ބަލިވީ ރައީސް މުޢިއްޒުގެ ސިޔާސަތު ގޯސްވެގެނެއް ނޫން، މަސައްކަތް ނުކުރެވުނީމަ: ޢަބްދުއްރަޙީމް

އިއްޔެ ބޭއްވުނު ބައި އިލެކްޝަން އިންތިހާބުގައި މޭޔަރުގެ ގޮނޑި ކާމިޔާބު ނުކުރެވުނީ އެންމެ އެކަށީގެންވާ ގޮތުގައި މަސައްކަތް ނުކުރެވުމުން ކަމަށާ، އެއީ ސަރުކާރުގެ ސިޔާސަތުތައް ކަމު ނުގޮސްގެން ވީ ކަމެއް ނޫން ކަމަށް ސަރުކާރު ހިންގާ ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ.

އިންތިޚާބުގެ ނަތީޖާއާއި ގުޅޭގޮތުން ނޫސްވެރިންނަށް މަޢުލޫމާތު ދެއްވަމުން ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވީ، އިއްޔެގެ އިންތިޚާބުން ވަރަށް ގިނަ ފިލާވަޅު ތަކެއް ލިބިލެއްވި ކަމަށެވެ.

އެންމެ ފުރަތަަމަ ކަމަކަށް، އަޅުގަނޑުމެން ހަމަ، ޕާޓީގެ އެންމެހާ އާއްމު މެންބަރުންގެ ކިބައިން މަޢާފަށް އެދެން. މަޢާފަށް އެދޭ ސަބަބަކީ އަޅުގަނޑުމެންނަށް އެކަށީގެންވާ މިންވަރަކަށް މަސައްކަތް ނުކުރެވުމުގެ ސަބަބުން މި ނަތީޖާ މި ނުކުތީ. ހަގީގަތުގައިވެސް. އަޅުގަނޑުމެންނަށް ސަރުކާރު ލިބި، ސަރުކާރާއި ހަވާލުވެ އުޅުމުގެ ތެރެއިން ހަގީގަތުގައި މި އިންތިޚާބަށް ދޭންވާ ސަމާލުކަމެއް އަޅުގަނޑުމެންނަކަށް ނުވެއް ދެވުނު، އޭގެ ނަތީޖާއަކަށް މިވީ މޭޔަރ ކަމުގެ ގޮނޑި އަޅުގަނޑުމެންނަށް މިއަދު ނުލިބުން.

އަބްދުއްރަހީމް އަބްދުالله

އަބްދުއްރަހީމް ވިދާޅުވީ، އިއްޔެގެ އިންތިޚާބުގައި ލިބުނު ނަތީޖާއިން ފިލާވަޅު ލިބިގަނެ، ކުރިއަށް އޮތް އިންތިޚާބު ތަކުގައި އިތުރަށް މަސައްކަތް ކުރައްވައި ކާމިޔާބީ ހޯދުމުގެ މަސައްކަތް ވަރުގަދައަށް ކުރައްވާނެ ކަމަށެވެ.

މީގެ އިތުރުން، މާލޭ މޭޔަރ ކަމުގެ ގޮނޑި ޕީއެންސީއަށް ގެއްލުނީ ރައީސުލްޖުމުހޫރިއްޔާ ޑރ މުހައްމަދު މުޢިއްޒުގެ ސަރުކާރަށް ދިވެހިން، މިހާރު ނޫނެކޭ ބުނެފައިވާތީ ކަމަށް ބުނެ ދެކެވޭ ވާހަކަ ތަކަށް ރައްދު ދެއްވަމުން އަބްދުއްރަހީމް ވިދާޅުވީ، މޭޔަރގެ ގޮނޑި ގެއްލުނީ ރައީސް މުޢިއްޒުގެ ސިޔާސަތުތައް ރައްޔިތުންނަށް ކަމުނުދާތީ ނޫން ކަމަށެވެ.

އަޅުގަނޑުމެންނަށް މިދިޔަ ދުވަސްވަރު، އަޅުގަނޑުމެންގެ ޢާއްމު މެންބަރުންނާއި އެކު، މަސައްކަތް ކުރަންވާ ގޮތަށް މަސައްކަތް ނުކުރެވުމުގެ ނަތީޖާ އެ. އިންތިޚާބުގައި ފެނިގެންދިޔައީ. އެއްގޮތަކަށްވެސް ސަރުކާރުގެ ސިޔާސަތައް އިތުބާރު ނެތީކީނޫން. ރައީސުލްޖުމްހޫރިއްޔާ އަށް އިތުބާރު ނެތީކީއެއްވެސް ނޫން. އަދި ރައީސުލްޖުމްހޫރިއްޔާ ރައްޔިތުންނަށްޓަކައި ކަމެއް ނުކޮށްދެއްވައި ގެނެއްވެސް ނޫން. އެއްގޮތަކަށްވެސް އަޅުގަނޑުމެންނަށް ގަބޫލެއް ނުކުރެވޭ، މިއީ ރައީސުލްޖުމްހޫރިއްޔާ ގެ ސިޔާސަތައް އިތުބާރު ނެތީގެ ދިމާވި ކަމެއް ކަމަކަށް.

އަބްދުއްރަހީމް އަބްދުالله

މިއާއެކު އަދުރޭ ވަނީ، ކުރިއަށް އޮތް ތަނުގައި މެންބަރުން މާޔޫސްވާ ފަދަ އެއްވެސް ކަމެއް ނުކުރައްވާނެ ކަމުގެ ޔަގީންކަން ދެއްވާފައެވެ.

އިއްޔެ ބޭއްވި މާލޭ މޭޔަރ އިންތިޚާބުގައި އިއްޔެގެ އިންތިހާބުގައި ވޯޓުލުމުގެ ހައްގު ލިބިގެންވާ 54,680 މީހުންގެ ތެރެއިން ވޯޓުލާފައި ވަނީ 17,410 މީހުންނެވެ. ޕަސެންޓޭޖުން ބަލާނަމަ އެއީ 31.84 ޕަސެންޓެވެ.

އޭގެ ތެރެއިން 7621 ވޯޓު ހޯއްދެވީ އާޒިމް އެވެ. އޭނާއާ އެންމެ ގާތުން ވާދަ ކުރެއްވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އާޒިމާ ޝަކޫރެވެ. އޭނާއަށް ގާތްގަނޑަކަށް 5031 ވޯޓު ލިބިވަޑައިގަތެވެ.

މޭޔަރ ގެ ގޮނޑި ސަރުކާރަށް ނުލިބުނު ނަމަވެސް، އިއްޔެގެ އިންތިޚާބުގައި ހެންވޭރު ދެކުނު ދާއިރާގެ ގޮނޑި އާއި މާފަންނު ދެކުނު ދާއިރާގެ ކައުންސިލްގެ ކާމިޔާބު ކުރެއްވީ ޕީއެންސީންނެވެ.

އެ ނަތީޖާއާ އެކު ކައުންސިލްގެ މެޖޯރިޓީ އޮންނާނީ ސަރުކާރަށެވެ. އެގޮތުން މާލެ ސިޓީ ކައުންސިލްގައި މިހާރު އެމްޑީޕީގެ ތިން މެންބަރުން ހިމެނޭއިރު ދަ ޑިމޮކްރެޓްސްގެ ދެ މެންބަރު އަދި ޕީއެންއެފްގެ ދެ ކައުންސިލަރަކު ހިމެނެ އެވެ. ދެން ތިއްބެވީ ޕީޕީއެމް / ޕީއެންސީގެ ކައުންސިލަރުންނެވެ. ސަރުކާރު ހިންގާ އެ ދެ ޕާޓީއަށް ނިސްބަތްވާ 11 ކައުންސިލަރުން މާލެ ސިޓީ ކައުންސިލް ގައި އެބަތިއްބެވެ.