ބެންގަލޫރުގެ ސިޓީ ހޮޓަލެއްގައި ދިވެއްސަކު މަރުވެފައި އޮއްވާ ފެނިއްޖެ

ގިނަ އަދަދެއްގެ ދިވެހިން ބޭސްފަރުވާއަށް ގޮސް އުޅޭ ބެންގަލޫރުގެ ސިޓީ ހޮޓަލެއްގައި ދިވެއްސަކު މަރުވެފައި އޮއްވާ ފެނިއްޖެ އެވެ.

އިންޑިއާގެ ނޫހެއް ކަމަށްވާ ޓައިމްސް އޮފް އިންޑިއާގައި ރިޕޯޓުކޮށްފައިވާ ގޮތުގައި މަރުވެފައި އޮއްވާ ފެނުނީ ހަސަން ސުހައިލް، 43، އެވެ.

އެގޮތުން އެ ނޫހުގައި ބުނީ، މިދިޔަ ބުދަ ދުވަހު، ސުހައިލް އެއްވެސް ވަރަކަށް އޭނާ ހުރި ކޮޓަރިން ނުނިކުންނާތި އާއި، ކެއުމަށްވެސް އޯޑަރު ނުކުރާތީ، ހޮޓެލުން އޭނާއަށް ގުޅުމަށް މަސައްކަތް ކުރި ކަމަށެވެ.

ނަމަވެސް އެގޮތުންވެސް ނުގުޅުމުން، ފުލުހުންނަށް ގުޅައިގެން، ފުލުހުންގެ އައިސް ދޮރު ވައްޓާލައިގެން ބެލިއިރު ސުހައިލް އޮތީ މަރުވެފައި ކަމަށް ބުނެފައިވެއެވެ.

ފުލުހުން ބުނެފައިވާ ގޮތުން ސުހައިލް ހުރި ކޮޓަރީގެ ފާހާނާގެ ދޮރުމައްޗަށް ހޮޑު ލެވިފައި ހުރި ކަމަށާ، އެހެން ކަމުން މަރުވީ ބެލެވޭ ގޮތުގައި ލޭގެ ޕްރެޝަރު ދަށްވެ ޑީހައިޑްރޭޝަންގެ ސަބަބުން ހާޓް އެޓޭކެއް ޖެހިގެން ކަމަށެވެ.

ފުލުހުން ބުނެފައުވާ ގޮތުން، ސުހައިލް ދިވެހިރާއްޖެއިން ބެންގަލޫރުއަށް އައީ ނޮވެމްބަރު 10 ވަނަ ދުވަހުއެވެ. އަދި އޭނާ ހުރީ ބެންގަލޫރުގެ ކަނަކަ ކްރިޝްނާ ކޮމްފޯޓްސް ހޮޓެލުގައެވެ. ހޮޓަލުގެ މުވައްޒަފުން ފުލުހުންނަށް ބުނެފައިވަނީ ސުހައިލް އެންމެ ފަހުން ފެނިފައިވަނީ ނޮވެމްބަރު 12 ވަނަ ދުވަހުގެ ހަވީރުގައި ކަމަށެވެ.

މީގެ އިތުރުން ފުލުހުން ބުނެފައިވާ ގޮތުން ސުހައިލް ވަނީ ނޮވެމްބަރު 11 ވަނަ ދުވަހު ބެންގަލޫރުއިން ބޯޕާލަށް ދަތުރުކުރުމަށް ފްލައިޓެއް ބުކްކޮށްފައެވެ. ނަމަވެސް އޭނާ ދަތުރު ނުކުރިއެވެ. އަދި އޭނާ ވަނީ ނޮވެމްބަރު 14 ވަނަ ދުވަހު ބޯޕާލުން މުންބާއީއަށް ފްލައިޓެއް ބުކްކޮށްފައި ކަމަށާ، ނޮވެމްބަރު 15 ވަނަ ދުވަހު މުންބާއީން ދިވެހިރާއްޖެއަށް ފްލައިޓެއް ބުކްކޮށްފައި ކަމަށް ފުލުހުން ބުންޏެވެ.

"އޭނާ ބޯޕާލަށް ދަތުރު ނުކުރި ސަބަބެއް އަޅުގަނޑުމެންނަކަށް ނޭނގެ. އަދި ކޮންމެ ދުވަހަކުހެން ފްލައިޓެއް އޮތްއިރު، އޭނާ ގަންގަނަގަރުގެ ހޮޓަލަކަށް އައިސް ހުރި ސަބަބެއްވެސް އަޅުގަނޑުމެންނަކަށް ޔަގީނެއް ނުވޭ." ފުލުހުން ބުނެފައިވެއެވެ.

ސުހައިލްގެ މަރާއި ގުޅިގެން އިންޑިޔާގައި ހުންނަ ދިވެހި ރާއްޖޭގެ އެމްބަސީއަށް އެކަން އަންގާފައިވާ ކަމަށާ، ފުލުހުން މިހާރު މަޑުކުރަމުންދަނީ އެމްބަސީ މެދުވެރިކޮށް އާއިލާއަށް އެކަން އަންގައި، ސުހައިލްގެ ޕޯސަޓްމޯޓަމް ހެދުމާއި، އޭނާ އިންޑިއާއަށް އައި ސަބަބު ބެލުމަށް ކަމަށްވެސް އިންޑިޔާ ފުލުހުން ބުނެފައިވެއެވެ.