އެންސްޕާއާއި ގުޅިގެން ފަތުރަމުންދާ ވާހަކަތަކާ ގުޅޭ ތަހްގީގެއް ހިންގުމަށް އޭސީސީގައި އެދިއްޖެ!

ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާ ގުޅޭގޮތުން ބައެއް މީޑިއާތަކުން ފަތުރަމުންދާ ވާހަކަތަކާ ގުޅިގެން އެ މައްސަލަ ތަޙްޤީޤުކުރުމަށް އެންޓި-ކޮރަޕްޝަން ކޮމިޝަން (އޭސީސީ) ގައި އެދިއްޖެއެވެ.

އެންސްޕާގެ މުދަލާއި ފައިސާ އަދި މުވައްޒަފުން ބޭނުންކޮށްގެން ޓީވީ ޗެނަލެއް ހިންގަން އެހީތެރިވަމުން އަންނަ ކަމަށާ، އެ ޗެނަލް ހިންގާ އިމާރާތުގެ ކުލި ދައްކަނީ އެންސްޕާ މެދުވެރިކޮށް ކަމަށް ތުހުމަތުކޮށް ބައެއް ނޫސް ތަކުން ފަތުރަމުންދާ ވާހަތަކާއި ގުޅިގެން އެންސްޕާއިން މިރޭ ނެރުނު ނޫސް ބަޔާނެއްގައިވަނީ އެއީ ހަގީގަތާ ޚިލާފު ވާހަކަތަކެއް ކަމަށްބުނެ އެ ވާހަކަތައް ދޮގުކޮށްފައެވެ.

އެގޮތުން ބުނީ، އެ އެޖެންސީން ހިންގުމަށް އިމާރާތެއް ހޯދުމުގެ މުޢާމަލާތަކީ އެ އެޖެންސީއާއި މާލީ ވުޒާރާ އާއި ދެމެދު ކުރުމަށް ކަނޑައެޅިފައިވާ އުސޫލުގެތެރެއިން ކުރެވިފައުވާ މުއާމަލާތެއް ކަމަށެވެ. އަދި އެއީ އެ އެޖެންސީއާއު އެހެން އެއްވެސް ފަރާތަކާ ދެމެދު ކުރެވިފައިވާ މުޢާމަލާތެއް ނޫން ކަމަށްވެސް ބުންޏެވެ.

”އެއީ އާއްމު މުޢާމަލާތުގެ ގޮތުގައި ހާމަކަން ބޮޑު ގޮތެއްގައި މާލީ ވުޒާރާގެ މަންސަތަކުގައި ފެންނަންހުރި މައުލޫމާތު ތަކެވެ.“ އެންސްޕާ އިން ބުންޏެވެ.

އެންސްޕާއިން އިތުރަށް ބުނީ، އެޖެންސީ ހިންގުމަށް ބޭނުންވާ މުވައްޒަފުން ހޯދުމާއި، އެ މުވައްޒަފުންގެ ޒިންމާތައް ޙަވާލުކުރުމުކީ އެކަމަށް ކަނޑައެޅިފައިވާ އުސޫލުތަކުގެ ތެރެއިން ކުރެވެމުންދާ ކަންކަން ކަމަށެވެ.

"ރައްޔިތުންގެ އިޖްތިމާއީ ރައްކާތެރިކަމާ ގުޅުންހުރި މިފަދަ މުއައްސަސާއަކާއި ގުޅިގެންނާއި، މި މުވައްސަސާގެ މުވައްޒަފުންގެ ނަޒާހާތްތެރިކަމާމެދު ރައްޔިތުންގެ މެދުގައި ކަންބޮޑުވުމާއި ޝައްކު އުފެދޭގޮތަށް މައުލޫމާތު ފަތުރަމުންދާ ދިޔުން ހަރުކަށި އިބާރާތުން ކުށްވެރިކުރަން. އަދި މިފަދަ ދޮގު މަޢުލޫމާތު ފަތުރާ ފަރާތްތަކާމެދު ފިޔަވަޅު އެޅުމަށް ކަމާބެހޭ މުއައްސަސާތަކަށް ހުށަހަޅާނެ ވާހަކަވެސް ދަންނަވަމެވެ" އެންސްޕާގެ ނޫސްބަޔާނުގައި ބުނެފައިވެއެވެ.

މީގެ އިތުރުން އެންސްޕާ އާއި އެ އެޖެންސީގެ މުވައްޒަފުންގެ ނަޒާހާތްތެރިކަމާމެދު ސުވާލު އުފެދޭގޮތަށް ދައްކަމުންދާ ވާހަކަ ތަކާމެދު މިނިވަން ތަހުގީގެއް ހިންގައި އެކަންކަމުގެ ތަފްސީލް ރައްޔިތުންނަށް ހާމަކުރުމަށް އެ އެޖެންސީން ވަނީ އޭސީސީގައި އެދިފައެވެ.