ޒުވާނުން ބާރުވެރިކުރުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރައްވަމުން: އަސްވާޑް

ޒުވާނުން ބާރުވެރިކުރުމަށް މި ސަރުކާރުން ދަނީ ގިނަގުނަ މަސައްކަތްތަކެއް ކުރައްވަމުން ކަމަށާ ޒުވާނުންނަކީ ގައުމުގެ އެންމެ އަގުހުރި ތަރިކަ ކަމަށް މިނިސްޓަރ އޮފް ޔޫތު އެމްޕަވަމެންޓް، އިންފޮމޭޝަން އެންޑް އާޓްސް އިބްރާހިމް ވަހީދު (އަސްވާޑް) ވިދާޅުވެއްޖެއެވެ.

ބައިނަލްއަގުވާމީގޮތުން ފާހަގަކުރާ ޒުވާނުންގެ ދުވަހު ދެއްވި ޚިތާބުގައި މިނިސްޓަރ ވިދާޅުވީ ޒުވާނުންނަކީ ގައުމުގެ އެންމެ އަގުހުރި ތަރިކަ ކަމަށާއި، ޒުވާނުން ބާރުވެރިކޮށް، ހަގީގީ މާނައިގައި ޒުވާނުންނަށް ކާމިޔާބު މުސްތަގުބަލެއް ހޯދައިދިނުމަކީ މިހާރުގެ ސަރުކާރާއި ރައީސް ޑރ.މުހައްމަދު މުއިއްޒުގެ ފާޅުކަން ބޮޑު ސިޔާސަތެއް ކަމަށެވެ.

ޒުވާނުންނާ ދިމާވެފައި އިޖުތިމާއީ މައްސަލަތަކާ ދުރުކޮށް، ޒުވާނުންނަކީ މި ގައުމަށް ފައިދާހުރި، މި ގައުމު އެދޭ ފަދަ ދަރިންތަކަކަށް ހެދުމަށްޓަކައި ގިނަގުނަ މަސައްކަތްތަކެއް ކުރެވެމުން އެބަދޭ. މީގެ ތެރެއިން އެއްކަމަކީ ޒުވާނުންނާ ބެހޭ ގައުމީ ސިޔާސަތެއް އެކުލަވާލުން. އިރާދަ ކުރެއްވިއްޔާ މީގެ ފޮނި މޭވާ، ލަސްތަކެއް ނުވެ ދިވެހި ޒުވާނުންނަށް ލިބެމުންދާނެ. އަދި މި ސިޔާސަތު އެކުލަވާލުމުގައި ދިވެހި އެންމެހާ ޒުވާނުންނާއި މަޝްވަރާކުރެވި، އެއްވެސް ޒުވާނެއް ބާކީ ނުވާނެކަމުގެ ޔަގީންކަން ދެން، މި ސިޔާސަތަކީ ދިވެހި ޒުވާނުންގެ ސިޔާސަތު، މިއީ އަޅުގަނޑުމެންގެ ސިޔާސަތު.

ވަޒީރު އަސްވާޑް ވިދާޅުވިއެވެ.

މިނިސްޓަރުގެ ޚިތާބުގައި ފާހަގަކުރެއްވި ގޮތުގައި، ޒުވާނުންނާ ބެހޭ ގައުމީ ސިޔާސަތެއް އެކުލަވާލުމުގެ މަސައްކަތް ދަނީ ކުރެވެމުންނެވެ. މި ސިޔާސަތު އެކުލަވާލުމުގައި ދިވެހި އެންމެހާ ޒުވާނުންނާ މަޝްވަރާކުރެވޭނެ ކަމަށާއި، އެއްވެސް ޒުވާނެއް ބާކީ ނުވާނެ ކަމުގެ ޔަގީންކަން އެމަނިކުފާނު ދެއްވިއެވެ.

މިނިސްޓަރުގެ ޚިތާބުގައި އިތުރަށް ވިދާޅުވީ ފަންނިއްޔާތުގެ ދާއިރާއިން ޒުވާނުން ކުރިއެރުވުމަށް ސަރުކާރުން ނުހަނު އިސްކަމެއް ދޭ ކަމަށެވެ. މިގޮތުން، މިއަހަރު ތެރޭގައި ވެސް ތަފާތު އެތަކެއް ޕްރޮގްރާމެއް ހިންގިފައިވާ ކަމަށް އެމަނިކުފާނު ފާހަގަކުރެއްވިއެވެ.

ވަޒީފާގެ ފުރުސަތުތަކާ ގުޅޭގޮތުން ވާހަކަދައްކަވަމުން، މިނިސްޓަރ ވިދާޅުވީ ވަޒީފާއެއް އަދާކުރަން ބޭނުންވާ ކޮންމެ ދިވެހި ޒުވާނަކަށް، އެ ޒުވާނެއްގެ ތަޢުލީމާއި ތަޖުރިބާ އަދި ހުނަރާ އެކަށޭނަ، ރަނގަޅު އާމްދަނީއެއް ލިބޭ ވަޒީފާއެއް 5 އަހަރުގެ ތެރޭގައި ހޯދައިދިނުމަށް ސަރުކާރުން މަސައްކަތްކުރަމުންދާ ކަމަށެވެ.

މީގެ އިތުރުން، ނެޝަނަލް އެޕްރެންޓިސްޝިޕް ޕްރޮގްރާމް ކުރިއަށް ގެންދެވޭ ކަމަށާއި، މިހާރު 180 ޒުވާނުން މި ޕްރޮގްރާމް ފުރިހަމަކޮށް ޒިންމާދާރު ވަޒީފާތައް އަދާކުރަމުންދާއިރު، އިތުރު 60 ޒުވާނުން ދަނީ ޕްރޮގްރާމް ފުރިހަމަކުރަމުން ކަމަށް މިނިސްޓަރގެ ޚިޠާބުގައި ހާމަކުރެއްވިއެވެ.

ނިންމާލަމުން މިނިސްޓަރ ޒުވާނުންނަށް އިލްތިމާސްކުރެއްވީ އާ އަޒުމަކާއެކު ހީވާގިކަމާއި މުރާލިކަމާއެކު، ސާފު އަމާޒެއް ކަނޑައަޅައި އެ އަމާޒު ހާސިލްކޮށް، ތިމާ ދެކޭ މުސްތަގުބަލުގެ ހުވަފެންތަކުގައި ކުލަޖެއްސުމަށެވެ.