ސުޕްރީމް ކޯޓު ހިންގުން ފަނޑިޔާރު އަރީފާއި ހަވާލުކޮށްފި

ދިވެހިރާއްޖޭގެ ސުޕްރީމް ކޯޓު ހިންގުން އެކޯޓުގެ ފަނޑިޔާރު އަދި ޖޭއެސްސީގެ މެންބަރު އަބްދުﷲ އަރީފްއާއި ހަވާލުކޮށްފިއެވެ.

ސުޕްރީމް ކޯޓު ހިންގުން ފަނޑިޔާރު އަރީފާއި ހަވާލުކުރަން ނިންމީ މިއަދު އޮތް ޖޭއެސްސީގެ ޖަލްސާގައެވެ. ފާހަަގަކޮށްލެވޭ ގޮތުގައި މިއަދުގެ ވަގުތެއްގައި އުއްތަމަ ފަނޑިޔާާރު ޑރ.އަހުމަދު އަބްދުﷲ ދީދީ އާއި ފަނޑިޔާރު އާދަމް މުހައްމަދު އަބްދުﷲ، ޖޭއެސްސީން ވަނީ ސަސްޕެންޑްކޮށްފައެވެ.

މީގެ އިތުރުން ފަނޑިޔާރު އަބްދުﷲ އަރީފުވެސް ވަނީ އެބޭފުޅާ ހުންނެވި ޖޭއެސްސީގެ ރައީސްކަމުގެ މަގާމުން އިސްތިއުފާ ދެއްވާފައެވެ.

އަރީފް މި މަގާމުން ވަކިވެ ވަޑައިގެންނެވީ ޖޭއެސްސީން އެބޭފުޅާގެވެސް މައްސަލަތަކެއް ބަލަމުން ދަނިކޮށެވެ.

އިނގިރޭސި ބަހުން ނެރުނު ބަޔާނެއްގައި ޖޭއެސްސީން ބުނީ ޖުޑީޝަލް ސާރވިސް ކޮމިޝަންގެ ގާނޫނަށް މިއަހަރުގެ ސެޕްޓެމްބަރ މަހުގެ ނުވަވަނަ ދުވަހު ގެނެވުނު އިސްލާާހަށްފަހު، ފަނޑިޔާރުންނާއި ގުޅުންހުރި ގާތްގަނޑަކަށް 200 އެއްހާ މައްސަލަ ބަލާފައިވާނެކަމަށެވެ. މި މައްސަލަ ތަކުގެ ތެރޭގައި ޖިންސީ ފުރައްސާރަކުރުމާއި، ކޮރަޕްޝަނާއި، ނަަހަމަ ނުފޫޒު ބޭނުންކުރުން ފަދަ ކަންތައްތައް ހިމެނޭކަމަށް ވަނީ ބުނެފައެވެ.

މި 200މައްސަލަތަކުގެ ތެރޭގައި ސުޕްރީމް ކޯޓުގެ ފަނޑިޔާރުންގެ މައްސަލަތައް ހިމެނޭކަމަށް ބަޔާނުގައި ވަނީ ބުނެފައެވެ. އެގޮތުން ސުޕްރީމް ކޯޓުގެ ހަތަރު ފަނޑިޔާރެއްގެ މައްސަލަ ބަލަމުންދާކަމަށްކަމަށް ވަނީ ހާމަކޮަށްފައެވެ.

މި މައްސަލަތަކުގެ ތެރޭގައި އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީގެ 18 މައްސަލައެއް، ފަނޑިޔާރު އަބްދުﷲ އަރީފްގެ 14 މައްސަލައެއް، ފަނޑިޔާރު އާދަމް މުހައްމަދު އަބްދުﷲގެ 16 މައްސަލައެއް އަދި ފަނޑިޔާރު އަބްދުލްޣަނީ މުހައްމަދުގެ ތިން މައްސަލައެއް ދަނީ ބަލަމުންނެވެ.