އަޅުގަނޑު ރިޔާސަތުގައި އިނދެގެން އެހެން ދީނަކަށް ޖާގަ ނުދޭނެކަމުގެ ޔަގީންކަން ރައްޔިތުންނަށް އޮންނާނެ: ނަޝީދު

ރައްޔިތުންގެ މަޖިލީހުގެ ރިޔާސަތުގައި ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު އިންނަވައިގެން އިސްލާމް ދީން ނޫން އެހެން ދީންތަކަށް ޖާގަ ނުދޭނެ ކަމުގެ ފުރިހަމަ ޔަގީންކަން ރައްޔިތުންނަށް އޮންނާނެ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

މަޖިލީހުގެ ރައީސް މިހެން ވިދާޅުވީ ރާއްޖެ އިން އިސްލާމް ދީން ފުހެލަން މަސައްކަތް ކުރާ ބަޔަކަށް ޖާގަ ދީގެން މަޖިލީހުގެ ރައީސް އިންނަވާކަމަށް ވިދާޅުވެ، ނައިފަރު ދާއިރާގެ މެންބަރު އަހުމަދު ޝިޔާމު މިއަދު އޮތް ރައްޔިތުންގެ މަޖިލީހުގެ ޖަލްސާގައި ދެއްކެވި ވާހަކައަށް ރައްދު ދެއްވައި ދެއްކެވި ވާހަކަފުޅުގައެވެ.

ނަޝީދު ވިދާޅުވީ ރާއްޖޭގައި އެންމެ ފުރަތަމަ އިސްލާމިކް މިނިސްޓްރީއެއް އުފެއްދެވީ ވެސް އެމަނިކުފާނު ކަމަށެވެ.

ނަޝީދު މިހެން ވިދާޅުވި ނަމަވެސް ރާއްޖޭގައި އިސްލާމިކް މިނިސްޓްރީ އުފެއްދުމުގެ ކުރިން ރާއްޖޭގައި އޮތީ އިސްލާމީ ކަންތައްތަކާ ބެހޭ މަތީ މަޖިލީހެވެ. ދީނީ ހުރިހާ ކަމެއް ނިންމާނީ އޭރު އެ މަޖިލީހުންނެވެ.

ނަޝީދު ވިދާޅުވީ އެމަނިކުފާނު ރިޔާސަތުގައި އިންނަވައިގެން އިސްލާމް ދީން ނޫން އެހެން ދީންތަކަށް ޖާގަ ދިނުމަށް ހަމަ އެއްވެސް ކ ަމެއް ނުކުރައްވާނެ ކަމަށެވެ.

އަޅުގަނޑަށް 100 އިން 100 ދިވެހި ރާއްޖޭގެ ހުރިހާ ރައްޔިތުންގެ ފުރިހަމަ އިތުބާރު އޮންނާނެ އަޅުގަނޑުމިތާ އިނދެ މި ރާއްޖޭގައި އިސްލާމް ދީން ނޫން އެހެން ދީނަކަށް ޖާގަ ދޭނެ އެއްވެސް ކަމެއް ނުހިނގާނެކަން'' ނަޝީދު ވިދާޅުވިއެވެ.

ނަމަވެސް އިސްލާމް ދީނަށާއި ކީރިތި ގުރުއާނަށާއި މާތް ނަބިއްޔާއަށް ފުރައްސާރަކޮށް އެމްޑީއެން އިން ރިޕޯޓު ނެރުމުން، އެރިޕޯޓު ދިފާއު ކުރައްވައި ނަޝީދު ވަނީ މަޖިލީހުގެ ރިޔާސަތުގައި އިންނަވައިގެން ތަކުރާރުކޮށް ވާހަކަފުޅު ދައްކަވައިފައެވެ.