ޖެހިޖެހިގެން ހަތަރު މެޗުން މޮޅުވެ ޔުނައިޓެޑް ގަދަ ހަތަރަކައި ގާތަށް

އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑް އެންމެ ފަހުން ކުޅުނު ހަތަރު މެޗު ކާމިޔާބުކޮށް ގަދަ ހަތަރަކައި ގާތްކޮށްފިއެވެ.

ރޭ ޔުނައިޓެޑް ޔުނައިޓެޑް ނިއުކާސަލްގެ މައްޗަށް ކުރި ހޯދާފައިވަނީ 2-0 ގެ ނަތީޖާއަކުންނެވެ. ލުކާކޫ ބަދަލު ކުޅުންތެރިޔެއްގެ ގޮތުގައި ދަނޑަށް އަރައި ފައި ޖައްސާލި ފުރަތަމަ ބޯޅައިން ޔުނައިޓެޑަށް މެޗުގެ ކުރި ލިބުނުއިރު އެޓީމުގެ ދެވަނަ ލަނޑު ޖަހައިދީފައިވަނީ ރަޝްފޯޑެވެ.

މެޗައި ބެހޭގޮތުން ވާހަކަ ދައްކަމުން ޔުނައިޓެޑްގެ ކެއާ ޓޭކާ ކޯޗް ޝޯލްޝާ ބުނީ ހަތަރު މެޗު ކުޅެވުނު އިރު އެ ހަތަރު މެޗުންވެސް މޮޅުވުމުން އުފާވާކަމަށައި އޯޕަން ޕްލޭއަކުން އޭނާގެ ޓީމްކޮޅަށް މިހާތަނަށް ލަނޑެއް ވެދެފައިނުވާ ކަމަށެވެ. ފުރަތަމަ ހާފުގައި ޔުނައިޓެޑްގެ ފަރާތުން ފެނުނީ މަޑުޖެހިފައިވާ ކުޅުމެއް ކަމަށައި ނަމަވެސް މުޅި މެޗް ރަނގަޅަށް ކޮންޓްރޯލް ކުރެވުނު ކަމުގައި ޝޯލްޝާ ފާހަގަކުރިއެވެ.

ރެލިގޭޝަން ޒޯނައި ގާތުގައި އޮތް ނިއުކާސަލްގެ ކޯޗް ބެނީޓޭޒް ބުނީ ފުރަތަމަ ލަނޑުވަނީ ހެދުނު ގޯހަކުން ކަމަށައި އަދި މެޗުގައި ފެނުނު ދެވަނަ ލަނޑު ޖަހާފައިވަނީ ކައުންޓާ އެޓޭކެއްގައި ކަމަށެވެ. އިދިކޮޅު ޓީމުގައި ތިބީ މޮޅު ކުޅުންތެރިންކަމަށްވެސް އޭނާ ބުނެފައިވެއެވެ.

މިއީ މިދިޔަ އަހަރުގެ އޭޕްރިލް މަހުގެ ފަހުން ޔުނައިޓެޑް ޖެހިޖެހިގެން ލީގު ހަތަރު މެޗުން މޮޅުވި ފުރަތަމަ ފަހަރެވެ. ކުރިއަށް އޮތް މެޗުގައި ހޮނިހިރު ދުވަހު ޔުނައިޓެޑް ނުކުންނާނީ އެފް އޭ ކަޕްގައި ރީޑިންގްއައި ދެކޮޅަށެވެ.

މި މެޗުން ލިބުނު ތިން ޕޮއިންޓާއެކު ޔުނައިޓެޑް އޮތީ 21 މެޗުން ލިބުނު 28 ޕޮއިންޓާއެކު ތާވަލުގެ 6 ވަނައިގައެވެ. ހަމަ އެއަދަދަށް ކުޅެގެން 41 ޕޮއިންޓާއެކު އާސެނަލް 5 ވަނައިގަ އޮތް އިރު 44 ޕޮއިންޓް ހަމަކޮށްގެން 4 ވަނައިގަ އޮތީ ޗެލްސީއެވެ.

ސައުތްހެމްޕްޓަންއައި ދެކޮޅަށް އަމިއްލަ ދަނޑުގައި ޗެލްސީ ކުޅުނު މެޗް ލަނޑެއްނުޖެހި އެއްވަރުވިއިރު ބޯންމައުތް އަދި ވޮޓްފޯޑް ބައްދަލުކުރި ފޯރިގަދަ މެޗު ނިމުނީ 3-3 އެއްވަރުވެގެންނެވެ.