މަޖިލީހުގެ ތަޅުމުގައި އެމްޑީޕީ މެމްބަރުންނަށް ބަސް ބުނާނެ ފުރުސަތެއްނެތް: ނާޒިލް
ލިޔުންތެރިޔާ
އަބްދުﷲ ހުސައިން
ރައްޔިތުން މަޖިލީހުގެ ތަޅުމުގައި މިހާރު އިދިކޮޅު އެމްޑީޕީ މެމްބަރުންނަށް ބަސްބުނާނެ އެއްވެސް ފުރުސަތެއް ނެތްކަމަށާއި، މަޖިލީސް ހިނގަމުންދަނީ ވަކިބައެއްގެ މަސްލަހަތުހިމެނޭގޮތަށްކަމަށް ރައްޔިތުން މަޖިލީހުގެ ހިތަދޫ ދެކުނު ދާއިރާގެ މެމްބަރު އަދި އެމްޑީޕީ ޕީޖީ ގްރޫޕްގެ ލީޑަރު އިބްރާހިމް ނާޒިލް ވިދާޅުވެއްޖެއެވެ.
އެމްޑީޕީ ޕީޖީ ގްރޫޕުގެ ފަރާތުން މިއަދު މަޖިލީހުގެ އިދާރާގައި ބެއްވި ނޫސްވެރިންގެ ބައްދަލުވުމުގައި އެޕާޓީގެ މެމްބަރުން ވަނީ މަޖިލީހގެ ތަޅުމުގައި މިހާރު އެމްޑީޕީގެ މެމްބަރުންނަށް އެއްވެސް ފުރުސަތެއް ނެތްކަން ފާހަގަކުރައްވައި ވާހަކަދައްކަވާފައެވެ.
ނޫސްވެރިންނާ ވާަކަދައްކަވަމުން ނާޒިލް ވިދާޅުވީ ރައްޔިތުން މަޖިލީހުގެ ރިޔާސަތުން މިހާރު އަމަލުކުރައްވަމުން އެދާގޮތަކީ މީގެކުރިން ރައްޔިތުން މަޖލީހުގައި ރިޔާސަތުން އަމަލުކުރެއްވިގޮތެއް ނޫންކަމަށާއި، ރިޔާސަތުން އަމަލުކުރައްވަމުންދަނީ އުސޫލްތަކާ ހިލާފަށްކަމަށެވެ. ނާޒިމް ވިދާޅުވީ އެމްޑީޕީ މެމްބަރުން ކުއްލި މައްސަލައެއް ހުށަހެޅި ނަމަވެސް، ރިޔާސަތުން އެކަން ބަލައި ނުގަންނަ ކަމަށާއި، މައްސަލައެއްގައި އެމްޑީޕީއަށް ނިސްބަތްވާ މެމްބަރުން ވާހަކައެއް ދެއްކެވިނަމަވެސް އެކަމަށްވެސް ހުރަސް އަޅުއްވަމުން ގެންދަވާކަމަށެވެ.
މިއީ ޑިމޮކްރަސިއެއްގައި ކަންކަން ހިނގައިގެންވާނޭ ގޮތް ނޫންކަން ފާހަގަކުރައްވަމުން ނާޒިލް ވިދާޅުވީ، މަޖިލީސް މިއަދު އޮތީ ޕެރަލައިޒް ވެފައި ކަމަށާއި، އެތަނުގައި މަސައްކަތްތައް ކުރިއަށްގެންދަނީ ވަކި ބަޔަކަށް މަންފާވާ ގޮތަށްކަމަށެވެ.
ނާޒިލް ވިދާޅުވީ މިހާރު ފެނިގެން މިދަނީ އެކެއްގެ މުށުތެރެއަށް ދައުލަތުގެ ބާރުތައް ޖަމާކުރުމުގެ މަސައްކަތްކުރަމުންދާ ކަމަށާއި، ޖުޑިޝަރިއާއި، މިނިވަން މުއައްސަސާތަކުގެ އިތުރުން ރައްރިތުންގެ މަޖިލީހުގެ ބާރެއް މިއަދު ނެތްކަމަށާއި، މަޖިލީހުގައި ދެން ވާންވީގޮތްވެސް މިހާރު ނޭނގޭ ހިސާބަށް ގޮސްފައިވާކަމަށެވެ.
ދައްކަންޖެހޭ ވަރަށްގިނަ ވާހަކަތަކެއް އެބަހުރި. ރަމަޟާންމަހުގެ މެންދުރުފަހުވެސް ޕްރެސްތައް ބައްވަން މިޖެހެނީ މަޖިލީހުގެ ފްލޯގައި ތަފްސީލްކޮސް ވާހަކަދެއްކުމުގެ ފުރުސަތު އަޅުގަނޑުމެނަށް ލިބިގެން ނުދާތީ. ބިލަކަށް ވާހަކަދައްކަމުންގޮސް ރިޔާސަތުން ހިތްހަމަ ނުޖެހޭ ވާހަކައެއް ދެއްކޭއިރަށް އެމްޑީޕީ މެމްބަރުންނަށް އިތުރު ވާހަކައެއް ދެއްކުމުގެ ފުރުސަތު ނުދީ އަޅުގަނޑުމެން އެބަ ބޭރުކޮށްލާ
ނާޒިލް ވިދާޅުވިއެވެ
މި ބައްދަލުވުމުގައި ވާހަކަދައްކަވަމުން ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް (ކުދޫ) ވިދާޅުވީ، މަޖިލީހުގެ ކަންކަން ހުރިގޮތުން މިހާރު ވަޒީރަކު ގެނެސް ސުވާލުކުރުމުގެ ފުރުސަތުވެސް އެމްޑީޕީގެ މެމްބަރުންނަށް މިހާރު ނޯންނަކަމަށެވެ. މެމްބަރުން މަޖިލީހުގައި ތިބެނީ ރައްޔިތުން އެދިގެން ރައްޔިތުން ބުނާ މަސައްކަތެއް ކުރުމަށް ކަމަށާއި، ނަމަވެސް މިހާރު އެ މަސައްކަތް ކުރެވެން ނެތްކަމަށެވެ. މަޖިލީހުެ ތެރެއިން ސަރުކާރު ޒިންމާދާރު ކުރުމުގެ ފުރުސަތު ނުލިބޭއިރު އިދިކޮޅުގެ ބައިވެރިވުމާއެކު ޤާނޫނެއް ނުހެދޭ ތަނުގައި އެއްވެސް މަސައްކަތެއް ކުރިއަށް ނުގެންދާކަމަށް ކުޑޫ ފާހަގަކުރެއްވިއެވެ.
ކުޑޫ ވިދާޅުވީ މަޖިލީހުގެ ބޭނުން މިހާރު ކެނޑިފައިވާކަމަށާއި، މިހުންނަނީ ވަރަށް ކަންބޮޑުވާ ކަންކަން ކަަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
