ކެމްޕޭން ދަތުރެއްގައި އިދިކޮޅުގެ ޓީމެއް ދެކުނުގެ ހަތަރު އަތޮޅަށް!

ކުރިޔަށް އޮތް ލޯކަލް ކައުންސިލު އިންތިހާބުގެ ކެމްޕޭން ދަތުރެއްގައި، އިދިކޮޅު ޕީޕީއެމް، ޕީއެންސީގެ ޓީމެއް ދެކުނުގެ ހަތަރު އަތޮޅަށް ފުރައިފިއެވެ.

އިދިކޮޅު ކޯލިޝަނުން ދެކުނުގެ ހަތަރު އަތޮޅަށް ކުރާ ކެމްޕޭން ދަތުރުގައި އައްޑޫ ސިޓީއާއި ތ. އަތޮޅާއި، ގއ. އަތޮޅާއި، ގދ. އަތޮޅާއި ލ. އަތޮޅުގެ ރަށްރަށަށް ދަތުރުކުރާނެއެވެ. އަދި މިވަގުތު ދ. އަތޮޅުގައިވެސް ކެމްޕޭން ޓީމެއް ހަރަކާތްތެރިވަމުންދާކަމަށް އިދިކޮޅުން ބުނެއެވެ.

އިދިކޮޅުން ކެމްޕޭނަށް ފުރުމުގެ ކުރިން ވެލާނާ އިންޓަނޭޝަނަލް އެއާޕޯޓުގައި މިރޭ ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، މި ދަތުރުތަކުގެ ބޭނުމަކީ ޕާޓީގެ ރޫހު އަތޮޅުތަކުގައި ވަރުގަދަ ކުރުމާއި ރައީސް ޔާމީނަށް އޮތް ތާއީދު އިތުރުކުރުމަށް މަސައްކަތް ކުރުން ކަމަށެވެ.

މިދަތުރުގައި ރައީސް ޔާމީން މިނިވަންކުރަން ގޮވާލާ ޕެޓިޝަންގެ މަސައްކަތް ކުރިއަށް ގެންދިއުމުގެ އިތުރުން ލޯކަލް ކައުންސިލްގެ އިންތިހާބަށް ކެމްޕޭން ކުރުންވެސް ހިމެނޭ ކަމަށް އަބްދުއްރަހީމް ވިދާޅުވިއެވެ.

އަބްދުއްރަހީމް އިތުރަށް ވިދާޅުވީ ރައީސް ޔާމީން ޖަލުގައި ހުންނެވި ނަމަވެސް އެމަނިކުފާނު ހުންނެވީ ވަރަށް ސާބިތުކަމާ އެކުގައި ކަމަށެވެ. އަދި ޕީޕީއެމްއާއި ޕީއެންސީގެ މެންބަރުން ކުރައްވާ މަސައްކަތް ރައީސް ޔާމީން ޝުކުރުވެރިކަމާ އެކު ބަލައިގަންނަ ކަމުގައިވެސް އަބްދުއްރަހީމް ވަނީ ވިދާޅުވެފަ އެވެ.

އޭނާ ވިދާޅުވި ގޮތުގައި އިދިކޮޅުގެ ބޭނުމަކީ ރައްޔިތުންނާ ވީހާވެސް ގާތުން މަސައްކަތް ކުރުމެވެ.