މަޖިލީހަށް ކުރިމަތިލީ %10 އަންހެނުން: އީސީ

ރައްޔިތުންގެ މަޖިލީހުގެ އިންތިޚާބު 2024 އަށް ކުރިމަތިލެއްވި ކެންޑިޑޭޓުންގެ ތެރެއިން އަންހެނުންގެ އިންސައްތަ އަކީ 10.76 ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އިލެކްޝަންސް ކޮމިޝަނުގެ ނާއިބު ރައީސް އިސްމާއީލް ހަބީބު ރޭ ކުރެއްވި ޕޯސްޓެއްގައި ވިދާޅުވީ، މަޖިލީހަށް ކުރިމަތިލީ ކެންޑިޑޭޓުންގެ ކެނޑިޑެންސީ އާ މެދު، ނިންމި ނިންމުން، ރޭގެ ނިޔަލަށް، އީމެއިލްގެ ޒަރީއާއިން، އަންގާނެ ކަމަށެވެ.

އަދި ސައްޙަނޫން ކަމަށް ނިންމި ނިންމުންތައްވެސް އެ ކެންޑިޑޭޓުންނަށް ރޭ ލިބިވަޑައިގަންނަވާނެ ކަަމަށްވެސް ވިދާޅުވި އެވެ.

އިންތިޚާބަށް ކުރިމަތިލެއްވި ބޭފުޅުންގެ ތެރެއިން % 10.76 އިންސައްތައަކީ އަންހެން ބޭފުޅުން.

އިސްމާއީލް ހަބީބު

މީގެ އިތުރުން ހަބީބު ވިދާޅުވީ މާދަމާ މެންދުރުފަހު 14:00 ން ފެށިގެން ގުރުއަތުލުން އޮންނައިރު، ޝަރުތު ހަމަވާ ކެންޑިޑޭޓުންނަށް ދަރުބާރުގެއަށް ގުރުއަތު ނެންގެވުމަށް ވަޑައިގަންނަވަންވީ ގަޑިވެސް ރޭ އަންގާނެކަމަށެވެ. އަދި ގަޑިތައް ސަރުކާރުގެ ގެޒެޓުގައި ޝާއިޢު ކޮށްފައިވެސްވާނެ ކަމަށެވެ.

މަޖިލިސް އިންތިހާބަށް ކުރިމަތިލުމުގެ ސުންގަނޑި ހަމަވިއިރު 93 ދާއިރާއަކަށް ޖުމްލަ 381 ހުށަހެޅުން ލިބިފައިވާކަމަށް އީސީން ބުނެފައިވެއެވެ.

އަންނަ މާރިޗު 17 ގައި ބޭއްވުމަށް ހަމަޖެހިފައިވާ މަޖިލިސް އިންތިހާބުގައި 284،337 މީހަކަށް ވޯޓުލުމުގެ ހައްގު ލިބިފައިވާ ކަމަށް އީސީން ބުނެފައިވެއެވެ.