ތަހުގީގީ އިދާރާތަކަށް ފުރިހަމައަށް އެއްބާރުލުން ދިނުމަށް އެލްޖީއޭ އިން ކައުންސިލްތަކަށް އަންގައިފި

ތަހުގީގީ އިދާރާތަކަށް ފުރިހަމައަށް އެއްބާރުލުން ދިނުމަށް ކައުންސިލްތަކަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން އަންގައިފިއެވެ.

އެލްޖީއޭ އިން ނެރުނު އިއުލާނެއްގައި ބުނެފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުމުގެ ގާނޫނުގެ 61 ވަނަ މާއްދާގައި ބަޔާންކޮށްފައިވާ ގޮތުން ކައުންސިލްތަކުގެ މަސައްކަތްތަކާއި ހަރަކާތްތައް ހިންގަމުންދަނީ ގާނޫނު އަސާސީ އާއި ލާމަރުކަޒީ ގާނޫނާއި އެހެނިހެން ގާނޫނުތަކާއި އެއްގޮތަށްތޯ ބެލުމަކީ އެ އޮތޯރިޓީގެ މަސްއޫލިއްޔަތެއް ކަމަށެވެ.

އަދި އެ ގާނޫނުގެ 131.5 ވަނަ މާއްދާގައި ދިވެހި ރާއްޖޭގައި އަމަލު ކުރެވެމުންދާ އެންމެހައި ގާނޫނުތަކަށް ކައުންސިލްތަކުން އެއްބާރުލުން ލިބެމުން ނުދާ ކަމުގެ ޝަކުވާ ލިބެމުންދާކަން ފާހަގަކޮށް އެ އޮތޯރިޓީ އިން ވަނީ އެކަމާ ކަންބޮޑުވުންފާޅުކޮށްފައެވެ.

މިއާއެކު އެލްޖީއޭއިން ވަނީ ތަހުގީގު އިދާރާތަކަށް ފުރިހަމަ އެއްބާރުލުން ދިނުމަށާއި އެ ފަރާތްތަކުގެ ގާނޫނީ ޒިންމާ އާއި މަސްއޫލިއްޔަތު އަދާކުރުމަށް ހުރަސް ނޭޅުމަށާއި ތަހުގީގު އިދާރާތަކުގެ ގާނޫނީ ޒިންމާ އަދާކުރުމަށް އެހީތެރިވުމަށާއި އަދި މައްސަލަތަކާއި ގުޅިގެން އެ އިދާރާތަކުން ކައުންސިލްތަކަށް އަންގާ އެންގުންތަކާ އެއްގޮތަށް އަމަލުކުރުމަށް ވެސް އަންގާފައެވެ.

އެލްޖީއޭއިން މިފަދައިން ބަޔާން ނެރެފައި މިވަނީ، ތިނަދޫ ސިޓީ ކައުންސިލާއި ގުޅޭ ގޮތުން ތަހުގީގު ކުރަމުންދާ މައްސަލައަކާއި ގުޅިގެން މިމަހުގެ 26 ވަނަ ދުވަހު އެ ކޮމިޝަނުގެ ޓީމެއް އެ ކައުންސިލްގެ އިދާރާއަށް ވަދެ، ތަހުގީގަށް ބޭނުންވާ ލިޔެކިޔުންތައް ހޯދުމުގެ މަސައްކަތް ކުރުމުން، އެކަމުގައި ކައުންސިލްގެ އެއްބާރުލުން ލިބިފައިނުވާކަމަށް އޭސީސީން ބުނެފައިވަނިކޮށެވެ.