އެމްޑަބްލިޔުއެސްސީ މޮބައިލް އެޕަށް ބޮޑެތި ބަދަލުތަކެއް ގެނެސް ލޯންޗްކޮށްފި

މާލޭ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ)ގެ މޮބައިލް އެޕްލިކޭޝަނަށް ބޮޑެތި ބަދަލުތަކެއް ގެނެސް އެޕް އަލުން ލޯންޗްކޮށްފި އެވެ.

އެމްޑަބްލިޔުއެސްސީން ބުނެފައިވާ ގޮތުގައި މިބަދަލުތައް ގެނެވިފައި ވަނީ އެމްޑަބްލިޔުއެސްސީ މޮބައިލް އެޕްލިކޭޝަންގެ ޚިދުމަތްތައް ކުރިއަށް ވުރެ ފަސޭހަކަމާއެކު ކަސްޓަމަރުންނަށް ފޯރުކޮށްދިނުމުގެ ގޮތުންކަމަށެވެ.

އެގޮތުން މިއަދު އެމްޑަބްލިޔުއެސްސީގައި ބޭއްވުނު ރަސްމިއްޔާތުއްގައި މި ބަދަލުތަކާއެކު މޯބައިލް އެޕްލިކޭޝަން އަލުން ލޯންޗްކޮށްދެއްވީ އެމްޑަބްލިޔުއެސްސީގެ ޗެއަރޕާރސަން ޝަމްޙޫޒާ އަޙުމަދު އާއި އެމް.ޑަބްލިޔު.އެސް.ސީގެ މެނޭޖިންގ ޑިރެކްޓަރ، ޢަބްދުލް މަތީން މުޙައްމަދު އެވެ.

މޯބައިލް އެޕްލިކޭޝަނަށް އިތުރު ބަދަލުތަކެއް ގެނެވިފައި މިވަނީ ކަސްޓަމަރުން ޚިދުމަތްތައް ހޯދުމަށް ކައުންޓަރަށް އައުމުގެ ބަދަލުގައި، މި އެޕްލިކޭޝަން މެދުވެރިކޮށް ކަސްޓަމަރުންނަށް ފެނާއި ނަރުދަމާގެ ޚިދުމަތްތަކަށް އެދި ހުށައެޅުމާއި، ބިލްތަކަށް ފައިސާ ދެއްކުމާއި، އަދި އެހެނިހެން ޚިދުމަތްތައް ލިބިގަނެވޭނެ ގޮތަށް މަގު ފަހިކޮށްދިނުމުގެ ގޮތުން ކަމަށް އެމްޑަބްލިޔުއެސްސީން ވަނީ ބުނެފަ އެވެ.

އެމްދަބްލިޔުއެސްސީ އިން ބުނެފައިވާ ގޮތުގައި މޯބައިލް އެޕްލިކޭޝަނަށް މި ގެނެވުނު ބަދަލުތަކާއެކު، ކުރިން އެމް.ޑަބްލިޔު.އެސް.ސީގެ މޯބައިލް އެޕްލިކޭޝަންއިން ލިބެމުން ދިޔަ ޚިދުމަތްތަކާއި އަދި އީ-ޕޯޓަލް މެދުވެރިކޮށް ލިބެން ހުރި ހުރިހާ ޚިދުމަތްތައް، އައު ޚިދުމަތްތަކާއެކު މޯބައިލް އެޕްލިކޭޝަން މެދުވެރިކޮށް މިހާރު ލިބެމުންދާނެ އެވެ.

މޮބައިލް އެޕްލިކޭޝަނަށް އަލަށް ގެނެވުނު ބަދަލުތަކުގެ ތެރޭގައި:

- އީފާސް މެދުވެރިކޮށް ފަސޭހަކަމާއެކު މޯބައިލް އެޕްލިކޭޝަންއަށް ލޮގިން ކުރެވުން

- އީފާސް އިން ލޮގިން ކުރުމާއެކު އެފަރާތެއްގެ ނަމުގައިވާ ހުރިހާ މީޓަރެއް ފެންނަން ހުރުން.

- ކޮންމެ ތަނެއްގައި ހުރެގެންވެސް ފަސޭހަކަމާއެކު ފެނާއި ނަރުދަމާގެ ޚިދުމަތްތަކަށް އޮންލައިންކޮށް އެދި ހުށައެޅުން.

- ކަސްޓަމަރުން އެދިފައިވާ ޚިދުމަތްތަކުގެ ތަފްޞީލާއި، އެޚިދުމަތުގެ މަސައްކަތް ގޮސްފައިވާ ހިސާބުގެ އަދާހަމަ ވަގުތުން ބެލޭނެގޮތް ވުމާއި އެ ޚިދުމަތްތަކަށް އެޕް މެދުވެރިކޮށް ފައިސާ ދެއްކުން.

- މަލްޓިޕޭ މެދުވެރިކޮށް އެކި އެކައުންޓުތަކުގެ ބިލްތަކަށް އެއްފަހަރާ ފައިސާ ދެއްކުން.

- މީޓަރގެ ރީޑީންގ އާއި ފޮޓޯއެއް އަޕްލޯޑް ކޮށްލައިގެން މަހުގެ ކޮންމެ ހިސާބެއްގައިވެސް ބިލް ހެދުމަށް ރިކުއެސްޓް ކުރެވުން.

- ސްމާޓް މީޓަރ މިހާރު ބޭނުންކުރަމުންދާ ކަސްޓަމަރުން ފެން ބޭނުންކުރަމުންދާ މިންވަރާއި ބިލަށް އަރާ ފައިސާގެ މިންވަރު ދުވަހުން ދުވަހަށް ބަލާލެވުން.

- ސްމާޓް މީޓަރ ތަކުން އެވަގުތަކު ބިލަށް އަރާފައިވާ މިންވަރު ދެނެގަނެވުން

- ސްމާޓް މީޓަރތަކުން އެމަހެއްގެ އަންދާޒީ ބިލްގެ މިންވަރު ދެނެގަތުން.

- އެއް އަހަރު ދުވަހުގެ އެކައުންޓް ސްޓޭޓްމަންޓް ބަލާލެވުން

އެމްޑަބްލިޔުއެސްސީގެ އައު އެޕްލިކޭޝަނާއި ގުޅޭގޮތުން މައުލޫމާތު ސާފުކުރަން ބޭނުންވާ ފަރާތްތަކުން އެމްޑަބްލިޔުއެސްސީގެ ކަސްޓަމަރ ސަރވިސް ހޮޓްލައިން 105 އަށް ގުޅުއްވާ ނުވަތަ އެމްޑަބްލިޔުއެސްސީގެ ވެބްސައިޓް mwsc.com.mv އިން އެޕްލިކޭޝަނާއި ގުޅޭ މަޢުލޫމާތުތައް ޝާއިޢުކުރެވިފައިވާނެކަމަށް އެކުންފުނިން ވަނީ ބުނެފަ އެވެ.