ހަރަދު ކުޑަކުރަން އިތުރު ފިޔަވަޅެއް؛ މިފްކޯގެ ރަސްމީ ވަގުތު ކުރުކޮށްފި

މެދުއިރުމަތީގެ މަސްރަހަށް އަންނަމުންދާ ބަދަލުތަކާ ގުޅިގެން، ޚަރަދު ކުޑަކުރުމުގެ ގޮތުން މޯލްޑިވްސް ފިޝަރީޒް އެންޑް އެގްރިކަލްޗަރަލް މާކެޓިންގ ކޯޕަރޭޝަން (މިފްކޯ) ގެ އިދާރީ މަސައްކަތު ގަޑިތަކަށް މާދަމާއިން ފެށިގެން ބަދަލުތަކެއް ގެނައުމަށް އެ ކުންފުނިން ނިންމައިފިއެވެ.

މި ބަދަލާއެކު ކުންފުނީގެ ހިންގުމުގެ ޚަރަދުތައް ކުޑަކުރުމަށް ވަނީ އަމާޒު ހިފާފައެވެ.

މިފްކޯގެ ސީނިއާ މެނޭޖާ ޕަބްލިކް ރިލޭޝަންސް ޝިފްޒާ މުސްތަފާ ބުނި ގޮތުގައި، މިހާރު ހެނދުނު 8:00 އިން ހަވީރު 4:00 އަށް އޮންނަ ރަސްމީ ގަޑި، މާދަމާއިން ފެށިގެން މެންދުރުފަހު 2:00 އަށް ވަނީ ކުރުކޮށްފައެވެ. މި ބަދަލަކީ ބައިނަލްއަގުވާމީ މަސްރަހުގައި ހިނގަމުންދާ ހަމަނުޖެހުންތަކުގެ ސަބަބުން ކުންފުންޏަށް ކުރިމަތިވެދާނެ މާލީ ގޮންޖެހުންތަކުން އަރައިގަތުމަށް އެޅި ފިޔަވަޅެކެވެ.

މަސައްކަތު ގަޑިތަކަށް ބަދަލު އައި ނަމަވެސް، ކުންފުނީގެ އޮޕަރޭޝަނަލް މަސައްކަތްތަކަށް އެއްވެސް ބުރޫއެއް ނާރާނެ ކަމުގެ ޔަގީންކަން މިފްކޯއިން ދެއެވެ. ޚާއްސަކޮށް، މިފްކޯގެ ފިހާރަތަކުން އާންމުންނަށް ދެމުންދާ ޚިދުމަތްތައް ކުރިއެކޭވެސް އެއްގޮތަށް މެދުކެނޑުމެއް ނެތި ކުރިއަށްދާނެ ކަމަށް އެ ކުންފުނިން ބުނެއެވެ.

ކުންފުނިން މުވައްޒަފުންނަށް ފޮނުވި ސާކިއުލާއެއްގައި ބުނެފައިވަނީ، މެންދުރުފަހު 2:00 ގެ ފަހުން އޮފީސް ހުޅުވޭނީ ހަމައެކަނި ކޮންމެހެން ކުރަންޖެހޭ މުހިންމު މަސައްކަތްތަކަށް، ޑިޕާޓްމަންޓްތަކުގެ އިސްވެރިންގެ ހުއްދަ ލިބިގެން ކަމަށެވެ. އަދި އިތުރުގަޑީގައި މުވައްޒަފުން ނެރެން ޖެހޭނީ ލިޔުމުން ހުއްދަ ހޯދައިގެން ކަމަށްވެސް އެ ސާކިއުލާގައި ބަޔާންކޮށްފައިވެއެވެ.

ޚަރަދު ކުޑަކުރުމުގެ އިތުރު ފިޔަވަޅުތަކުގެ ތެރޭގައި ތެލާއި ކަރަންޓަށް ހިނގާ ޚަރަދު ކުޑަކުރުން ހިމެނެއެވެ. މިގޮތުން، އެއާކޮންޑިޝަނާއި ލައިޓް ފަދަ ތަކެތި ބޭނުންކުރުން މަދުކުރުމަށް މުވައްޒަފުންނަށް ވަނީ އިރުޝާދު ދީފައެވެ. މީގެ އިތުރުން، ކޮންމެހެން ކުރަންޖެހޭ ދަތުރެއް ނޫނީ ހެޑް އޮފީހުގެ ހުއްދަ ނެތި ނުކުރުމަށާއި، ގޭގައި ތިބެގެން މަސައްކަތް ކުރެވޭނެ ވަސީލަތްތައް ހުރި މުވައްޒަފުން އެ މަގުން އަމަލުކުރުމަށްވެސް ވަނީ އަންގާފައެވެ.