މާފަންނުގައި ގާއިމްކުރި އާބަން ޕްރައިމަރީ ހެލްތުކެއާ ސެންޓަރުގެ ހިދުމަތް ދޭން ފަށައިފި

މާލޭގައި ޤާއިމްކުރި ފުރަތަމަ އާބަން ޕްރައިމަރީ ހެލްތުކެއާ ސެންޓަރުގެ ހިދުމަތް މިއަދު ރަސްމީކޮށް ދޭން ފަށައިފިއެވެ.

މާފަންނުކޮޅު ރަސްފަންނު ކައިރީ ގާއިމްކުރި މި ހެލްތުކެއާ ސެންޓަރު ހުޅުވާފައިވަނީ މިދިޔަ ހަފްތާގެ ބުދަދުވަހު ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. މިއީ މާލޭ ސިޓީ ގުރޫޕް އޮފް ހޮސްޕިޓަލްސްއިން މާލެ ސަރަހައްދުގައި ފޯރުކޮށްދޭ ސިއްހީ ހިދުމަތްތައް، ލުއިފަސޭހަ ގޮތެއްގައި ރައްޔިތުންނަށް ލިބޭނެ މަގުފަހިވާ ގޮތަށް ފަރުމާކޮށް ހުޅުވި ސެންޓަރެކެވެ.

މާލޭ ގްރޫޕް އޮފް ހޮސްޕިޓަލްސްއިްނ ބުނެފައިވަނީ މި ސެންޓަރުން ހުކުރުދުވަސް ފިޔަވައި ކޮންމެ ދުވަހަކު އާއްމުކޮށް ހިދުމަތްދޭނޭކަމަށެވެ. ހުކުރު ފިޔަވައި އެހެން ދުވަސްތަކުގައި ހެނދުނު 8:30 އިން ރޭގަނޑު 10 އާ ހަމައަށް ހުޅުވާއިރު ހުކުރުވަހު ސެންޓަރު ހުޅުވުމަށް ނިންމާފައިވަނީ މެންދުރުފަހު 15:30 ހުން ރޭގަނޑު 10:00 އަށެވެ.

މި ސެންޓަރުގެ ހިދުމަތް މައިގަނޑު ގޮތެއްގައި ބެހިފައި ވަނީ ތިން ބަޔަކަށެވެ. އެއީ، އާންމު ބަލިތަކުގެ ޑޮކްޓަރުންނަށް ދެއްކުމާއި އިތުރުފަރުވާ ބޭނުންވާ ހާލަތްތަކުގައި ހާއްސަ ޑޮކްޓަރުންގެ ލަފާ ހޯދުމާއި ފަސޭހައިން ދެއްކޭ ހާއްސަ ޑޮކްޓަރުންނަށް ދެއްކުމުގެ އިންތިޒާމް ހަމަޖައްސައިދިނުމެވެ. އަދި އާންމު ސިއްހަތު ކުރިއެރުވުމަށް ގައުމީ ފެންވަރުގައި ހިންގާ ޕްރޮގްރާމްތައް ވެސް މި މަރުކަޒުގައި ކުރިއަށް ގެންދާނެ އެވެ. އެގޮތުން، ޗައިލްޑް ހެލްތު ކްލިނިކް މެދުވެރިކޮށް، އެކުދިންގެ ހެދިބޮޑުވުން މޮނިޓާކޮށް، ވެކްސިން ދިނުން ފަދަ ހިދުމަތްތައް މި ސެންޓަރުން ފޯރުކޮށްދޭނެ އެވެ. މީގެ އިތުރުން ސިއްހީ ރަނގަޅު އާދަތަކަށް ހޭލުންތެރިކަން އިތުރުކުރުމާއި، ނަފްސާނީ ދުޅަހެޔޮކަމާއި، ދުންފަތާ ދުރުވުމަށް އެހީވެދޭ ކުލިނިކް ފަދަ ކުލިނިކްތަކުގެ ހިދުމަތް ވެސް މި ސެންޓަރުން ލިބޭނެ އެވެ.

އާބަން ޕްރައިމަރީ ހެލްތުކެއާގެ އިތުރު ފަސް ސެންޓަރު މާލެ ސަރަހައްދުގައި ތަރައްގީ ކުރުމަށް ވަނީ ހަމަޖެހިފައެވެ. އެއީ މާލޭގައި ތިންސެންޓަރު އަދި ހުޅުމާލޭގައި ދެ ސެންޓަރެވެ.