ސްރީލަންކާ ސަރުކާރު މުވައްޒަފުންގެ މުސާރަ ބޮޑުކުރަނީ!

ސްރީލަންކާ ސަރުކާރުގެ އެންމެ ދަށް މުސާރަ ލިބޭ މުވައްޒަފުންގެ އަސާސީ މުސާރަ ބޮޑުކުރަން، މިއަހަރުގެ ބަޖެޓްގައި ހިމަނައިފިއެވެ.

ލަންކާގެ މިއަހަރުގެ ބަޖެޓް، އެގައުމުގެ ގާނޫނު ހަދާ މަޖިލީހަށް އިއްޔެ ހުށަހަޅުއްވަމުން ރައީސް އަނޫރަ ކުމާރަ ޑިސަނަޔަކަ ވިދާޅުވީ، ސަރުކާރުގެ އެންމެ ކުޑަ އަސާސީ މުސާރަ 24،250 އިން 40،000 އަށް ބަދަލުކުރާނެކަމަށެވެ. މިކަން ކުރާނީ 3 ފިޔަވައްސަކަށް ބަހާލައިގެންކަމަށްވެސް ޑިސަނަޔަކަ ވިދާޅުވިއެވެ. ބޮޑުކުރި މުސާރަ ދިނުމަށް، މިއަހަރުގެ ބަޖެޓްގައި 110 ބިލިއަން ލަންކާ ރުޕީޒް ވަނީ ހިމަނާފައެވެ.

އިގްތިސާދީ ބޮޑު އަނދަވަޅަކުން ލަންކާ ނަގައި ކޮޅަށް ޖެހުމަށް ޑިސަނަޔަކަގެ އެން.ޕީ.ޕީ ސަރުކާރުން މަސައްކަތްކުރަމުންދާއިރު، އެމަސައްކަތުގައި މިއަހަރުގެ ބަޖެޓް މުހިއްމު ދައުރެއް އަދާކުރާނެއެވެ.

ބަޖެޓްގެ އެހެން ބައެއް އުސްއަލިތަކަށް ބަލާއިރު، ސައިފަތްދަނޑުތަކުގައި މަސައްކަތްކުރާ މީހުންގެ ދުވަހު މުސާރަ 1700 ރުޕީޒްއަށް ހެދުމަށް ނިންމާފައިވާ ނިންމުން ތަންފީޒުކުރުމަށް ވަނީ ހަމަޖެހިފައެވެ. އަދި 2019 ވަނަ އަހަރުގެ ނިޔަލަށް ރިޓަޔަރކޮށްފައި ތިބި އެންމެންގެ ޕެންޝަންވެސް ތިން ފިޔަވައްސަކަށް ބަހާލައިގެން ބޮޑުކުރާގޮތަށް ވަނީ ނިންމާފައެވެ. ޓެކްސްގެ ނިޒާމް ހަރުދަނާކޮށް، ދެފުށްފެންނަ ގޮތަކަށް ކުރިއަށް ގެންދިޔުމަށް މުޅި ނިޒާމް ޑިޖިޓަލައިޒް ކުރުމަށްވެސް ވަނީ ނިންމާފައެވެ.

މިއަހަރުގެ ސްރީލަންކާގެ ޤައުމީ ދުވަސް ފާހަގަކުރުމަށް 300 މިލިއަން ރުޕީޒްގެ ބަޖެޓެއްވެސް ވަނީ ކަނޑައަޅާފައެވެ. އާޓިސްޓުންނަށާއި ނޫސްވެރިންނަށް ޚާއްސަކޮށް، ޗައިނާ ސަރުކާރުގެ މާލީ އެހީގައި ކޮއްޓާވާގައި 108 ހައުސިންގ ޔުނިޓް އެޅުމަށް ހަމަޖެހިފައިވާކަމަށްވެސް ރައީސް ޑިސަނަޔަކަ ވަނީ ގާނޫނު ހަދާ މަޖިލީހުގައި އިއުލާންކުރައްވާފައެވެ.

މީގެ އިތުރުން ޑިސަނަޔަކަ ވިދާޅުވީ ޕްރައިވެޓް ސެކްޓަރއާއެކު ކުރެވުނު މަޝްވަރާތަކުގައި، އަސާސީ މުސާރަ 21،000 އިން 27،000 އަށް މިއަހަރުގެ އެޕްރީލްގެ ނިޔަލަށް ބޮޑުކޮށްދީ، އަންނަ އަހަރުގެ ޖެނުއަރީގެ ކުރިން 30،000 ރުޕީޒްއަށް ބޮޑުކޮށްދިނުމަށް ޕްރައިވެޓް ސެކްޓަރއިން ސަރުކާރަށް ޔަގީންކަން ދީފައިވާކަމަށެވެ.