މަންޑޭގެ ޕެންޓް ހައުސް އާއި އެތަނުގައި ހުރި މުދާތައް ދައުލަަތަށް ނަގަނީ

ކޭ-ޕާރކް ރެޒިޑެންސްގެ އެޕާޓްމަންޓްތައް ވިއްކުމުގައި އޮޅުވާލުމާއި، މަކަރާއި ޙީލަތުގެ ކުށުގައި 397 އަހަރަށް ޖަލަށް ލުމަށް ހުކުމްކޮށްފައިވާ ހަސަން މަމްދޫހު (މަންޑޭ)ގެ އެޕާޓްމަންޓާއި އެތަނުގައި ހުރި މުދާތައް ދައުލަަތަށް ނެގުމަށް ނިންމައިފިއެވެ.

ވޮއިސްއަށް މައުލޫމާތު ހިއްސާކުރި ޕްރޮސެކިއުޓަރ ޖެނެރަލްގެ އޮފިޝަލަކު ވަނީ އެކަން ޔަގީންކޮށްދީފައެވެ. ޕީޖީ އޮފިޝަލް ވިދާޅުވީ މަންޑޭ ދިރިއުޅުނު އެޕާޓްމަންޓާއި އެތަނުގައި ހުރި މުދާތައް ދައުލަތަށް ނެގުމަށް ނިންނާފައިވާކަމަށެވެ.

ކޭޕާކު ފުލެޓުތައް އޮޅުވާލައިގެން ގިނަ އަދަދެއްގެ މީހުންނަށް ވިއްކި މައްސަލާގައި ތުހުމަތު ކުރެވޭ ހަސަން މަމްދޫހު (މަންޑޭ)ގެ މައްޗަށް 94 ދައުވާ ސާބިތުވުމާ ގުޅިގެން އިއްޔެ ވަނީ އޭނާ 397 އަހަރަށް ޖަލަށް ލުމަށް ހުކުމްކޮށްފައެވެ. މަމްދޫޙް އާއި އިތުރު ބަޔަކު ބައިވެރިވެގެން ހަންބޯ ކޮމްޕެނީ ޕްރައިވެޓް ލިމިޓެޑުގެ މެޖޯރިޓީ ހިއްސާދާރުކަމުގައިވާ ޗައިނާ، ޖިން ޝިހޫ، ގެ ސޮއި ފޯޖުކޮށްގެން ލިޔެކިޔުންތަކެއް ހަދައިގެން ބޭންކް އޮފް މޯލްޑިވްސްގައި އެ ކުންފުނީގެ ނަމުގައި ބޭންކް އެކައުންޓް ހުޅުވައި ހަންބޯގެ ފަރާތުން ކޭ-ޕާކް ރެސިޑެންސްގެ ނަމުގައި ހުޅުމާލޭގައި އިމާރާކުރަމުންދާ އިމާރާތުގެ އެޕާޓްމަންޓްތައް އޮޅުވާލާއިގެން މަކަރާއި ޙީލަތުން ޢާއްމު ފަރާތްތަކަށް ވިއްކައި ބައެއް އެޕާޓްމަންޓްތައް އެއް ފަރާތަށް ވުރެ ގިނަ ފަރާތަށް ވުރެ ގިނަ ފަރާތަށް ވިއްކައި އެފައިސާއަށް ޚިޔާނާތްތެރިވެ އެފައިސާ ލޯންޑާކޮށްފައިވާ ކަމަށް ތުޙުމަތުކުރެވޭ މައްސަލާގައި 94 ދައުވާއެއް ވަނީ އުފުލާފައެވެ.

މި މައްސަލާގައި ފުލުހުން ވަނީ އެފްޑަބްލިއު ރެސިޑެންޓްގައި ހުރި މަންޑޭގެ ޕެންޓްހައުސް 2023 ވަނަ އަހަރުގެ ނޮވެމްބަރުމަހުގެ 18 ވަނަ ދުވަހު ބަލާ ފާސްކޮށްފައެވެ. ޕެންޓްހައުސްގެ ތެރެއިން ފެނުނު ގަހަނާއާއި، އަތް ދަބަހާއި ސެންޓުގެ އަގު 7 މިލިއަނަށްވުރެ ގިނަ ކަމަށް ޕީޖީ އޮފީހުން މީގެ ކުރިން ވަނީ ބުނެފައެވެ. އޭގެ ފަހުން އެތަން ހުސްކުރުމަށްފަހު އެޕާޓްމަންޓާއި އެތަނުގައި ވަނީ ފުލުހުންގެ ބެލުމުގެ ދަށަށް ގެނެސްފައެވެ.

އެ ޕެންޓްހައުސް ބަލައިފާސްކޮށް ފުލުހުންގެ ޚިދުމަތުގެ ބެލުމުގެ ދަށަށް ގެނެސްފައިވާ މުދަލުގެ ތެރެއިން ހަމައެކަނި އަތްދަބަހާއި، ސެންޓު ފުޅިތަކާއި، ބޫޓާއި ފައިވާން، އަދި ގަހަނާތަކުގެ ލަފާކުރެވޭ އަގު 07 (ހަތެއް) މިލިއަން ދިވެހި ރުފިޔާއަށްވުރެ ގިނަކަމަށް ޕީޖީން ވަނީ އޭރު ބުނެފައެވެ.

މަންޑޭ ދިރިއުޅެމުންދިޔަ އެފް.ޑަބްލިއު ރެޒިޑެންސްގެ ޕެންޓްހައުސްއަކީ، ސައްޙަ ނޫން ލިޔުންތައް ހުށަހަޅައިގެން ސޮއި ފޯޖުކޮށް ބޭންކަށް އޮޅުވާލައިގެން ހުޅުވާފައިވާ ހަންބޯ ކޮމްޕެނީ ޕްރައިވެޓް ލިމިޓެޑްގެ އެކައުންޓަށް އެކި މީހުން އެޕާޓްމަންޓް ގަތުމަށް ޖަމާކުރި ފައިސާއިން ގަނެފައިވާ ތަނެއްކަން ފައިނޭންޝަލް އެސެސްމަންޓްތަކުން އެނގޭ ކަމަށް ޕީޖީ އޮފީހުން ބުނެއެވެ. އެތަން ގަނެފައިވަނީ 7.8 މިލިއަން ރުފިޔާއަށެވެ.