ރާއްޖެއިން ބޭރުން ބޭސްފަރުވާ ހޯދުމުގައި ދަތިތަކާ ކުރިމަތިވާތީ، މެމްބަރުން ކަންބޮޑުވުން ފާޅުކޮށްފި

ރައްޔިތުން މަޖިލީހުގެ އިްޒަތްތެރި މެމްބަރުންނަށް ލިބިދީފައި އޮންނަ ހެލްތް އިންޝުއަރަންސް ނިޒާމުގެ ތެރެއިން ރާއްޖެއިން ބޭރުން ބޭސްފަރުވާގެ ކަންކަން ކުރުމުގައި ދަތިތަކާ ކުރިމަތިލާންޖެހެކަމަށް ވިދާޅުވެ މަޖިލީހުގެ އާއްމު ކޮމިޓީގައި މިއަދު ބައެއް މެމްބަރުން ކަންބޮޑުވުން ފާޅުކޮށްފިއެވެ.

މަޖިލީހުގެ މެމްބަރުންގެ ހެލްތް އިންޝުއަރަންސްގެ ހިދުމަތް ދެނީ އެލައިޑް އިންޝުއަރަންސް ކުންފުނިންނެވެ. މިއަދު ބޭއްވި އާއްމު ކޮމިޓީގައި މެމްބަރުންނަށް ހެލްތް އިންޝުއަރަންސް ބޭނުންކުރުމުގައި ދަތިތަކެއް ކުރިމަތިވާކަމަށް ވިދާޅުވެ އެ މައްސަލަ ނެންގެވީ ފޭދޫ ދާއިރާގެ މެމްބަރު އިބްރާހިމް ދީދީއެވެ.

އާއްމު ކޮމިޓީގައި މިކަމ ގުޅޭގޮތުން ވާހަކަދައްކަވަމުން ތިމަރަފުށީ ދައިރާގެ މެމްބަރު އަހުމަދު ރިޔާޒް ވިދާޅުވީ މެމްބަރުންގެ އަތުން ބޮޑު އަދަދެއް ހެލްތް އިންޝުއަރަންސަށް ނަގާއިރު، އިތުރު ތަކްލީފްތަކެއް އުފުލަންޖެހޭކަމަށް ދެކެވަޑައި ނުގަންނަވާކަމަށެވެ. އޭނާ ވިދާޅުވީ އެލައިޑުން ދޭ ލިޔުން ހިފައިގެން ޑޮކްޓަރަށް ދައްކަންދިއުމުން އެއްފަހަރު ޑޮކްޓަރަށް ދެއްކުނު ނަމަވެސް އެހެން ޑޮކްޓަރަކަށް ދައްކަން ބަލާއިރު އެ ލިޔުމުގެ ބޭނުމެއް ނުކުރެވޭ ކަމަށާއި ދެން ޖެހެނީ އަމިއްލަ އަތުން ހަރަދުކުރަންކަމަށެވެ.

އެއީ ހަޤީޤަތުގައި އެކަންވެގެންވާނެ ގޮތެއްނޫން. މެމްބަރުންނަށް މިފަދަ ލުއިފަސޭހަގޮތެއްނޫން. އިއްޒަތްތެރި މެމްބަރުންނަށް މިފަދަ ލުއިފަސޭހަ ގޮތެއް އޮންނަކަމުގައި ވަނީނަމަ އަޅުގަނޑު ޤަބޫލުކުރަނީ، އަޅުގަނޑުމެން މިކޮޅުން މަޖިލީހުގެ އިދާރާއިން އެ ގުޅަންޖެހޭ މީހަކަށް ގުޅައިގެން އެލައިޑަށް ގުޅައިގެން އެކަންކަން ކޮށްގެން ދާނަމަ އިތުރު ތަކްލީފެއް އުފުލަން ޖެހިގެން ނުވާނެ

މެމްބަރު ރިޔާޒް ވިދާޅުވިއެވެ

އެނާ ވިދާޅުވީ އެންމެފަހުން އިންޑިއާއަށް ގޮސް ބޭސްފަރުވާކޮށްގެން އައި ފަހަރުވެސް ލިޔުންތައް ހުށަހެޅުމުން ރެޖެކްޓް ކުރިކަމަށާއި، އެގޮތަށް ހަރަދުކުރި ފައިސާ ހޯދުމަކީވެސް ދަތި އުނދަގޫކަމެއްކަމަށެވެ. އެގޮތުން އެންމެފަހުން ލިޔުންތައް ހުށަހެޅުމުންވެސް ލިބުނީ 3،000 ރުފިޔާކަމަށް މެމްބަރު ވިދާޅުވިއެވެ.

ރައްޔިތުންގެ މަޖިލީހުގެ މެމްބަރުންނަށް އާސިއާންގެ ޤައުމުތަކުން ބޭސްފަރުވާގެ ހިދުމަތް ލިބޭއިރު، މެމްބަރުންގެ 18 އަހަރުން ދަށުގެ ދަރިއެއް ހުންނަނަމަ އެ ފަރާތަކަށްވެސް ހެލްތް އިންޝުއަރަންސް ލިބެއެވެ.