ބޭރުގައި ޑެބިޓު ކާޑުން ކެޑޭ ލިމިޓް ތިން ހާސް ޑޮލަރަށް ބޮޑުކޮށްފި

ބޭންކް އޮފް މޯލްޑިވްސް (ބީއެމްއެލް) އިން ބޭރުގެ މުޢާމަލާތްތަކަށް ދިވެހި ރުފިޔާގެ ޑެބިޓް ކާޑު ބޭނުންކުރެވޭ މިންވަރަށް ބަދަލުތަކެއް ގެނެސް، ދަތުރުފަތުރުގެ އަދި ސިއްހީ ބޭނުންތަކަށް ކެޑޭ ލިމިޓް މަހަކު 3،000 ޑޮލަރަށް ބޮޑުކޮށްފިއެވެ.

މާދަމާއިން ފެށިގެން ޢަމަލުކުރާ އެ ބޭންކުގެ އައު އުސޫލުގެ ދަށުން ދިވެހި ރުފިޔާގެ ޑެބިޓް ކާޑު ބޭނުންކޮށްގެން ބޭރުގައި ޕޮއިންޓް އޮފް ސޭލް (ޕީއޯއެސް) މުޢާމަލާތްތަކަށް މަހެއްގެ މައްޗަށް 1،000 އެމެރިކާ ޑޮލަރު ހަރަދުކުރެވޭނެއެވެ.

އަދި ދަތުރުފަތުރުގެ އަދި ސިއްހީ ބޭނުންތަކަށް ހާއްސަކޮށް، މި ލިމިޓް މަހަކު 3،000 އެމެރިކާ ޑޮލަރަށް ބޮޑުކޮށްފައިވީ ނަމަވެސް، ބޭރުގައި ހުންނަ އޭޓީއެމްތަކުން ފައިސާ ނެގޭނެ މިންވަރު މަހެއްގެ މައްޗަށް 125 އެމެރިކާ ޑޮލަރަށް ބަދަލެއް ގެނެސްފައެއް ނުވެއެވެ.

މި ލިމިޓްތައް ކޮންމެ މަހެއްގެ ފުރަތަމަ ދުވަހު އަމިއްލައަށް ރީސެޓްވާނެ ކަމަށް ބީއެމްއެމްއެލްއިން ބުނެއެވެ. އަދި ވިޔަފާރީގެ ޑެބިޓް ކާޑުތަކަށާއި، ބޭރުގައި ދިރިއުޅޭ ދިވެހިންގެ ދިވެހި ރުފިޔާގެ ޑެބިޓް ކާޑުތަކަށް ވެސް ޕީއޯއެސް މުޢާމަލާތްތަކަށް މަހެއްގެ މައްޗަށް 1،000 ޑޮލަރުގެ ލިމިޓް ވަނީ ކަނޑައަޅާފައެވެ.

ރާއްޖެއިން ބޭރުގައި ކިޔަވާ ކުދިންނަށް ހާއްސަ ލިމިޓަށް އެއްވެސް ބަދަލެއް ގެނެސްފައެއް ނުވެއެވެ. ބޭރުގައި ކިޔަވަމުންދާ ނުވަތަ އިންޓާންޝިޕް ހަދަމުންދާ ދަރިވަރުންނަށް މިހާރު ވެސް ލިބޭ މަހެއްގެ މައްޗަށް 1،200 ޑޮލަރުގެ ލިމިޓް ދެމިއޮންނާނެއެވެ.

އަދި ދަރިވަރުންގެ ކާޑުތަކުން އޭޓީއެމް ނެގުމުގެ އަދަދުތަކަށާއި ފީތަކަށް ބަދަލެއް ނާންނާނެ ކަމަށް ބޭންކުން ބުނެއެވެ. އަދި 1،200 ޑޮލަރުގެ ލިމިޓަށް އެދޭ ފަރާތްތަކުން ސްޓޫޑެންޓް ޕޯޓަލް މެދުވެރިކޮށް އެދެވޭނެކަން ވެސް ބީއެމްއެލްއިން ފާހަގަކޮށްފައިވެއެވެ.

ބީއެމްއެލްއިން ވަނީ ކަސްޓަމަރުންނަށް ބޭރުގައި ކުރާ ހަރަދުތައް ރާވާލުމަށް އިލްތިމާސްކޮށްފައެވެ. އަދި މި ބަދަލުތަކަކީ ބޭރުގެ މުޢާމަލާތްތަކާ ގުޅޭ އުސޫލުތައް ބޭންކުން އަބަދުވެސް މުރާޖަޢާކުރަމުންދާ ގޮތުގެ ތެރެއިން ގެނެވުނު ބަދަލުތަކެއް ކަމަށް ވެސް ބޭންކުން ވަނީ ބުނެފައެވެ.