވެ.

އެހެން ކަމުން، ރައްޔިތުން ކުރިމަތީގައި ކޯޓާއިމެދު ނުބައި ތަޞައްވުރެއް އުފދޭގޮތަށް އަދި ކޯޓުގެ ލިޔުންތައް ކަމަށް ބުނެ ސައްޙަނޫން ލޔުންތައް ތައްޔާރުކޮށް ކޯޓުގެ އަގު ވެއްޓޭގޮތަށް ކުރާ މިފަދަ ނޭދެވޭ އަމަލުތައް މިކޯޓުން ހަރުކަށި އިބާރާތުން ކުށްވެރިކުރަމެވެ. އަދި މިފަދަ އަމަލުތަކާ ކޯޓުގެ ޙުރުމަތް ކެނޑުމުގެ އަމަލެއްކަމުގައި ބަލައި، އެފަރާތްތަކާމެދު ގާނޫނީ އިމުގެތެރެއިން އެޅެންހުރި އެންމެ ހަރުކަށި ފިޔަވަޅު އަޅާނެކަން އަންގަމެވެ.

ސިވިލް ކޯޓު

ސިވިލް ކޯޓުން މިފަދައިން ބުނެފައިވާއިރު، ދައުރު ނޫހުގެ އެ ޚަބަރާއި ގުޅިގެން ޢާޒިމާވެސް ވަނީ ބަޔާން ނެރެފައެވެ.

އެގޮތުން ނެރުނު ބަޔާނުގައި އޭނާ ވަނީ އެވާހަކަ ދޮގުކޮށް، އެކަމާއި ގުޅިގެން ފިޔަވަޅުތަކެއް އެޅުމަށް އޭނާގެ ވަކީލުންގެ ޓީމުން ނިންމަވައި މަސައްކަތް ފަށްޓަވާފައިވާ ކަމަށް ވިދާޅުވެފަ އެވެ.

އެ ގޮތުން އެޅުމަށް ނިންމާފައިވާ ފިޔަވަޅު ތަކަކީ؛

1) ދައުރު ނޫހުގައި، ދޮގު ހަބަފަތުރައި، ލޔުންތައް އުފައްދައި ފެބްރިކޭޓްކޮށް ޢާޒިމާގެ އަބުރަށް އަރައިގަނެ، އަދި އޭނާއާ ބެހޭ ގޮތުން ދޮގު މައުލޫމާތު ފަތުރާފައިވާ ކަމަށް ބުނެ، އެ މައްސަލަ ބައްލަވައި ފިޔަވަޅު އަޅައި ދެއްވުން އެދި މޯލްޑިވްސް ޕޮލިސް ސަރވިސަސް އަށް ހުށަހެޅުން

2) ޢާޒިމާގެ އިންތިހާބީ ޙައްގަކަށް ދައުރު ނޫހުން އަރައިގެންފައިވާ ކަމަށް ބުނެ، އެމައްސަލަ ބައްލަވައި ދެއްވުންއެދި އިލެކްޝަންސް ކޮމިޝަނަށް ހުށަހެޅުން

3) އަބުރުގެ ދައުވާ ސިވިލް ކޯޓަށް ހުށަހެޅުން