އެމްއޭސީއެލް ގެ ވެހިކަލް ވަގަށް ނެގި ފަރާތުގެ ނަންމަތީގައި 100 ވެހިކަލް!

ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ބާއްވާފައި އޮތް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ ވެހިކަލެއް ވަގަށް ނެގި ކަމަށް ތުހުމަތު ކުރެވޭ ފަރާތުގެ ނަންމަތީގައި 100 އަށްވުރެ ގިނަ ވެހިކަލް ރަޖިސްޓްރީ ކޮށްފައިވާކަމަށް ފުލުހުން ހާމަކޮށްފިއެވެ.

ދިވެހި ފުލުހުންގެ ހިދުމަތުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ދައޫދު ވަނީ އެ ކަންތައް ހިނގައިދިޔަ ގޮތުގެ ތަފްސީލު ހިއްސާ ކުރައްވާފައެވެ.

މިގޮތުން ޗީފް ސްޕްރިންޓެންޑެންޓް އޮފް ޕޮލިސް ވިދާޅުވީ، އެމްއޭސީއެލްގެ މެނޭޖިން ޑިރެކްޓަރުގެ ކާރު އެއާޕޯޓުން ވަގަށް ނަގައިގެން ފުރަތަމަ ހުޅުމާލެ އަށް ގެންގޮސް، ހުޅުމާލޭ ވިލާ ޕެޓްރޯލް ޝެޑް ކައިރީގައި ހުންނަ އޮރެންޖް ބިލްޑިން ކައިރީ ބާއްވައިގެން އުޅަނދުގެ ބޯޑު ބަދަލުކޮށްފައިވާކަމަށެވެ.

އެއަށްފަހު، އުޅަނދު މާލެއަށް ގެނެސް އަލިފާނުގެ ހާދިސާއެއް ހިނގި އީރަމްގޭގެ ގްރައުންޑް ފްލޯގައި ހުރި ގަރާޖަކަށް ވެއްދި ކަމަށެވެ. އެއާއިއެކު، ފުލުހުންގެ ތަހުގީގު ޓީމުން އެ ގަރާޖު ކުއްޔަށް ނަގައިގެން އުޅޭ މީހާގެ ހާޒިރުގައި އެ ތަން ބަލައި ފާސްކުރިއިރު، އެ އުޅަނދު ފެނިފައިވާ ކަމަށާއި، މީގެ ކުރިންވެސް އެމްއޭސީއެލުން ގެއްލިގެން ރިޕޯޓްކޮށްފައިވާ އުޅަނދެއް ވެސް ހަމަ އެ ގަރާޖުން ފެނިފައިވާ ކަމަށް ދާއޫދު ވިދާޅުވިއެވެ.

މި ގަރާޖު ހިންގާ ފަރާތުން ވެހިކަލް ތަކުގެ އަސްލު އޮޅުވާލުމަށްޓަކައި އިންޖީނު ނަންބަރާއި ޗެސިސް ނަންބަރާ ކަހާލުމަށް ފަހު ވަރަށް ފުޅާ ދާއިރާއެއްގައި މި ވިޔަފާރި ކުރަމުންދާކަން ދާއޫދު ފާހަގަކުރެއްވިއެވެ.

"ގެންދާ ހަތަރު ފުރޮޅުލީ ވެހިކަލްތައް ޚާއްސަކޮށް އޭގެ އަސްލު އޮޅުވާލުމަށްޓަކައި އިންޖީނު ނަންބަރާއި ޗެސިސް ނަންބަރާ ކަހާލުމަށް ފަހު، ފުޅާ ދާއިރާއެއްގައި މާލޭގައި މި ވިޔަފާރި މި ދެންނެވި ފަރާތުން ކުރަމުންދާކަން ފާހަގަކުރެވިފައިވަނީ،"

ދާއޫދު ވިދާޅުވިއެވެ.

މި މައްސަލައާއި ގުޅިގެން އަހްމަދު ނިޒާމް, 43, މ. މޮޑަން ކޮމެޓާއި އެމްއޭސީއެލް އިން އުޅަނދު ވަގަށް ނެގުމަށް އެހީތެރިވި އެ ކުންފުނީގެ މުއައްޒަފެއް ކަމަށްވާ މުހައްމަދު ހައިޝަމް، 42، މ. ސީނިއަސުރުމާގެ ފުލުހުން ހައްޔަރު ކޮށްފައިވާއިރު، ނިޒާމް ގެ ނަން މަތީގައި 100 އުޅަނދު ރަޖިސްޓްރީކޮށްފައިވާއިރު އޭގެ ތެރެއިން 86 އުޅަނދަކީ ހަތަރު ފުރޮޅުލީ އުޅަނދެވެ.

މި އުޅަނދުތަކުގެ ތެރެއިން 42 އުޅަނދެއް ނިޒާމް ގެ އަންހެނުންގެ ނަންމަތީގައި ވެސް ރަޖިސްޓްރީ ކޮށްފައިވާ ކަމަށް ދާއޫދު ވިދާޅުވިއެވެ. އަދި މި އުޅަނދުތައް ރަޖިސްޓްރީ ކުރުމުގައި،  ޓްރާންސްޕޯޓު މިނިސްޓްރީ މެދުވެރިކޮށް  2023 ގެ ކުރީގައި, 2025, 2026, 2027 ފަދަ ބައްދަލުނުކުރާ އަހަރުތަކުގެ ނަމުގައި ވެހިކަލް ރެޖިސްޓްރީކޮށް ރެޖިސްޓްރީ އިޝޫކޮށްފައިވާކަން ފާހަގަކުރެވިފައިވާ ކަަމށް ވެސް ދާއޫދު ވިދާޅުވިއެވެ.

ޓްރާންސްޕޯޓު މިނިސްޓްރީގެ ތެރެއިން މީގައި ބައިވެރިވި މީހުންހޯދުމާއި އެކު މި މައްސަލައިގެ ސީރިއަސް ތަހުގީގެއް ފުލުހުން ކުރަމުން އަންނަ ކަމަށާއި، ފުޅާ ދާއިރާއެއްގައި މި ވިޔަފާރި ކުރި ނިޒާމް ގެ މައްޗަށް ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށް ފުލުހުން ހާމަކުރެއެވެ.